ଖଲ୍ଲିକୋଟ ,୭।୧ : ଧାନ ପେଡୁଥିବା ବେଳେ ଅଘଟଣ। ସର୍ଟ ସର୍କିଟରୁ ନିଆଁ ଲାଗି ଧାନ ପେଡା ମେସିନ, ଟ୍ରାକ୍ଟର ସହିତ ଜଳିଗଲା ପ୍ରାୟ ୭୦ ବସ୍ତା ଧାନ।ଗତ କିଛି ଦିନ ତଳେ ଲଗାଣ ବର୍ଷାରୁ ଯାହା ବଞ୍ଚିଥିଲା ଏବେ ନିଆଁ ଲାଗି ସମ୍ପୂର୍ଣ୍ଣ ଧାନ ପୋଡି ଯାଇଛି।
ଖଲ୍ଲିକୋଟ ବ୍ଲକ ଅନ୍ତର୍ଗତ ଆଇତିପୁର ପଂଚାୟତର ବଡ଼କ୍ଷେତା ବିରକୃଷ୍ଣ ଶରଣପୁର ଗ୍ରାମର ଗୌରୀ କୁମାର ମିଶ୍ର ଓ ପୁଅ ମନୋରଞ୍ଜନ ମିଶ୍ର ନିଜର ପ୍ରାୟ ୨୦ ଭରଣ ଜମିରେ ଧାନ ଚାଷ କରିଥିଲେ। ଆଜି ଟ୍ରାକ୍ଟର ଯୋଗେ ଧାନ ପେଡା ମେସିନକୁ ବିଲ ମଧ୍ୟକୁ ଆଣି ଧାନ ପେଡୁଥିଲେ। ତେବେ ଧାନ ପେଡୁଥିବା ସମୟରେ ହଠାତ ମେସିନରେ ନିଆଁ ଲାଗି ଯାଇଥିଲା। ଚାହୁଁ ଚାହୁଁ ନିଆଁ ହୁତ ହୁତୁ ଜଳି ଚାରିଆଡେ ବ୍ୟାପି ଯାଇଥିଲା। ଧାନ ପେଡା ମେସିନ, ଟ୍ରାକ୍ଟର ସହିତ ଧାନ ଗଦା ଜଳି ଯାଇଥିଲା। ପ୍ରାୟ ୭୦ ବସ୍ତା ଧାନ ଜଳି ପୋଡି ସମ୍ପୂର୍ଣ୍ଣ ନଷ୍ଟ ହୋଇ ଯାଇଥିବା ଗୌରୀ କୁମାର ମିଶ୍ର କହିଛନ୍ତି। ଖବର ପାଇ ଗ୍ରାମବାସୀ ପହଞ୍ଚି ପାଣି ପକାଇ ନିଆଁ ଲିଭାଇବାକୁ ଚେଷ୍ଟା କରିଥିଲେ। ପରେ ଖଲ୍ଲିକୋଟ ଅଗ୍ନିଶମ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲେ।
