ବରଗଡ଼, ୮/୬: ବରଗଡ଼ ଲେଙ୍ଗୁ ମିଶ୍ର ଛକ-ହସ୍ପିଟାଲ ରାସ୍ତା ପାର୍ଶ୍ୱ ଡ୍ରେନ କଡ଼ରୁ ମୃତଦେହ ଉଦ୍ଧାର । ରବିବାର ସକାଳୁ ସ୍ଥାନୀୟ ଜଣେ ଫଳ ଦୋକାନୀଙ୍କ ମୃତଦେହ ଉଦ୍ଧାର ହୋଇଛି । ମୃତକ ଜଣକ ବରଗଡ଼ ବିଶିପଡ଼ା ବାସିନ୍ଦା ୫୫ ବର୍ଷୀୟ ଶଙ୍କର ତାଣ୍ଡି ବୋଲି ଜଣାପଡ଼ିଛି । ଶନିବାର ରାତିରୁ ସେ ନିଖୋଜ ଥିଲେ । ତେବେ ଏ ପର୍ଯ୍ୟନ୍ତ ତାଙ୍କ ମୃତ୍ୟୁର କାରଣ ଜଣାପଡ଼ିନାହିଁ । ମୃତକଙ୍କ ପରିବାର ଘଟଣାସ୍ଥଳରେ ପହଞ୍ଚିଥବା ପରେ ଶଙ୍କରଙ୍କୁ ହତ୍ୟା କରାଯାଇଥିବା ଅଭିଯୋଗ ଆଣିଛନ୍ତି ।
ଅନ୍ୟପଟେ ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବରଗଡ଼ ଡାକ୍ତରଖାନାକୁ ପଠାଇଛି । ଏନେଇ ବିଶେଷ କିଛି ତଥ୍ୟ ମିଳିନଥିଲେ ମଧ୍ୟ ଲଗାତାର ୪ ଦିନରେ ଚାରୋଟି ମର୍ଡର ଘଟଣା ବରଗଡ଼ବାସୀଙ୍କୁ ଦୋହଲାଇ ଦେଇଛି । ଗତ ୫ ତାରିଖରେ ସଦର ଥାନା ଅନ୍ତର୍ଗତ ସରସରର ନାବାଳିକା ଅପହରଣ ଓ ହତ୍ୟା, ୬ ତାରିଖରେ ବୁଡେନ ଥାନା ଅନ୍ତର୍ଗତ ସର୍ଗିପାଲି ହତ୍ୟା, ୭ ତାରିଖରେ ଗ୍ରାମାଞ୍ଚଳ ଥାନା ଅଧିନସ୍ଥ ପାଣ୍ଡ୍ରିପଥରରେ ହତ୍ୟା କାଣ୍ଡ ହୋଇଥିବା ବେଳେ ରବିବାର ଟାଉନ ଥାନା ଅଧୀନରେ ବରଗଡ଼ ସହରରେ ଘଟିଥିବା ହତ୍ୟା ସ୍ଥାନୀୟ ଅଞ୍ଚଳରେ ଆତଙ୍କ ଖେଳାଇ ଦେଇଛି । ବରଗଡ଼ ପୁଲିସର କାର୍ଯ୍ୟଧାରାକୁ ତର୍ଜମାଯୋଗ୍ୟ କରିଦେଇଛି ।
