ମୁମ୍ବାଇ: IPL 2025 ପୂର୍ବରୁ ଅନେକ ନିୟମ ପରିବର୍ତ୍ତନ ହୋଇଛି । ବିସିସିଆଇ ବଲ୍ରେ ଲାଳ ଲଗାଇବା ଉପରେ ଲାଗିଥିବା ପ୍ରତିବନ୍ଧକକୁ ଉଠାଇ ଦେଇଛି । ଏହା ସହିତ, ଅନ୍ୟାନ୍ୟ ନିୟମ ମଧ୍ୟ ପରିବର୍ତ୍ତନ ହୋଇଛି । ସ୍ଲୋ ଓଭର ରେଟ୍ ନିୟମକୁ ନେଇ ବଡ଼ ଅପଡେଟ୍ ସାମ୍ନାକୁ ଆସିଛି । ଏକ ରିପୋର୍ଟ ଅନୁଯାୟୀ, ଏବେ କୌଣସି ଅଧିନାୟକଙ୍କୁ ସ୍ଲୋ ଓଭର ରେଟ୍ ଯୋଗୁଁ ବାସନ୍ଦ କରାଯିବ ନାହିଁ । ଏଥିପାଇଁ ଅଲଗା ଦଣ୍ଡ ବ୍ୟବସ୍ଥା କରାଯାଇଛି ।
ଗତ ସିଜିନ୍ର ଶେଷ ମ୍ୟାଚ୍ରେ ସ୍ଲୋ ଓଭର ରେଟ୍ ଲାଗି ମୁମ୍ବାଇ ଇଣ୍ଡିଆନ୍ସର ଅଧିନାୟକ ହାର୍ଦ୍ଦିକ ପାଣ୍ଡ୍ୟାଙ୍କୁ ଗୋଟିଏ ମ୍ୟାଚ୍ ପାଇଁ ବାସନ୍ଦ କରାଯାଇଛି । ଏହି କାରଣରୁ ପାଣ୍ଡ୍ୟା IPL 2025ର ପ୍ରଥମ ମ୍ୟାଚ୍ ଖେଳିପାରିବେ ନାହିଁ ।
ପାଣ୍ଡ୍ୟାଙ୍କ ଅଧିନାୟକତ୍ୱରେ ମୁମ୍ବାଇ ଇଣ୍ଡିଆନ୍ସ ସ୍ଲୋ ଓଭର ରେଟ୍ ସମ୍ବନ୍ଧୀୟ ନିୟମ ଉଲ୍ଲଂଘନ କରିଥିଲା। କିନ୍ତୁ ଏବେ କୌଣସି ଅଧିନାୟକଙ୍କୁ ଏଥିପାଇଁ ମ୍ୟାଚରୁ ବାସନ୍ଦ କରାଯିବ ନାହିଁ । କ୍ରିକବଜର ଏକ ରିପୋର୍ଟ ଅନୁଯାୟୀ, ବିସିସିଆଇ ସ୍ଲୋ ଓଭର ରେଟ୍ ପାଇଁ ନିୟମ ପରିବର୍ତ୍ତନ କରିଛି । ଏବେ ଜଣେ ଅଧିନାୟକଙ୍କୁ ମ୍ୟାଚ୍ରୁ ବାସନ୍ଦ କରିବା ପରିବର୍ତ୍ତେ ତାଙ୍କ ଆକାଉଣ୍ଟରେ ଡିମେରିଟ୍ ପଏଣ୍ଟ ଯୋଡାଯିବ ।
ଲେବଲ୍ ୧ରେ ଭୁଲ କଲେ ଅଧିନାୟକଙ୍କୁ ଡିମେରିଟ୍ ପଏଣ୍ଟ ସହିତ ତାଙ୍କ ମ୍ୟାଚ୍ ଫି’ର ୨୫ ରୁ ୭୫ ପ୍ରତିଶତ ଜରିମାନା କରାଯିବ । ଲେବଲ୍ ୨ ଲାଗି ୪ ଡିମେରିଟ୍ ପଏଣ୍ଟ ଯୋଡାଯିବ । ଅଧିନାୟକ ୪ ଡିମେରିଟ୍ ପଏଣ୍ଟ ପାଇବା ପରେ, ତାଙ୍କୁ ତାଙ୍କ ମ୍ୟାଚ୍ ଫି’ର ୧୦୦ ପ୍ରତିଶତ ଜରିମାନା ଦେବାକୁ ପଡ଼ିପାରେ । ବିସିସିଆଇ ଅନେକ ନିୟମର ପରିବର୍ତ୍ତନ କରିଥିଲେ ସୁଦ୍ଧା ଇମ୍ପାକ୍ଟ ପ୍ଲେୟାର ନିୟମ ଲାଗୁ ହେବ। ଦଳଗୁଡ଼ିକ ଏହାକୁ ବ୍ୟବହାର କରିପାରିବେ ।
ସୂଚନାଯୋଗ୍ୟ, IPL 2025 ମାର୍ଚ୍ଚ ୨୨ରୁ ଆରମ୍ଭ ହେବ । ସିଜିନର ପ୍ରଥମ ମ୍ୟାଚ୍ କୋଲକାତା ନାଇଟ୍ ରାଇଡର୍ସ ଏବଂ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ମଧ୍ୟରେ ଖେଳାଯିବ । ସିଜିନର ଶେଷ ମ୍ୟାଚ୍ ମେ’ ୨୫ରେ କୋଲକାତାର ଇଡେନ ଗାର୍ଡେନରେ ଖେଳାଯିବ । ଦ୍ୱିତୀୟ କ୍ୱାଲିଫାୟର ମଧ୍ୟ ସମାନ ଗ୍ରାଉଣ୍ଡରେ ଅନୁଷ୍ଠିତ ହେବ ।
