ଭୁବନେଶ୍ୱର,୧୪/୦୬: ଚିଲିକା ଫ୍ରେସ୍ ଟେଣ୍ଡରରେ ଫିକ୍ସିଂ! ଆଉଟଲେଟ୍ ଟେଣ୍ଡରରେ ପ୍ରିୟାପ୍ରୀତି ତୋଷଣକୁ ଗୁରୁତ୍ୱ ଦିଆଯାଇଛି । ଜଣେ ଅଧିକାରୀଙ୍କ ସମ୍ପର୍କୀୟ ଟେଣ୍ଡର ହାତେଇଛନ୍ତି । ଏବେ ତାଙ୍କୁ ଶିରିପୁର ଆଉଟେଲଟ୍ ପରିଚାଳନା କରିବାକୁ ଦାୟିତ୍ୱ ମିଳିଥିବା ଜଣାପଡ଼ିଛି । ତେବେ ସହିଦନଗର ଓ ସିଆରପି ଆଉଟଲେଟ୍ ପାଇଁ ଟେଣ୍ଡର ଡକାଯାଇଥିବା ବେଳେ ଏହାକୁ ନେବା ପାଇଁ କେହି ନଥିବାରୁ ଏହି ଦୁଇ ଆଉଟଲେଟ୍ ଘରୋଇକରଣ ହେବାରୁ ବର୍ତ୍ତିଯାଇଛି । ଏଠିପ୍ରଶ୍ନ ଉଠୁଛି, ଯଦି ପାରିବାରିକ ସମ୍ପର୍କକୁ ଦେଖି ଚିଲିକା ଫ୍ରେସ୍ ଆଉଟଲେଟ୍ ଦିଆଗଲା ତେବେ ଟେଣ୍ଡର ଡକାଗଲା କ’ଣ ପାଇଁ?
ସରକାରୀ ଅଧିନରେ ଚାଲୁଥିବା ଚିଲିକା ଫ୍ରେସ୍ ଭାଗ୍ୟ ଏବେ ଅନ୍ଧାର । ଯେବେଠୁ ଶେଷ ୩ଟି ଆଉଟଲେଟ୍କୁ ଘରୋଇକରଣ କରିବା ପାଇଁ ଟେଣ୍ଡର ଡକାଯାଇଛି ସେବେଠୁ ଏହା ଏକ ଚର୍ଚ୍ଚାର ବିଷୟ ପାଲଟିଛି । ସରକାର ଏହି ଆଉଟଲେଟ୍ଗୁଡ଼ିକର ଉନ୍ନତି କରିବା ପରିବର୍ତ୍ତେ ଏହାକୁ ଘରୋଇ ସଂସ୍ଥା ହାତକୁ ଟେକିଦେବାକୁ ମସୁଧା କରୁଥିବା ଅଭିଯୋଗ ହୋଇଥିଲା । ସିଆରପି, ସହିଦନଗର ଓ ଶିରିପୁରରେ ଥିବା ଆଉଟଲେଟ୍ ପାଇଁ ଗତ ୨୨ ତାରିଖରେ ଟେଣ୍ଡର ଖୋଲାଯାଇଥିବା ବେଳେ ଗୁରୁବାର ବନ୍ଦ ହୋଇଥିଲା । ଗତକାଲି ହିଁ ତରବରିଆ ଭାବରେ ଟେକ୍ନିକାଲ ଓ ଫାଇନାନ୍ସିଆଲ ଟେଣ୍ଡର ଡକାଯାଇଥିଲା । ହେଲେ ସିଆରପି ଓ ସହିଦନଗର ଆଉଟ୍ଲେଟ୍ ପାଇଁ କେହି ଟେଣ୍ଡରରେ ଭାଗ ନେଇନଥିଲେ । ତେଣୁ ଏହି ଦୁଇଟି ଆଉଟଲେଟ୍ ଟେଣ୍ଡରକୁ ବାତିଲ କରାଯାଇଥିଲା । ତେବେ ଶିରିପୁର ଆଉଟଲେଟ୍ ପାଇଁ ଗୋଟିଏ ସଂସ୍ଥା ଟେଣ୍ଡର ପକାଇଥିଲା । ଯେଉଁ ବ୍ୟକ୍ତି ଟେଣ୍ଡର ପକାଇଥିଲେ ସେ କୁଆଡେ ବିଭାଗରେ କାର୍ଯ୍ୟରତ ଜଣେ ବରିଷ୍ଠ ଅଧିକାରୀଙ୍କ ସମ୍ପର୍କୀୟ । ହେଲେ ନିୟମାନୁସାରେ, ତିନିଜଣ ଅପସନର୍ ଭାଗ ନେବା କଥା । ଅନ୍ୟଥା ଟେଣ୍ଡର ବାତିଲ କରାଯିବ । ମାତ୍ର ଏ କ୍ଷେତ୍ରରେ ସିଙ୍ଗଲ ଟେଣ୍ଡର ପଡ଼ିଥିଲା । ଶେଷରେ ସଂପୃକ୍ତ ଅଧିକାରୀଙ୍କ ମୁହଁକୁ ଚାହିଁ ତାଙ୍କର ସମ୍ପର୍କୀୟଙ୍କ ହାତରେ ଆଉଟଲେଟ୍କୁ ଟେକିଦିଆଯାଇଛି । ଟେଣ୍ଡରରେ ଫିକ୍ସିଂ ହୋଇଥିବା ଜଳଜଳ ଦେଖାଯାଉଛି ।
ଅପରପକ୍ଷେ, ଏସମସ୍ତ ଘଟଣାରେ ପରିଚାଳନା ନିର୍ଦ୍ଦେଶକଙ୍କ ଭୂମିକା ସନ୍ଦେହଘେରକୁ ଆସିଛି । ତାଙ୍କ ଜାଣତରେ ହିଁ ଏସବୁ ଘଟୁଛି ବୋଲି କର୍ମଚାରୀମାନେ ଅଭିଯୋଗ କରିଛନ୍ତି । ୩ଟି ଆଉଟଲେଟ୍ ପାଇଁ ଟେଣ୍ଡର ଡକାଯାଇଥିଲା ହେଲେ ମିଳିଲା ଗୋଟିଏକୁ । କେଉଁ ଆଧାରରେ ଟେଣ୍ଡର ବଣ୍ଟାଗଲା, ସମ୍ପର୍କୀୟଙ୍କୁ କେମିତି ଦାୟିତ୍ୱ ମିଳିଲା, ଏସବୁର ବିଭାଗୀୟ ତଦନ୍ତ ହେବା ଦରକାର ବୋଲି ଦାବି ହୋଇଛି। ଏସଂକ୍ରାନ୍ତରେ ପରିଚାଳନା ନିର୍ଦ୍ଦେଶକ ମୁରଲିଧର ଜେନାଙ୍କ ପ୍ରତିକ୍ରିୟା ମିଳିପାରିନି ।
