ଭୁବନେଶ୍ୱର, ୨୭/୬: ସକାଳୁ ସକାଳୁ ମେଘୁଆ ପାଗ ସହ ରଥ ଦାଣ୍ଡ ବେଶ ମନୋରମ ଦିଶୁଥିଲା । ନିର୍ଦ୍ଧାରିତ ସମୟରେ ଶ୍ରୀଜୀଉଙ୍କ ପହଂଡି ହୋଇଥିଲା । ହରିବୋଲ, ହୁଳହୁଳି ସହ ଶଙ୍ଖ କାହାଳୀର ମାଙ୍ଗଳିକ ଧ୍ବନି ସାଙ୍ଗକୁ ଘଣ୍ଟଘଣ୍ଟାର ନିନାଦରେ ଉଚ୍ଛୁଳୁଥିଲା ଦାଣ୍ଡ। ପ୍ରଭୁ ଆସୁଛନ୍ତି ବୋଲି ଭକ୍ତମାନେ ଅଶ୍ରୁ ଆଖିରେ ଚାହିଁ ବସିଥିଲେ । ଶେଷରେ ରଥାରୁଢ଼ ଭଗବାନ ଓ ଭକ୍ତଙ୍କ ମିଳନ ହୋଇଛି । ସନ୍ଧ୍ୟା ସୁଦ୍ଧା ଭୁବନେଶ୍ୱରର ବିଭିନ୍ନ ସ୍ଥାନରେ ରଥ ଗଡିଛି । ଭକତେ ହୋରେ କମ୍ପିଛି ଭୁବନେଶ୍ୱର ।
ରାଜଧାନୀରେ ଆୟୋଜିତ ଘୋଷଯାତ୍ରା ଅବସରରେ ଆକର୍ଷଣର କେନ୍ଦ୍ରବିନ୍ଦୁ ଥିଲା ଇସ୍କନ୍। ଅପରାହ୍ନ ସାଢେ ୩ଟା ବେଳକୁ ରଥଟଣା ଆରମ୍ଭ ହୋଇଥିଲା। ରଥ ଇସ୍କନ୍ରୁ ବାହାରି ସିଆର୍ପି ଛକ-ଷ୍ଟିୱାର୍ଟ ସ୍କୁଲ୍ ଛକ-୮ ନମ୍ବର ଡିଏଭି ଛକ ଦେଇ ଗୁଣ୍ଡିଚା ମନ୍ଦିରରେ ପହଞ୍ଚିଥିଲା। ସେହିପରି ଜାଗମରା ଧର୍ମବିହାର ଜଗନ୍ନାଥ ମନ୍ଦିର ପକ୍ଷରୁ ରଥଯାତ୍ରା ଶାନ୍ତି ଶୃଙ୍ଖଳାର ସହ ସରିଛି | ରଥ ଗଣ୍ଡମୁଣ୍ଡାସ୍ଥିତ ଗୁଣ୍ଡିଚା ମନ୍ଦିର ଅଭିମୁଖେ ଗଡ଼ିବା ବେଳେ ରାସ୍ତାର ଉଭୟ ପାର୍ଶ୍ବ ଲୋକାରଣ୍ୟ ହୋଇଥିଲା। ରଥ ଫେରିବା ପରେ ମନ୍ଦିର ନିକଟରେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ | ସେହିପରି ୟୁନିଟ-୮, ୟୁନିଟ-୫, ଉତ୍କଳ ବିଶ୍ୱବିଦ୍ୟାଳୟ, ସହିଦ ନଗର, ୟୁନିଟ-୧, କୋଳଥିଆ, ଘାଟିକିଆ, ପୁରୁଣା ଭୁବନେଶ୍ୱର ଓ ଉତ୍ତର ଭୁବନେଶ୍ୱରରେ ସୁରୁଖୁରୁରେ ରଥଯାତ୍ରା ସମ୍ପନ୍ନ ହୋଇଛି |
