ନୂଆଦିଲ୍ଲୀ,୦୯ /୦୭: ଗୁଜରାଟର ଭଦୋଦରାରେ ଏକ ବଡ଼ ଅଘଟଣ ଘଟିଛି । ଭଦୋଦରା ଓ ଆନନ୍ଦକୁ ଯୋଡୁଥିବା ଏକ ବ୍ରିଜ୍ ହଠାତ୍ ଭୁଶୁଡ଼ିଛି । ଦୁଇ ଖଣ୍ଡ ହୋଇଛି ମହିସାନଗର ନଦୀ ଉପରେ ଥିବା ପୋଲ । ଏଥିରେ ଅନେକ ଗାଡ଼ି ନଦୀକୁ ଖସି ପଡିଛି । ଫଳରେ ୯ ଜଣଙ୍କର ମୃତ୍ୟୁ ହୋଇଛି । ଗୁରୁତର ୧୦ ଜଣଙ୍କୁ ଉଦ୍ଧାର କାରଯାଇ ହସ୍ପିଟାଲରେ ଭର୍ତ୍ତି କରାଯାଇଛି । ନଦୀରେ କାର୍ ଓ ଟ୍ରକ୍ ପଡି ରହିଛି ।
ମହିସାଗର ନଦୀ ଉପରେ ଏହି ପୋଲ ୪୩ ବର୍ଷ ପୁରୁଣା । ସମୟ ପାଖାପାଖି ୮ଟା ୩୦ ମିନିଟ୍ରେ ହଠାତ୍ ପୋଲଟି ଭୁଶୁଡିଥିଲା । ଭଦୋଦାର କଲେକ୍ଟର ଅନୀଲ ଧମେଲିଆଙ୍କ ପକ୍ଷରୁ ମିଳିଥିବା ସୂଚନା ଅନୁସାରେ ଅଘଟଣରେ ୯ଜଣଙ୍କର ମୃତ୍ୟୁ ହୋଇଛି । ୧୦ ଜଣ ଆହତ ହୋଇଛନ୍ତି । ଆହତଙ୍କୁ ଭଦୋଦରା ଏସଏସଜି ହସ୍ପିଟାଲରେ ଭର୍ତ୍ତି କରାଯାଇଛି । ଉଦ୍ଧାରକାର୍ଯ୍ୟ ଏବେ ବି ଜାରି ରହିଛି । ପୋଲଟି ୪୩ ବର୍ଷ ପୁରୁଣା ହୋଇଥିବାରୁ ଏହାର ରକ୍ଷଣାବେକ୍ଷଣ ଅଭାବରୁ ଅଘଟଣ ଘଟିଥିବା ଅନୁମାନ କରାଯାଉଛି ।
ଘଟଣାସ୍ଥଳରେ ପହଞ୍ଚିଲା ପ୍ରଶାସନ- ଏହି ସେତୁକୁ ପାଦରା-ଗମ୍ଭୀରା ସେତୁ ମଧ୍ୟ କୁହାଯାଏ । ବ୍ରିଜ୍ ଭୁଶୁଡ଼ିବା ସୂଚନା ପାଇବା ମାତ୍ରେ ମୁଜପୁର ଗାଁର ଲୋକମାନେ ଉଦ୍ଧାର କାର୍ଯ୍ୟ ପାଇଁ ଘଟଣାସ୍ଥଳରେ ପହଞ୍ଚିଥିଲେ। ଏହା ପରେ ମାହି ନଦୀରେ ଖସି ପଡ଼ିଥିବା ଗାଡ଼ି ମଧ୍ୟରୁ ୩ ଜଣଙ୍କୁ ଉଦ୍ଧାର କରାଯାଇଥିଲା। ଘଟଣାରେ ମୃତ୍ୟୁସଂଖ୍ୟା ୯ରେ ପହଞ୍ଚିଛି । ପ୍ରଶାସନିକ ଟିମ୍ ଘଟଣାସ୍ଥଳରେ ଉପସ୍ଥିତ ଅଛନ୍ତି । ନଦୀରେ ପଡ଼ିଥିବା ଗାଡ଼ିଗୁଡ଼ିକୁ ବାହାର କରିବା କାମ ଆରମ୍ଭ ହୋଇଛି ।
ମୁଖ୍ୟମନ୍ତ୍ରୀ ଭୂପେନ୍ଦ୍ର ପଟେଲ ଘଟଣାକୁ ନେଇ ଦୁଃଖ ପ୍ରକଶ କରିଛନ୍ତି । ତୁରନ୍ତ ପୋଲ ଡିଜାଇନ୍ ଟିମ୍, ମୁଖ୍ୟ ଇଞ୍ଜିନିୟକର ଏବଂ ବିଶେଷଜ୍ଞ ଟିମ୍ଙ୍କୁ ଘଟଣାସ୍ଥଳରେ ପହଞ୍ଚିବାକୁ ନିର୍ଦ୍ଦେଶ ଦେଇଛନ୍ତି । ଏହା ସହିତ ଘଟଣାର ବିସୃତ ରିପୋର୍ଟ ମାଗିଛନ୍ତି ମୁଖ୍ୟମନ୍ତ୍ରୀ । କୁହାଯାଉଛି କି, ଗତବର୍ଷ ପୋଲ ମରାମତି ହୋଇଥିଲା । ବ୍ରିଜ ଉପରେ ଯାନବାହନ ଚଳାଚଳ ବଢୁଥିବାରୁ ରାଜ୍ୟ ସରକାର ୩ ମାସ ତଳେ ୨୧୨ କୋଟି ଟଙ୍କା ବ୍ୟୟରେ ଆଉ ଏକ ନୂଆ ପୋଲ ନିର୍ମାଣକୁ ମଞ୍ଜୁରୀ ଦେଇଥିଲେ । ଏହି ନୂଆ ପୋଲର ଡିଜାଇନ ଏବଂ ଟେଣ୍ଡରିଂ ପ୍ରକ୍ରିୟା ବି ଆରମ୍ଭ ହୋଇଥିଲା ।
