ନୂଆଦିଲ୍ଲୀ: ସାମରିକ ଉତ୍ତେଜନା ମଧ୍ୟରେ ଭାରତ ଏବଂ ପାକିସ୍ତାନ ମେ ୧୦ ତାରିଖରେ ଯୁଦ୍ଧବିରତି ପାଇଁ ରାଜି ହୋଇଥିଲେ । ଏହି ନିଷ୍ପତ୍ତି ଦୁଇ ଦେଶ ମଧ୍ୟରେ ସହମତିରେ ନିଆଯାଇଥିଲା। ଏବେ ଉଭୟ ଦେଶ ମେ’ ୧୨ରେ ଏହି ପ୍ରସଙ୍ଗରେ ପୁଣି ଥରେ ବୈଠକ କରିବେ । ଅସ୍ତ୍ରବିରତି ପରେ ମଧ୍ୟ ପାକିସ୍ତାନ ଭାରତର ଜାମ୍ମକୁ ଡ୍ରୋନ ପଠାଇଥିଲା । କିନ୍ତୁ ଭାରତର ବାୟୁ ପ୍ରତିରକ୍ଷା ପ୍ରଣାଳୀ ଏହି ସମସ୍ତ ଡ୍ରୋନକୁ ସମ୍ପୂର୍ଣ୍ଣ ଭାବରେ ନଷ୍ଟ କରିଦେଇଥିଲା । ପାକିସ୍ତାନ ମଧ୍ୟ ରାଜସ୍ଥାନର ଅନେକ ସହର ଉପରେ ଡ୍ରୋନ୍ ସାହାଯ୍ୟରେ ଆକ୍ରମଣ କରିବାକୁ ଚେଷ୍ଟା କରିଥିଲା । ଏବେ ବାଡମେର ଜିଲ୍ଲାପାଳ ଟିନା ଡାବି ସତର୍କତା ସ୍ୱରୂପ ବ୍ଲାକଆଉଟ୍ ପାଇଁ ନିର୍ଦ୍ଦେଶ ଦେଇଛନ୍ତି ।
ଜିଲ୍ଲାପାଳ ଟିନା ଡାବି ନିର୍ଦ୍ଦେଶ ଜାରି କରିଛନ୍ତି ଯେ, ବାଡମେରରେ ରାତି ୮ଟାରୁ ସକାଳ ୬ଟା ପର୍ଯ୍ୟନ୍ତ ବିଦ୍ୟୁତ୍ ବନ୍ଦ ରହିବ ଏବଂ ଏହି ସମୟ ମଧ୍ୟରେ ସମସ୍ତ ଲୋକଙ୍କୁ ଘରେ ରହିବାକୁ ଅପିଲ୍ କରିଛନ୍ତି । ଏହା ବ୍ୟତୀତ ବ୍ଲାକଆଉଟ୍ ସମୟରେ ସମସ୍ତ ଲୋକଙ୍କୁ ସେମାନଙ୍କ ଘରର ଲାଇଟ୍ ସମ୍ପୂର୍ଣ୍ଣ ବନ୍ଦ ରଖିବାକୁ ନିର୍ଦ୍ଦେଶ ଦିଆଯାଇଛି ।
ସେପଟେ ଜୈସଲମେର ଜିଲ୍ଲା ପ୍ରଶାସନ ନିର୍ଦ୍ଦେଶ ଦେଇଛି ଯେ, ଆଜି ସନ୍ଧ୍ୟା ୭:୩୦ ରୁ ଆସନ୍ତାକାଲି ସକାଳ ୬ଟା ପର୍ଯ୍ୟନ୍ତ ଜିଲ୍ଲାରେ ବିଦ୍ୟୁତ୍ ସରବରାହ ବନ୍ଦ ରହିବ । ସମସ୍ତେ ନିଜ ଘର ଏବଂ ଘର ଚାରିପାଖରେ ଲାଇଟ୍ ବନ୍ଦ ରଖିବେ ।
ଏପ୍ରିଲ ୨୨ରେ ଭାରତର ପହଲଗାମରେ ୨୬ ଜଣ ନିର୍ଦ୍ଦୋଷ ପର୍ଯ୍ୟଟକଙ୍କୁ ଧର୍ମ ପଚାରି ହତ୍ୟା କରିଥିଲେ ଆତଙ୍କବାଦୀ । ଏହା ପରେ ଭାରତ ଅପରେସନ ସିନ୍ଦୂର ଆରମ୍ଭ କରିଥିଲା ଏବଂ ପାକିସ୍ତାନ ଓ ପିଓକେରେ ଥିବା ୯ଟି ଆତଙ୍କବାଦୀ ଆଡ୍ଡାକୁ ସମ୍ପୂର୍ଣ୍ଣ ଧ୍ୱଂସ କରିଥିଲା। ତା'ପରେ ପାକିସ୍ତାନ ଡ୍ରୋନ୍ ସାହାଯ୍ୟରେ ଆକ୍ରମଣ କରିଥିଲା ଏବଂ ଭାରତୀୟ ସେନାର ତାର ସମସ୍ତ ଯୋଜନାକୁ ପଣ୍ଡ କରିଥିଲା । ଭାରତ ପାକିସ୍ତାନର ଅନେକ ବାୟୁସେନା ଘାଟିକୁ ସମ୍ପୂର୍ଣ୍ଣ ଧ୍ୱଂସ କରିଦେଇଛି ଏବଂ ତାହାକୁ ପ୍ରବଳ କ୍ଷତି ପହଞ୍ଚାଇଛି । ସେନା ପକ୍ଷରୁ ଏକ ପ୍ରେସ୍ ବ୍ରିଫିଂରେ କୁହାଯାଇଛି ଯେ, ୩୫ରୁ ୪୦ ପାକିସ୍ତାନୀ ସୈନିକ ନିହତ ହୋଇଛନ୍ତି।
