ରାଉରକେଲା/ସୁନ୍ଦରଗଡ଼, ୯/୭ : ୧୦ଟି କେନ୍ଦ୍ରୀୟ ଟ୍ରେଡ୍ ୟୁନିୟନ ଓ ଶ୍ରମିକ ସଙ୍ଗଠନର ମିଳିତ ଡାକରାରେ ଆଜି ଭାରତ ବନ୍ଦ କରାଯାଇଛି। ଶ୍ରମିକ ନୀତି, କୃଷି ବିରୋଧ ନୀତି, ମାଇନ୍ସ, କୋଇଲା କାରଖାନାରେ ଶ୍ରମିକ ବିରୋଧୀ କାର୍ଯ୍ୟକୁ ନେଇ ଏହି ଧର୍ମଘଟ କରାଯାଇଛି। ସୁନ୍ଦରଗଡ଼ ଜିଲ୍ଲାରେ ଏହାର ପ୍ରଭାବ ପଡ଼ିଛି। ଜିଲ୍ଲାର ମୁଖ୍ୟ ସହର ରାଉରକେଲାରେ ସ୍ଥିତି ସ୍ଵାଭାବିକ ଥିବାବେଳେ ସୁନ୍ଦରଗଡ଼ ବ୍ଲକ ଅଞ୍ଚଳରେ ଅଧିକ ପ୍ରଭାବ ପଡ଼ିଥିବା ଦେଖିବାକୁ ମିଳିଛି।
ସକାଳ ୭ଟାରୁ ସିଆଇଟିୟୁର ରାଷ୍ଟ୍ରୀୟ ଉପାଧ୍ୟକ୍ଷ ବିଷ୍ଣୁ ଚରଣ ମହାନ୍ତିଙ୍କ ନେତୃତ୍ୱରେ ଶତାଧିକ ଶ୍ରମିକ ଶୋଭାଯାତ୍ରାରେ ବସଷ୍ଟାଣ୍ଡରୁ ବିର୍ସାମୁଣ୍ଡା ଛକ ପର୍ଯ୍ୟନ୍ତ ଯାଇଥିଲେ। ଛକରେ ବିଭିନ୍ନ ଶ୍ରମିକ ବିରୋଧୀ ନୀତିକୁ ବିରୋଧ କରି ସରକାରଙ୍କ ବିରୋଧରେ ସ୍ଲୋଗାନ ଦେଇଥିଲେ। ଛକରେ ପ୍ରାୟ ୩ ଘଣ୍ଟା ପର୍ଯ୍ୟନ୍ତ ବିକ୍ଷୋଭ କରିଥିଲେ। ଏଥିରେ ସିଆଇଟିୟୁର ବିମାନ ମାଇତୀ, ଅନ୍ୟ ସଦସ୍ୟଙ୍କ ସହ ଶ୍ରମିକମାନେ ସାମିଲ ଥିଲେ। ଅନ୍ୟପଟେ ସକାଳୁ ଟ୍ରେନ୍ ଚଳାଚଳ ସ୍ବାଭାବିକ ଥିବାବେଳେ ସରକାରୀ ଓ ଘରୋଇ ବସ୍ ସବୁ ବନ୍ଦ ରହିଛି। ସେହିଭଳି କିଛି ସରକାରୀ ସ୍କୁଲ ବନ୍ଦ ଥିବାବେଳେ ଘରୋଇ ସ୍କୁଲ୍, ବ୍ୟାଙ୍କ୍, ଦୋକାନ ବଜାର ଖୋଲା ରହିଛି। ଫଳରେ ସହରରେ ଧର୍ମଘଟର ଆଂଶିକ ପ୍ରଭାବ ପଡ଼ିଥିଲା। ଅପରପକ୍ଷେ ସୁନ୍ଦରଗଡ଼, ବଣାଇ, କୋଇଡା, ବୀରମିତ୍ରପୁର, ରଜମୁଣ୍ଡା, ଲହୁଣୀପଡ଼ା, ହେମଗିରି ଅଞ୍ଚଳରେ ଜୋରଦାର ବିକ୍ଷୋଭ ହୋଇ ବନ୍ଦ ପ୍ରଭାବ ପଡିଛି। ବ୍ଲକ୍ ଅଞ୍ଚଳରେ ଥିବା ମାଇନ୍ସ ଓ କାରଖାନାର ପରିବହନ ଗାଡ଼ି ସବୁ ବନ୍ଦ ଥିବାବେଳେ ଦୋକାନ ବଜାର, ସ୍କୁଲ, ଅଫିସ ବନ୍ଦ କରି ଶ୍ରମିକ ସଂଘଗୁଡ଼ିକ ବିକ୍ଷୋଭ କରିଥିଲେ।
