ନୂଆଦିଲ୍ଲୀ: ନାବାଳିକା କୁସ୍ତିଯୋଦ୍ଧା ଯୌନ ନିର୍ଯାତନା ଅଭିଯୋଗରେ ଛନ୍ଦି ହୋଇଥିବା ବ୍ରିଜଭୂଷଣ ଶରଣ ସିଂହଙ୍କୁ ଦିଲ୍ଲୀ ପଟିୟାଲା ହାଉସ୍ କୋର୍ଟ ଆଶ୍ୱସ୍ତି ଦେଇଛନ୍ତି । ସୋମବାର କୋର୍ଟ ଦିଲ୍ଲୀ ପୋଲିସର କ୍ଲୋଜର୍ ରିପୋର୍ଟକୁ ସ୍ୱୀକାର କରିଛନ୍ତି । ଏଥିରେ କୁସ୍ତିଯୋଦ୍ଧାଙ୍କ ଦ୍ୱାରା ମାମଲାକୁ ରଦ୍ଦ କରିବା ପାଇଁ ଦାବି କରାଯାଇଥିଲା । ଏହି ରିପୋର୍ଟରେ ଭାରତୀୟ କୁସ୍ତି ମହାସଂଘର ପୂର୍ବତନ ମୁଖ୍ୟ ବ୍ରିଜଭୂଷଣ ଶରଣ ସିଂହଙ୍କ ବିରୋଧରେ ନାବାଳିକା କୁସ୍ତିଯୋଦ୍ଧା ଯୌନ ଉତ୍ପୀଡ଼ନ ଅଭିଯୋଗ କରିଥିଲେ । ତେବେ ପୂର୍ବତନ ସାଂସଦ ଲଗାତାର ଏହି ଅଭିଯୋଗକୁ ଖଣ୍ଡନ କରିଆସିଥିଲେ ।
ବ୍ରିଜଭୂଷଣଙ୍କ ମାମଲାରେ ରାୟ ଶୁଣାଇ ଅତିରିକ୍ତ ସେସନ୍ ଜଜ୍ ଗୋମତୀ ମନୋଚା କହିଛନ୍ତି, 'ରଦ୍ଦ ଆବେଦନକୁ ସ୍ୱୀକାର କରାଯାଇଛି ।' ଉଲ୍ଲେଖଯୋଗ୍ୟ ଯେ ୨୦୨୩ ଅଗଷ୍ଟ ୧ରେ ଆୟୋଜିତ ଇନ୍-ଚାମ୍ୱର ଶୁଣାଣି ବେଳେ ଜଜଙ୍କୁ ନାବାଳିକା ଜଣଙ୍କ କହିଥିଲା ଯେ, ଏହି ମାମଲାରେ ଦିଲ୍ଲୀ ପୋଲିସର ତଦନ୍ତରେ ସନ୍ତୁଷ୍ଟ ଅଛି ଓ କ୍ଲୋଜର୍ ରିପୋର୍ଟର ବିରୋଧ କରୁ ନାହିଁ ।
ଦିଲ୍ଲୀ ପୋଲିସ ୨୦୨୩ ଜୁନ୍ ୧୫ରେ ନାବାଳିକା ସହ ଜଡ଼ିତ ମାମଲାକୁ ରଦ୍ଦ କରିବା ରିପୋର୍ଟ ଦାଖଲ କରିଥିଲା । ବ୍ରିଜଭୂଷଣ ଶରଣ ସିଂହଙ୍କ ବିରୋଧରେ ପୋକ୍ସୋ ଅଧିନିୟମରେ ମାମଲା ଫେରାଇ ନେବା ପାଇଁ ପୋଲିସ ସୁପାରିଶ କରିଥିଲା, କିନ୍ତୁ ଛଅ ମହିଳା କୁସ୍ତିଯୋଦ୍ଧା ଦ୍ୱାରା ରୁଜୁ ଏକ ଅଲଗା ମାମଲାରେ ତାଙ୍କ ଉପରେ ଯୌନ ଉତ୍ପୀଡ଼ନ ଓ ପିଛା କରିବା ଅଭିଯୋଗ କରାଯାଇଥିଲା । ନାବାଳିକା କୁସ୍ତିଯୋଦ୍ଧାଙ୍କ ସହ ଜଡ଼ିତ ମାମଲାରେ କୌଣସି ପ୍ରମାଣ ମିଳିନଥିବା କହି ଏହାକୁ ରଦ୍ଦ ପାଇଁ ପୋଲିସ ସୁପାରିଶ କରିଥିଲା ।
ସୂଚନାଯୋଗ୍ୟ, ଅଲିମ୍ପିଆନ୍ ଭିନେଶ ଫୋଗଟ, ବଜରଙ୍ଗ ପୁନିଆ ଏବଂ ସାକ୍ଷୀ ମାଲିକ ବ୍ରିଜଭୂଷଣଙ୍କ ଉପରେ କନିଷ୍ଠ କୁସ୍ତିଯୋଦ୍ଧାମାନଙ୍କୁ ଯୌନ ନିର୍ଯାତନା ଦେବାର ଅଭିଯୋଗ ଆଣି ଜନ୍ତର ମନ୍ତରରେ ଦୀର୍ଘ ଦିନ ଧରି ପ୍ରତିବାଦ କରିଥିଲେ। ଏହି ମାମଲାରେ ଏକ ଏଫଆଇଆର ରୁଜୁ ହୋଇଥିଲା ଏବଂ ପୂର୍ବତନ ବିଜେପି ସାଂସଦ ଏହି ମାମଲାରେ ବିଚାରର ସମ୍ମୁଖୀନ ହେଉଥିଲେ। ବ୍ରିଜଭୂଷଣ ସବୁବେଳେ ଏହି ଅଭିଯୋଗକୁ ଖଣ୍ଡନ କରିଆସିଥିଲେ।
