କବାଟବନ୍ଧ, ୧୦/୦୬ : ଯାଜପୁର ଜିଲ୍ଲା ଜେନାପୁର ଥାନା କବାଟବନ୍ଧ ନିକଟସ୍ଥ ବ୍ରାହ୍ମଣୀ ବ୍ରିଜ୍ ଉପରେ ବୋମା ବିସ୍ଫୋରଣ। ଏକ ବାଇକ୍ ଦୁର୍ଘଟଣାର ଶିକାର ହେବାରୁ ବାଇକ୍ ଆରୋହୀଙ୍କ ନିକଟରେ ଥିବା ଅଫୁଟା ବୋମା ବିସ୍ଫୋରଣ ହୋଇଥିଲା। ବୋମା ସେତେ ଶକ୍ତିଶାଳୀ ହୋଇନଥିବା ବେଳେ ଚାରିଆଡ଼େ ଧୂଆଁ ବ୍ୟାପିଯାଇଥିଲା। ପରିସ୍ଥିତି ଅଣାୟତ୍ତ ହେବା ଅନୁଭବ କରି ବାଇକ୍ ଆରୋହୀ ଘଟଣାସ୍ଥଳରୁ ଚମ୍ପଟ ମାରିଥିଲେ। ବ୍ରିଜ୍ ଉପରେ ବିଭିନ୍ନ ମାରଣାସ୍ତ୍ର ଛାଡ଼ି ଫେରାର୍ ହୋଇଯାଇଥିଲେ। ଘଟଣାସ୍ଥଳରେ ପୁଲିସ ପହଞ୍ଚି ତଦନ୍ତ ଆରମ୍ଭ କରିଛି।
ସୂଚନାନୁଯାୟୀ, ମଙ୍ଗଳବାର ପୂର୍ବାହ୍ନରେ ଚଣ୍ଡିଖୋଲରୁ ଡୁବୁରୀ ଆଡେ ଏକ ବାଇକ୍ ଯୋଗେ ୩ଜଣ ଯୁବକ ଦ୍ରୁତ ଗତିରେ ଯାଉଥିଲେ। ବାଇକ୍ଟି ବ୍ରାହ୍ମଣୀ ବ୍ରିଜ ଉପରେ ଥିବା ଏକ ହମ୍ସରେ ଭରସାମ୍ୟ ହରାଇଥିଲା। ଫଳରେ ଗାଡିରୁ ୩ଜଣ ଯୁବକ ତଳେ ଛିଟିକି ପଡ଼ିଥିଲେ। ତାଙ୍କ ପାଖରେ ଥିବା ହାତ ବୋମା ଫୁଟି ଧୂଆଁ ବ୍ୟାପି ଯାଇଥିଲା। ସ୍ଥାନୀୟ ଲୋକେ ଏକାଠି ହେବା ଦେଖି ଯୁବକମାନେ ଚମ୍ପଟ୍ ମାରିଥିଲେ। ଘଟଣାସ୍ଥଳରେ କଟୁରୀ ଓ ବନ୍ଧୁକ ଛାଡ଼ି ଚାଲିଯାଇଥିଲେ। ଖବର ପାଇ ଜେନାପୁର ପୁଲିସ ଘଟଣାସ୍ଥଳରେ ପହଞ୍ଚି ମାରଣାସ୍ତ୍ର ଗୁଡ଼ିକୁ ଜବତ କରିଛି । ବନ୍ଧୁକ ଦୁଇଟି ନକଲି ବୋଲି ଜଣାପଡ଼ିଛି ।
