ନୂଆଦିଲ୍ଲୀ: ବିଟକଏନ୍ର ମୂଲ୍ୟ ପ୍ରଥମ ଥର ପାଇଁ ୧.୦୮ କୋଟି ଟଙ୍କା ଅତିକ୍ରମ କରିଛି । ଆଜି (ଅଗଷ୍ଟ ୧୪) ଏହି କ୍ରିପ୍ଟୋକରେନ୍ସି ସର୍ବକାଳୀନ ସର୍ବାଧିକ ସ୍ତରରେ ପହଞ୍ଚିଛି। ୨୦୦୯ରେ ଯେତେବେଳେ ସାତୋଶି ନାକାମୋଟୋ ନାମକ ଜଣେ ବ୍ୟକ୍ତି ଏହାକୁ ସୃଷ୍ଟି କରିଥିଲେ, ଏହାର ମୂଲ୍ୟ ୧ ଟଙ୍କାରୁ କମ୍ ଥିଲା । ଯଦି ଆପଣ ସେହି ସମୟରେ ବିଟକଏନ୍ରେ ଏକ ଟଙ୍କାରୁ କମ୍ ନିବେଶ କରିଥାନ୍ତେ, ତେବେ ଆଜି ଏହାର ମୂଲ୍ୟ ୧ କୋଟିରୁ ଅଧିକ ହୋଇଥାନ୍ତା। ବିଟକଏନର ମୂଲ୍ୟ ପ୍ରଥମେ ଅକ୍ଟୋବର ୨୦୧୦ରେ ବୃଦ୍ଧି ହୋଇଥିଲା ।
ଗୋଟିଏ ବିଟକଏନର ମୂଲ୍ୟ ଦୀର୍ଘ ସମୟ ଧରି ପ୍ରାୟ ୮ ଟଙ୍କାରେ ସ୍ଥିର ରହିବା ପରେ ବୃଦ୍ଧି ପାଇଥିଲା । ବର୍ଷ ଶେଷରେ, ଏହା ୦.୩୦ ଡଲାରରେ ପହଞ୍ଚିଥିଲା । ୨୦୧୩ ସୁଦ୍ଧା ଏହାର ମୂଲ୍ୟ ୧୦୦୦ ଡଲାର ଅତିକ୍ରମ କରିଯାଇଥିଲା । ଭାରତୀୟ ମୁଦ୍ରାରେ ଏହାର ମୂଲ୍ୟ ପ୍ରାୟ ୮୭ ହଜାର ଟଙ୍କା ହୋଇଥିଲା । କିନ୍ତୁ ଏବେ ଏହାର ମୂଲ୍ୟ ଏକ କୋଟି ଟଙ୍କାରୁ ଅଧିକ ହୋଇଯାଇଛି ।
ବିଟକଏନକୁ ଡିଜିଟାଲ ଦୁନିଆର "ସୁନା" କୁହାଯାଏ। ଏହା ଏକ ଡିଜିଟାଲ ମୁଦ୍ରା ଯାହା କୌଣସି ବ୍ୟାଙ୍କ କିମ୍ବା ସରକାରଙ୍କ ନିୟନ୍ତ୍ରଣ ବିନା କାମ କରେ । କୌଣସି ଏକକ କର୍ତ୍ତୃପକ୍ଷଙ୍କ ଏହା ଉପରେ ନିୟନ୍ତ୍ରଣ ନାହିଁ। ବିଟକଏନ ଏକ ଭୌତିକ ମୁଦ୍ରା କିମ୍ବା ନୋଟ୍ ନୁହେଁ, ବରଂ ଏକ ଡିଜିଟାଲ କୋଡ୍ ଯାହା ଆପଣଙ୍କ ଡିଜିଟାଲ ୱାଲେଟରେ ରହିଥାଏ । ଯେପରି ଆପଣ ହ୍ୱାଟସଆପରେ ମେସେଜ ପଠାନ୍ତି, ସେହିପରି ଆପଣ ଇଣ୍ଟରନେଟ୍ ମାଧ୍ୟମରେ ବିଶ୍ୱର ଯେକୌଣସି ସ୍ଥାନକୁ ବିଟକଏନ ପଠାଇପାରିବେ । ଏଗୁଡ଼ିକର ସଂଖ୍ୟା ମଧ୍ୟ ସୀମିତ ।
ବିଟକଏନ ବିଷୟରେ ଏକ ବିଶେଷ କଥା ହେଉଛି, ଏହାର ମୋଟ ସଂଖ୍ୟା ୨୧ ନିୟୁତ । ଏହାଠାରୁ ଅଧିକ ବିଟକଏନ କେବେ ସୃଷ୍ଟି ହେବ ନାହିଁ । ଏହି ନିୟମ ଏହାର ପ୍ରଯୁକ୍ତିବିଦ୍ୟାରେ ପୂର୍ବରୁ ଲେଖାଯାଇଛି । ଯଦି ବିଟକଏନ ଅସୀମିତ ଭାବରେ ସୃଷ୍ଟି କରାଯାଇଥାନ୍ତା, ତେବେ ଯେପରି ଅଧିକ ନୋଟ୍ ଛାପିବା ଦ୍ୱାରା ସାମଗ୍ରୀର ମୂଲ୍ୟ ବୃଦ୍ଧି ପାଇଥାଏ, ସେହିପରି ବିଟକଏନର ମୂଲ୍ୟ ହ୍ରାସ ପାଇଥାନ୍ତା । ଏହି ସୀମିତ ଯୋଗାଣ ଯୋଗୁଁ, ଏହାକୁ "ଡିଜିଟାଲ୍ ସୁନା" କୁହାଯାଏ । କାରଣ ଏହା ବିରଳ ଏବଂ ମୂଲ୍ୟବାନ।
