ନୂଆଦିଲ୍ଲୀ: ବ୍ରାଜିଲର ରାଷ୍ଟ୍ରପତି ଲୁଲା ଦା ସିଲଭାଙ୍କ ପତ୍ନୀ ଏବଂ ଦେଶର ପ୍ରଥମ ମହିଳା ଜାନଜା ଲୁଲା ଦା ସିଲଭା ଟେସଲା ମାଲିକ ଏଲନ ମସ୍କଙ୍କ ଉପରେ ବିବାଦୀୟ ମନ୍ତବ୍ୟ ଦେଇଛନ୍ତି । ଶନିବାର ଜି-୨୦ର ଏକ ସାମାଜିକ କାର୍ଯ୍ୟକ୍ରମ ସମୟରେ ଦୁନିଆର ସବୁଠାରୁ ଧନୀ ବ୍ୟକ୍ତି ଏଲନ ମସ୍କଙ୍କୁ ସେ ଗାଳିଗୁଲଜ କରିଥିବା କୁହାଯାଉଛି । ଜାନଜା ସୋସିଆଲ ମିଡିଆ ଉପରେ ନିୟନ୍ତ୍ରଣ ଆଣିବା ଏବଂ ଭୁଲ ସୂଚନା ପ୍ରସାରଣ ଉପରେ ରୋକ ଲଗାଇବା ସଂପର୍କରେ କହୁଥିବା ବେଳେ ମସ୍କଙ୍କ ଉପରେ ବିବାଦୀୟ ଟିପ୍ପଣୀ କରିଛନ୍ତି ।
କାର୍ଯ୍ୟକ୍ରମରେ ସେ କହୁଥିବା ବେଳେ ହଠାତ ଜାହାଜର ହର୍ଣ୍ଣ ବାଜି ଉଠିଥିଲା । ଏହା ଶୁଣି ସେ ଥଟ୍ଟା କରି କହିଥିଲେ, ମୋତେ ଲାଗୁଛି ଇଏ ଏଲନ ମସ୍କ । ସେ ଆହୁରି କହିଥିଲେ, ମୁଁ ତୁମକୁ (ଏଲନ ମସ୍କଙ୍କ) ଭୟ କରେ ନାହିଁ । ଏହା ସହ ଜାନଜା ଲୁଲା ଦା ସିଲଭା ଟେସଲା ମାଲିକଙ୍କ ସଂପର୍କରେ ଅପଶବ୍ଦ ବ୍ୟବହାର କରିଥିଲେ । ସେପଟେ ଜାନଜା ଲୁଲା ଦା ସିଲଭାଙ୍କ ଏକ ଭିଡିଓ ପୋଷ୍ଟ ଉପରେ ଏଲନ ମସ୍କ ହସୁଥିବା ଗ୍ରାଫିକ ଇମୋଜୀ ପ୍ରତିକ୍ରିୟାରେ ଦେଇଛନ୍ତି । ଅନ୍ୟ ଏକ ପୋଷ୍ଟରେ ରାଷ୍ଟ୍ରପତି ଲୁଲା ଦା ସିଲଭାଙ୍କୁ ଇଙ୍ଗିତ କରି ଏଲନ ମସ୍କ ଲେଖିଛନ୍ତି, ‘ସେମାନେ ଆଗାମୀ ନିର୍ବାଚନରେ ପରାସ୍ତ ହେବାକୁ ଯାଉଛନ୍ତି ।’
ସୂଚନାଯୋଗ୍ୟ, ଚଳିତ ମାସ ମସ୍କଙ୍କ ସୋସିଆଲ ମେସେଜିଂ ନେଟଓ୍ବର୍କ ଏକ୍ସ ଉପରେ ବ୍ରାଜିଲ୍ରେ ପ୍ରତିବନ୍ଧକ ଲଗାଯାଇଛି । ଭୁଲ ଖବର ପ୍ରସାର କରୁଥିବା କେତେକ ଆକାଉଣ୍ଟକୁ ବନ୍ଦ କରିବାକୁ ନେଇ କୋର୍ଟଙ୍କ ଅର୍ଡରକୁ ଅବମାନନା କରିଥିବାରୁ ଏକ୍ସ ବିରୋଧରେ କାର୍ଯ୍ୟାନୁଷ୍ଠାନ ନେଇଛନ୍ତି ବ୍ରାଜିଲ ସରକାର । ଗତ ବର୍ଷ ବ୍ରାଜିଲର ଫାଷ୍ଟ ଲେଡି ଜାନଜାଙ୍କ ସୋସିଆଲ ମିଡିଆ ଆକାଉଣ୍ଟକୁ ହ୍ୟାକ କରାଯାଇଥିଲା, ଯେଉଁଥିପାଇଁ ସେ ସୋସିଆଲ ମିଡିଆ କମ୍ପାନି ଏକ୍ସ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ପାଇଁ ଧମକ ଦେଇଥିଲେ।
