ବଣାଇଁ,୩୧/୦୧: ଭୁବନେଶ୍ୱରରୁ ବାଲେଶ୍ୱର । ଯାଜପୁରରୁ ସୁନ୍ଦରଗଡ଼ । ସବୁଠି କୋଠାବାଡ଼ି, ଫ୍ଲାଟ, ଜମି । ସୁନ୍ଦରଗଡ଼ ଜିଲ୍ଲା ବଣାଇଁ ସମନ୍ୱିତ ଆଦିବାସୀ ଉନ୍ନୟନ ସଂସ୍ଥା (ଆଇଟିଡିଏ)ର ପ୍ରକଳ୍ପ ପ୍ରଶାସକ (ପିଏ) ବିଶ୍ୱଦର୍ଶୀ ସାହୁଙ୍କ ଅଚଳାଚଳ ସମ୍ପତ୍ତି ଦେଖି ଟେରା ହୋଇଛି ଭିଜିଲାନ୍ସ ଆଖି । ଆୟବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଶ୍ରୀ ସାହୁଙ୍କ ୭ ଠିକଣାରେ ଗୁରୁବାର ଚଢ଼ଉ ହୋଇଥିଲା । ଏହି ସମୟରେ ୧୦ କୋଟିରୁ ଅଧିକ ଟଙ୍କାର ସମ୍ପତ୍ତି ଠାବ ହୋଇଛି । ଭିଜିଲାନ୍ସ ଅଧିକାରୀମାନେ ତାଙ୍କୁ ଅଟକ ରଖିଛନ୍ତି । ଶୁକ୍ରବାର ଗିରଫ ପରେ କୋର୍ଟ ଚାଲାଣ କରାଯିବ ବୋଲି ସୂଚନା ମିଳିଛି।
ପୁରୁଣା ଭୁବନେଶ୍ୱର ଶ୍ରୀରାମ ନଗରରୁ ୩୬୦୦ ବର୍ଗଫୁଟ୍ର ବହୁତଳ କୋଠା, ଲକ୍ଷ୍ମୀସାଗରସ୍ଥିତ ଭଗବାନ୍ ଟାୱାର ତୃତୀୟ ମହଲାରେ ୧୫୦୦ ବର୍ଗଫୁଟ୍ର ଫ୍ଲାଟ୍ ନଂ. ୩୦୪, ୟୁନିଟ୍-୩ ଖାରବେଳନଗର ଇଭୋସ୍ ଗ୍ୟାଲେକ୍ସିର ଚତୁର୍ଥ ମହଲାରେ ଫ୍ଲାଟ ନଂ.୪୦୨, ବାଲେଶ୍ୱର ଏନ୍ଏନ୍ ସେନ୍ ରୋଡ୍ସ୍ଥିତ ସୁକୁମାର ନାୟକ ଆପାର୍ଟମେଣ୍ଟରେ ଫ୍ଲାଟ୍ ନଂ.୩୦୨ ଠାବ ହୋଇଛି । ଇଭୋସ୍ ଗ୍ୟାଲେକ୍ସିର ଚତୁର୍ଥ ମହଲାରେ ଫ୍ଲାଟ କିଣିବା ନିମନ୍ତେ ଶ୍ରୀ ସାହୁ ୮୨ ଲକ୍ଷ ଟଙ୍କା ଅଗ୍ରୀମ ଦେଇଛନ୍ତି ।
ସେହିପରି ଯାଜପୁରରେ ସମ୍ପର୍କୀୟଙ୍କ ଘର, ବଣାଇଁସ୍ଥିତ ସରକାରୀ କ୍ୱାର୍ଟର୍ସ ଓ କାର୍ଯ୍ୟାଳୟରେ ଚଢ଼ଉ କରି ଭିଜିଲାନ୍ସ ଗୁରୁତ୍ୱପୂର୍ଣ୍ଣ କାଗଜପତ୍ର ଜବତ କରିଛି । ଭୁବନେଶ୍ୱର ଓ ପୁରୀରେ ଶ୍ରୀ ସାହୁଙ୍କ ୯ଟି ପ୍ଲଟ୍ ଠାବ ହୋଇଛି । ୧୫୦ ଗ୍ରାମ୍ ସୁନା, ନଗଦ ୪ ଲକ୍ଷ ୫୧ ହଜାର ଟଙ୍କା, ଏକ ଦାମୀ କାର୍, ୪ ବାଇକ୍ ମିଳିଛି । ଗାଡ଼ି ଏବଂ ଗୃହପୋକରଣର ମୂଲ୍ୟ ୨୧ ଲକ୍ଷ ୧୪ ହଜାର ଟଙ୍କା ହେବ । ବ୍ୟାଙ୍କ ଓ ବୀମା ଜମା ବାବଦ ୬୧ ଲକ୍ଷ ୪୨ ହଜାର ଟଙ୍କା ଠାବ ହୋଇଛି । ଶ୍ରୀ ସାହୁଙ୍କ ସ୍ତ୍ରୀଙ୍କ ନାମରେ ଭୁବନେଶ୍ୱର ବାପୁଜୀନଗର ଷ୍ଟେଟ୍ ବ୍ୟାଙ୍କରେ ଏକ ଲକର ରହିଛି । ଶ୍ରୀ ସାହୁ କହିଛନ୍ତି, ପରିବାରର ଅନେକ ସଦସ୍ୟ ଚାକିରିଆ । ବ୍ୟବସାୟ ମଧ୍ୟ କରୁଛନ୍ତି ।
