ବୁର୍ଲା,୧୩/୦୨: ବୁର୍ଲା ଭିମ୍ସାର୍ରେ ସାଂଘାତିକ ବିଦ୍ୟୁତ୍ ବିଭ୍ରାଟ୍ । ମେଡିକାଲର କ୍ୟାନ୍ସର ୱାର୍ଡରେ ବିନା କୌଣସି ପ୍ରାକ୍ ସୂଚନାରେ ବିଦ୍ୟୁତ୍ କାଟ୍ କଲେ ଜିଇଡି ବିଭାଗ । ଅନ୍ଧାରରେ ପଡିରହିଥିଲେ କେମୋ ଚିକିତ୍ସା ନେଉଥିବା କ୍ୟାନ୍ସର ରୋଗୀ । ଜରୁରି ପରିସ୍ଥିତିରେ କିଛି ରୋଗୀଙ୍କୁ ବାଧ୍ୟହୋଇ ମୋବାଇଲ ଲାଇଟ୍ରେ କେମୋ ଚିକିତ୍ସା ଦିଆଯାଇଥିବା ଦେଖିବାକୁ ମିଳିଛି । ଜିଇଡି ବିଭାଗର ଏମିତି ସାଙ୍ଘାତିକ ଅବହେଳା ଯୋଗୁଁ କ୍ୟାନ୍ସର ରୋଗୀମାନେ ବିନା ଲାଇଟ୍ରେ ତିନିଘଣ୍ଟା ଧରି କଲବଲ ହୋଇଥିବା ଅଭିଯୋଗ ହୋଇଛି । କ୍ୟାନ୍ସର ରୋଗୀଙ୍କ ଜୀବନ ସହିତ ଜିଇଡି ବିଭାଗର ଏଭଳି ଖେଳ ପାଇଁ ବିଭିନ୍ନ ମହଲରେ ନିନ୍ଦା କରାଯିବା ସହିତ ଦୋଷୀ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଦାବି କରାଯାଇଛି ।
ବୁର୍ଲା କ୍ୟାନ୍ସର ୱାର୍ଡରେ ଗତକାଲି ତିନିଘଣ୍ଟା ବିଦ୍ୟୁତ୍ ସେବା ବାଧାପ୍ରାପ୍ତ ହୋଇଥିଲା । ଏହି ବିଭାଗରେ ଶତାଧିକ କ୍ୟାନ୍ସର ରୋଗୀ ଭର୍ତ୍ତି ହୋଇ ଚିକିତ୍ସା ହେଉଥିବା ବେଳେ ରୋଗୀଙ୍କୁ ୩ଘଣ୍ଟା କାଳ ଅନ୍ଧାରରେ ରହିବାକୁ ପଡିଥିଲା । ଦିନ ୧୨ଟାରୁ ୩ଟା ପର୍ଯ୍ୟନ୍ତ ବିଦ୍ୟୁତ୍ ସେବା ଠପ୍ ହୋଇ ଯାଇଥିଲା । ଏହି ବିଭାଗଟି ଅତ୍ୟନ୍ତ ଗୁରୁତ୍ୱପୂର୍ଣ ହୋଇଥିଲେ ମଧ୍ୟ ଜୀବନ ସହିତ ସଂଗ୍ରାମ କରୁଥିବା ଅତି ଗୁରୁତର ରୋଗୀ ମାନେ ଏହି ବିଭାଗରେ ଚିକିତ୍ସିତ ହେଉଛନ୍ତି ।
କୌଣସି ପୂର୍ବ ସୂଚନା ଦିଆନଯାଇ ହଠାତ୍ ଏଭଳି ବିଦ୍ୟୁତ୍ କାଟ୍ କାହିଁକି କରାଗଲା ତାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ବିଦ୍ୟୁତ୍ କାଟ୍ କରିବା ପୂର୍ବରୁ ଏଠାରେ ରହିଥିବା ଜେନେରେଟର୍ ମଧ୍ୟ ଚଲାଯାଇନଥିଲା । ପୂର୍ବରୁ କିଛି ରୋଗୀଙ୍କ କେମୋ ଚିକିତ୍ସା ଆରମ୍ଭ ହୋଇ ସାରିଥିବା ବେଳେ ଆଉ କିଛି ରୋଗୀଙ୍କୁ ଅନ୍ଧାର ମଧ୍ୟରେ ମୋବାଇଲ୍ ଲାଇଟ୍ରେ ବାଧ୍ୟହୋଇ କେମୋ ଚିକିତ୍ସା କରାଯାଇଥିବା ଦେଖିବାକୁ ମିଳିଛି । ସାଧାରଣତଃ ଜଣେ ରୋଗୀଙ୍କୁ କେମୋ ଦିଆଗଲେ ତାହା ଅତିକମ୍ରେ ଛଅ ଘଣ୍ଟା ସମୟ ନେଇଥାଏ । ଏବଂ ଏହି କେମୋ ଚିକିତ୍ସା ଅତ୍ୟନ୍ତ ଗୁରୁତ୍ୱପୂର୍ଣ ହୋଇଥିବା ବେଳେ ରୋଗୀ ଶରୀରରେ ଏହା ଅନେକ ପାଶ୍ୱର୍ ପ୍ରତିକ୍ରିୟା ଦେଖାଇଥାଏ ।
ତେଣୁ ରୋଗୀଙ୍କୁ କେମୋ ଚିକିତ୍ସା ପାଇଁ ସାଧାରଣ ତାପମାତ୍ରାରେ ରଖାଯାଇଥାଏ । କିନ୍ତୁ ତିନିଘଣ୍ଟା ବିଦ୍ୟୁତ୍ କାଟ ହେବା ଫଳରେ କେମୋ ଚିକିତ୍ସା ନେଉଥିବା ରୋଗୀ ଗରମରେ କଲବଲ ହେଉଥିବା ଅଭିଯୋଗ ହୋଇଛି । ତେବେ ଅନ୍ଧାର ଯୋଗୁଁ ରୋଗୀଙ୍କ ଶରୀରରେ ପାଶ୍ୱର୍ ପ୍ରତିକ୍ରିୟା ହେଲେ ମଧ୍ୟ ତାହାକୁ ଠିକ୍ ସମୟରେ ଜଣିବା ଡାକ୍ତରଙ୍କ ପକ୍ଷରେ ସମ୍ଭବ ହୋଇ ନଥାଏ । ତେଣୁ ଏଭଳି ବିଦ୍ୟୁତ୍ ବିଭ୍ରାଟ୍ କ୍ୟାନ୍ସର ରୋଗୀଙ୍କ ଜୀବନ ସହିତ ଏକ ପ୍ରକାର ଖେଳ ବୋଲି କୁହାଯାଉଛି ।
ଅନ୍ୟପଟେ ତିନିଘଣ୍ଟା ବିଦ୍ୟୁତ୍ କାଟ ପରେ ମଧ୍ୟ ଜିଇଡି ବିଭାଗର ଚେତା ପଶିନଥିଲା । ଲାଇଟ୍ ଆସିବା ପରେ ପ୍ରାୟ ୪ଟା ସମୟରେ ପୁଣି ଥରେ ୧୫ ମିନିଟ୍ ପାଇଁ ବିଦ୍ୟୁତ୍ କାଟ୍ କରିଥିଲେ । ତେବେ ଜିଇଡି ବିଭାଗର ଏତେ ଚରମ ଅବହେଳା କାହିଁକି ବୋଲି ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି । ଏନେଇ ମେଡିକାଲ ଅଧୀକ୍ଷକ ପ୍ରଫେସର ଡା. ଲାଲ୍ମୋହନ ନାୟକଙ୍କୁ ପଚାରିବାରୁ ବିଦ୍ୟୁତ୍ ମରାମତି କାମ ଯେଉଁ ଠିକାସଂସ୍ଥା ନେଇଛି ସେମାନଙ୍କ ଅବହେଳା ରହିଛି ଏବଂ ଆମକୁ କୌଣସି ପୂର୍ବ ସୂଚନା ଦିଆଯାଇ ନଥିଲା ବୋଲି କହିଛନ୍ତି ।
ସେ ଏହାମଧ୍ୟ କହିଛନ୍ତି ଯେ, ଏହି ଘଟଣାରେ ଯାହାର ଭୁଲ ରହିଛି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବୁ । ପଶ୍ଚିମ ଓଡିଶାରେ କ୍ୟାନ୍ସର ରୋଗୀଙ୍କ ଚିକିତ୍ସା ପାଇଁ ଏକମାତ୍ର ସାହାରା ପାଲଟିଛି ବୁର୍ଲା ଭିମ୍ସାର୍ । ସମଗ୍ର ପଶ୍ଚିମ ଓଡ଼ିଶାରୁ ହଜାର ହଜାର ରୋଗୀ ଏହି କ୍ୟାନ୍ସର ୱାର୍ଡରେ ଚିକିତ୍ସା ପାଇଁ ନିର୍ଭର କରୁଛନ୍ତି । ଏଠାରେ ଏଭଳି ମନୁଷ୍ୟକୃତ ତ୍ରୁଟି ଯୋଗୁଁ ଗୁରୁତର କ୍ୟାନ୍ସର ରୋଗୀଙ୍କ ଜୀବନ ପ୍ରତି ବିପଦ ସୃଷ୍ଟି କରିପାରେ ବୋଲି କୁହାଯାଉଛି । ତେଣୁ ଏହି ଘଟଣାରେ ରାଜ୍ୟ ସରକାର ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ଦିଗରେ ପଦକ୍ଷେପ ନେବାକୁ ସାଧାରଣରେ ଦାବି ହେଉଛି । ତେବେ ଏନେଇ ଜିଇଡି ଏସ୍ଡିଓ ମିଲନ କୁମାର ସ୍ୱାଇଁଙ୍କୁ ପଚାରିବା ପାଇଁ ଯୋଗାଯୋଗ କରିଥିଲେ ମଧ୍ୟ ସେ ଫୋନ ଉଠାଇ ନଥିଲେ । ଏହି ଘଟଣାରେ ଏସ୍ଡିଓଙ୍କ ପରିଚାଳନାଗତ ତୃଟି ଯୋଗୁଁ ତାଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ଜୋର ଧରିଛି ।
