କଟକ,୧୭/୧୨: ଜାତୀୟସ୍ତରୀୟ ରିଆଲିଟି ସୋ’ ଇଣ୍ଡିଆନ୍ ଆଇଡଲ୍ରେ ଶ୍ରେଷ୍ଠ ୧୬ଜଣଙ୍କ ମଧ୍ୟରେ ସ୍ଥାନ ବଜାୟ ରଖିଥିବା କଟକର ପୁଅ ଜ୍ୟୋତିପ୍ରକାଶ ଓଝାଙ୍କୁ ମୁଖ୍ୟମନ୍ତ୍ରୀ ମୋହନ ମାଝୀ ପ୍ରସଂଶା କରିଛନ୍ତି । ଏମିତିକି ତାଙ୍କୁ ସମ୍ପୂର୍ଣ୍ଣ ରାଜ୍ୟବାସୀ ସମର୍ଥନ ଜଣାଇବାକୁ ମୁଖ୍ୟମନ୍ତ୍ରୀ ନିବେଦନ କରିଛନ୍ତି । ତାଙ୍କ ସଫଳତା ଆମ ପାଇଁ ଗୌରବ ସାଜିବ ବୋଲି ମୁଖ୍ୟମନ୍ତ୍ରୀ କହିଥିଲେ ।
ସୋମବାର ମୁଖ୍ୟମନ୍ତ୍ରୀ ଶ୍ରୀ ମାଝୀ ବକ୍ସିବଜାର ରିଜର୍ଭ ପୁଲିସ୍ ଲାଇନ୍ ପଡ଼ିଆରେ ୬୯ ତମ ରାଜ୍ୟ ପୁଲିସ୍ର ଏକ ଭବ୍ୟ କାର୍ଯ୍ୟକ୍ରମରେ ଯୋଗ ଦେଇଥିଲେ । ଏହି ଅବସରରେ ସୋନି ଟିଭିରେ ପ୍ରସାରିତ ରିଆଲିଟୀ ସୋ "ଇଣ୍ଡିଆନ୍ ଆଇଡଲ୍’ର ସୁନ୍ଦର ଗୀତ ପରିବେଷଣ କରି ସମସ୍ତଙ୍କ ମନ ଜିତୁଥିବା ଜ୍ୟୋତି ପ୍ରକାଶଙ୍କ କଥା କହିଥିଲେ । ସେ ଜଣେ ଗୋସେବକ ହେବା ସହିତ ଖୁବ୍ କମ୍ ସମୟରେ ଏତେ ବଡ଼ ମଞ୍ଚରେ ପହଞ୍ଚିବାକୁ ନେଇ ପ୍ରସଂଶା କରିଥିଲେ । ତେଣୁ ଜ୍ୟୋତିପ୍ରକାଶ ଓଝାଙ୍କୁ ସୋନି ଲାଇଭ ଆପ୍ ମାଧ୍ୟମରେ ବିପୁଳ ଭୋଟ ଦେଇ ଜିତାଇବାକୁ ଓଡ଼ିଶାବାସୀଙ୍କୁ ନିବେଦନ କରିଥିଲେ ।
