ଘସିପୁରା, ୧୦/୬ : ୨ ଦିନ ହେଲା ନିଖୋଜ ଥିଲେ। ପୋଖରୀରୁ ଉଦ୍ଧାର ହେଲା ଯୁବକଙ୍କ ମୃତଦେହ। କେନ୍ଦୁଝର ଜିଲ୍ଲା ଘସିପୁରା ଥାନା ବାରିଗାଁରେ ଏହି ଅଘଟଣ ଘଟିଛି। ମୃତକ ଜଣଙ୍କ ହେଉଛନ୍ତି ଗ୍ରାମର କୁନ ବାରିକଙ୍କ ପୁଅ ସନାତନ ବାରିକ।
ସୂଚନା ଅନୁଯାୟୀ, ବାରିଗାଁ ଗ୍ରାମର ସନାତନ ବାରିକ ଗତ ଦୁଇ ଦିନ ହେଲା ନିଖୋଜ ଥିଲେ। ଏନେଇ ଗତକାଲି ଘସିପୁରା ଥାନାରେ ଏକ ଲିଖିତ ଅଭିଯୋଗ ହୋଇଥିଲା। ପରିବାର ଲୋକେ ବହୁ ଖୋଜାଖୋଜି ପରେ ବି ସନାତନଙ୍କ ଖୋଜ ଖବର ମିଳିନଥିଲା। ମଙ୍ଗଳବାର ସକାଳେ ଗ୍ରାମର କିଛି ଯୁବକ ପୋଖରୀରେ ଶବ ଭାସୁଥିବା ଦେଖି ପୁଲିସକୁ ଖବର ଦେଇଥିଲେ। ଘଟଣାସ୍ଥଳରେ ପୁଲିସ ପହଞ୍ଚି ଶବ ଉଦ୍ଧାର କରିବା ସହ ବ୍ୟବଛେଦ ପାଇଁ ଆନନ୍ଦପୁର ମେଡିକାଲକୁ ପଠାଇଛି। ଶବଟି ସନାତନ ବାରିକଙ୍କର ହୋଇଥିବା ଜଣାପଡ଼ିଛି। ଏହି ଖବର ଜଣାପଡ଼ିବା ପରେ ଗ୍ରାମରେ ଶୋକାକୁଳ ପରିବେଶ ସୃଷ୍ଟି ହୋଇଛି।
