ମୁମ୍ବାଇ,୧୦/୦୮: 'ସୋଲେ', ଭାରତୀୟ ସିନେମା ଇତିହାସର ସବୁଠାରୁ ବଡ଼ ଏବଂ ଲୋକପ୍ରିୟ ଚଳଚ୍ଚିତ୍ର । ଯାହା ଆସନ୍ତା ସପ୍ତାହରେ ଏହାର ରିଲିଜକୁ ୫୦ ବର୍ଷ ପୂରଣ ହେବାକୁଯାଉଛି। ରମେଶ ସିପ୍ପିଙ୍କ ଏହି ଫିଲ୍ମ ବର୍ତ୍ତମାନ ସୁଦ୍ଧା ଏପର୍ଯ୍ୟନ୍ତ ନିର୍ମିତ ସର୍ବୋତ୍ତମ ହିନ୍ଦୀ ଚଳଚ୍ଚିତ୍ର ମଧ୍ୟରୁ ଗୋଟିଏ ବୋଲି ବିବେଚନା କରାଯାଏ। ତେବେ ଏହି ଫିଲ୍ମର  ୫୦ ବର୍ଷ ପୂର୍ତ୍ତୀ ଅବସରରେ, ଫିଲ୍ମ ହେରିଟେଜ୍ ଫାଉଣ୍ଡେସନ୍ ଏହି ଚଳଚ୍ଚିତ୍ରକୁ ୪କେ ସଂସ୍କରଣରେ ପୁନଃ ରିଲିଜ୍ କରିବାକୁ ନିଷ୍ପତ୍ତି ନେଇଛି। କିନ୍ତୁ ଏହାର ସ୍କ୍ରିନିଂ ଲିମିଟେଡ୍ ରହିବ ।           

ସୋଲେର ଏହି ସ୍କ୍ରିନିଂ କେବଳ ଟୋରଣ୍ଟୋରେ ହେବ। ଶୁକ୍ରବାର ଦିନ ଫିଲ୍ମ ହେରିଟେଜ୍ ଫାଉଣ୍ଡେସନ୍ ସୋସିଆଲ ମିଡିଆରେ ସୋଲେର ରିଷ୍ଟୋର୍ଡ ସଂସ୍କରଣ ନର୍ଥ ଆମେରିକାରେ ପ୍ରିମିୟରର ଘୋଷଣା କରିଛି। ଫିଲ୍ମର ଏକ ପୋଷ୍ଟର ସେୟାର କରି ସେମାନେ ଲେଖିଛନ୍ତି,'ରମେଶ ସିପ୍ପିଙ୍କ ନିର୍ଦ୍ଦେଶିତ 'ସୋଲେ' (୧୯୭୫), ଟିଆଇଏଫଏଫ ଟୋରଣ୍ଟୋ ଅନ୍ତର୍ଜାତୀୟ ଚଳଚ୍ଚିତ୍ର ମହୋତ୍ସବରେ ରିଷ୍ଟୋର୍ଡ ସଂସ୍କରଣର ନର୍ଥ ଆମେରିକୀୟ ପ୍ରିମିୟର ସହିତ ୫୦ ବର୍ଷ ପାଳନ କରିବ। 'ସୋଲେ'ର ଏକ ସ୍ୱତନ୍ତ୍ର ସ୍କ୍ରିନିଂ ୧୮୦୦ ସିଟ୍ ବିଶିଷ୍ଟ ରୟ ଥମସନ୍ ହଲରେ ସେପ୍ଟେମ୍ବର ୬,୨୦୨୫ରେ ହେବ।

ଏହି ପୋଷ୍ଟର କମେଣ୍ଟରେ ଭାରତୀୟ ଫ୍ୟାନ୍ସ କ୍ରୋଧିତ ହୋଇଥିବା ନଜର ଆସିଛନ୍ତି। ସେମାନଙ୍କ ମଧ୍ୟରୁ ଅଧିକାଂଶ ସମାନ ପ୍ରଶ୍ନ ପଚାରିଛନ୍ତି ଯେ -ଏହା ଭାରତରେ କେବେ ମୁକ୍ତିଲାଭ କରୁଛି ? ୧୫ ଅଗଷ୍ଟରେ ସୋଲେ ଏହାର ମୁକ୍ତିଲାଭକୁ ୫୦ ବର୍ଷ ପୂରଣ କରୁଛି ଏବଂ ଏପର୍ଯ୍ୟନ୍ତ ନିର୍ମାତା କିମ୍ବା FFI ଚଳଚ୍ଚିତ୍ରର ଏହି ସଂସ୍କରଣକୁ ଥିଏଟରରେ ପୁନଃ ମୁକ୍ତିଲାଭ କରିବା ପାଇଁ କୌଣସି ନିର୍ଦ୍ଦେଶ ଦେଇନାହାଁନ୍ତି । ୨୦୦୫ ମସିହାରେ ଯେତେବେଳେ ସୋଲେ ୩୦ବର୍ଷ ପୂରଣ କରିଥିଲା, ସେତେବେଳେ ୭୦ମିମି ରିଷ୍ଟୋର ସଂସ୍କରଣ ଥିଏଟରରେ ରି-ରିଲିଜ ହୋଇଥିଲା ଏବଂ ଏହା ବକ୍ସ ଅଫିସରେ ବହୁତ ଭଲ ପ୍ରଦର୍ଶନ କରିଥିଲା।'ସୋଲେ'ରେ ଅମିତାଭ ବଚ୍ଚନ,ଧର୍ମେନ୍ଦ୍ର,ସଞ୍ଜୀବ କୁମାର,ଅମଜାଦ ଖାନ,ଜୟା ବଚ୍ଚନ ଏବଂ ହେମା ମାଳିନୀ ପ୍ରମୁଖ ଭୂମିକାରେ ଅଭିନୟ କରିଥିଲେ। ୧୯୭୫ ମସିହାରେ ମୁକ୍ତିଲାଭ କରିବା ପରେ ଏହି ଚଳଚ୍ଚିତ୍ରଟି ସମସ୍ତ ବକ୍ସ ଅଫିସ୍ ରେକର୍ଡ ଭାଙ୍ଗି ସର୍ବାଧିକ ଆୟକାରୀ ଭାରତୀୟ ଚଳଚ୍ଚିତ୍ର ହୋଇଥିଲା।