ପାଟନା,୨୯/୦୬: ଦେଶରେ ପ୍ରଥମ ଥର ପାଇଁ ମୋବାଇଲ ଆପ୍ରେ ମତଦାନ ହୋଇଛି । ଶନିବାର ବିହାରର ୨୬ ଜିଲ୍ଲାର ୪୨ ନଗରପାଳିକାରେ ଉପନିର୍ବାଚନ ହୋଇଥିଲା । ଏଥିରେ ମତଦାତାଙ୍କୁ ମୋବାଇଲ୍ ଆପ୍ ଦ୍ୱାରା ଭୋଟ ଦେବାକୁ ସୁଯୋଗ ମିଳିଥିଲା । ଭୋଟ କେନ୍ଦ୍ର ପର୍ଯ୍ୟନ୍ତ ପହଞ୍ଚିବାକୁ ଅସମର୍ଥ ଥିବା ଲୋକମାନେ କିଭଳି ସହଜରେ ମତାଧିକାର ସାବ୍ୟସ୍ତ କରିପାରିବେ, ସେଥିପାଇଁ ଏହି ପ୍ରକଳ୍ପ ଆରମ୍ଭ ହୋଇଛି । ଭୋଟିଂ ଲାଗି ଦୁଇଟି ଆପ୍ ଶୁଭାରମ୍ଭ କରାଯାଇଛି । ଏହି ସୁବିଧାର ଲାଭ ଉଠାଇବାକୁ ଚାହିଁଥିବା ଲୋକମାନେ ପଞ୍ଜୀକରଣ କରାଇଥିଲେ ।
ନିର୍ବାଚନ କମିଶନଙ୍କ ମୁତାବକ, ଇ-ଭୋଟିଂ ପାଇଁ ୫୦ ହଜାରରୁ ଅଧିକ ଲୋକ ପଞ୍ଜୀକରଣ କରାଇଥିଲେ । ସକାଳ ୭ଟାରୁ ଅପରାହ୍ନ ୧ଟା ପର୍ଯ୍ୟନ୍ତ ଇ-ଭୋଟିଂ ଚାଲିଥିଲା । ଦୁବାଇ, କତାର ଭଳି ଦେଶରେ ରହୁଥିବା ପ୍ରବାସୀ ବିହାରୀମାନେ ମଧ୍ୟ ଆପ୍ ଜରିଆରେ ଭୋଟ୍ ଦେଇଛନ୍ତି । ମୋତିହାରୀର ବିଭା ଆପ୍ ଦ୍ୱାରା ପ୍ରଥମେ ଭୋଟ୍ ଦେଇଥିଲେ । ଏହାଦ୍ୱାରା ସେ ଦେଶର ପ୍ରଥମ ଇ-ଭୋଟର ବିବେଚିତ ହୋଇଛନ୍ତି ।
ସୂଚନାଯୋଗ୍ୟ, ବିହାରର ୨୬ ଜିଲ୍ଲାରେ ୪୨ ନଗରପାଳିକାରେ ୬୨.୪୧% ମତଦାନ ହୋଇଛି । ଏଥିରୁ ୬ଟି ନଗରପାଳିକାରେ ପାଇଲଟ୍ ପ୍ରକଳ୍ପ ଭାବେ ଇ-ଭୋଟିଂ ହୋଇଥିଲା । ଏହି ଇ-ଭୋଟିଂ ବ୍ୟବସ୍ଥାକୁ ସି-ଡିଏସି ଓ ବିହାର ରାଜ୍ୟ ନିର୍ବାଚନ କମିଶନ ମିଳିତ ଭାବେ ପ୍ରସ୍ତୁତ କରିଛନ୍ତି । ପ୍ରଥମ ଆପ୍ ‘ଇ-ଭୋଟିଂ ଏସ୍ଇସିବିଏଚ୍ଆର’କୁ ସି-ଡିଏସି ବନାଇଛି । ଅନ୍ୟ ଆପ୍କୁ ବିହାର ନିର୍ବାଚନ କମିଶନ ଦ୍ୱାରା ପ୍ରସ୍ତୁତ କରାଯାଇଛି । ପ୍ରବାସୀ ଶ୍ରମିକ, ଦିବ୍ୟାଙ୍ଗ, ବରିଷ୍ଠ ନାଗରିକ, ଗର୍ଭବତୀ ମହିଳା ଓ ଗୁରୁତର ଭାବେ ରୋଗଗ୍ରସ୍ତ ଲୋକମାନେ ଏଥିରେ ଭୋଟ ଦେଇପାରିବେ
