ନୂଆଦିଲ୍ଲୀ, ୧୬/୦୮ : ବଡ଼ ବଡ଼ କମ୍ପାନୀ ଠାରୁ ନେଇ ଛୋଟ ଫ୍ୟାକ୍ଟ୍ରି ଯାଏଁ ବଢିଛି ରୋବଟ୍ଙ୍କ ଆଧିପତ୍ୟ। ଏବେ ଗରିବ ଖଟିଖିଆଙ୍କ ଚାକିରି ଖାଇବ ରୋବଟ୍। ବାହୁବଳୀ ରୋବଟ୍ ତିଆରି କଲା ଚୀନ। ୨୫୦ କିଲୋ ଓଜନର ଉଠାଉଛି ଜିନିଷ। ଚୀନର ମ୍ୟାଜିକଲ୍ୟାବ କମ୍ପାନୀ ଏହାକୁ ତିଆରି କରିଛି। ଏହାର ନାମ 'ମ୍ୟାଜିକ୍ବଟ୍' ରଖାଯାଇଛି। ଅଧିକ ଓଜନର ଜିନିଷ ଉଠାଇବାକୁ ଏବେ ଏହାକୁ ଚୀନର ଫ୍ୟାକ୍ଟ୍ରିରେ ବ୍ୟବହାର କରାଯାଉଛି। ଏହି ରୋବଟ୍ର ଭିଡିଓ ଏବେ ସୋସିଆଲ୍ ମିଡିଆରେ ଭାଇରାଲ୍ ହେଉଛି।
ରୋବୋଟିକ୍ସ ଦୁନିଆରେ ଚୀନ ଶିଖର ଛୁଇଁଛି। ନିଜ ଦେଶରେ ରୋବଟ୍ ମଲ୍ ତିଆରି କରିଛି। ଏବେ ଚୀନର ଏକ ଷ୍ଟାର୍ଟଅପ୍ କମ୍ପାନୀ ମ୍ୟାଜିକଲ୍ୟାବ୍ 'ମ୍ୟାଜିକବଟ୍' ନାମରେ ଏକ ରୋବଟ୍ ତିଆରି କରିଛି। ଏହି ରୋବଟ୍ ୨୫୦ କିଲୋ ଓଜନର ଜିନିଷ ଉଠାଇ ପାରିବ। ହାଲୁକା ଓଜନ ସହିତ ଏହାର ଗତି ପ୍ରତି ସେକେଣ୍ଡ୍ ପିଛା ୦.୭ ମିଟର ଥିଲା। ଏବେ ଅଧିକ ଓଜନ ସହ ରୋବଟ୍ର ଗତି ୦.୩ ମିଟର ରହିଛି। ଏହି ରୋବଟ୍ ଜିନିଷ ଉଠାଇବା ସହ ଅନେକ ପ୍ରକାରର କାମ କରିବାରେ ମାହିର।
ମ୍ୟୁଜିକବଟ୍ ତୃତୀୟ ପୀଢିର ଏଆଇ ରୋବଟ୍। ଏହା ଫ୍ୟାକ୍ଟ୍ରିରେ କାମ କରିବା ସହ ଜିନିଷ ଉଠାଇବା, ପ୍ରଡକ୍ଟର ଯାଞ୍ଚ କରିବା, ସ୍କାନିଂ କରିବା ସହ ଗୋଦାମରେ କାମ କରିପାରିବ। ଏହା ଘରୋଇ କାମ ଯେପରିକି, କପଡ଼ା ଭାଙ୍ଗି ରଖିବା, ଗଛରେ ପାଣି ଦେବା, ଓ ଯାଦୁ ଦେଖାଇ ପାରିବ। ଏହା ମଣିଷଙ୍କ ଭଳି ହଲିଝୁଲି ପାରିବ। ଏଥିରେ RGBD କ୍ୟାମେରା, ଫିସ୍ଆଇ କ୍ୟାମେରା ଓ ଅଲ୍ଟ୍ରାସୋନିକ ସେନ୍ସର ଲାଗିଛି। ଯାହାକି ଏହାକୁ ଚତୁର୍ଦ୍ଦିଗକୁ ଦେଖି ଅନୁଭବ କରିପାରିବ। ନିଜେ ନିଜେ ରାସ୍ତା ପାର୍ କରିପାରିବ। ଏହାର ବ୍ୟାଟେରୀ ୫ ଘଣ୍ଟା ଯାଏଁ ଚାର୍ଜ ରଖିବ। ଏଆଇ ସାହାଯ୍ୟରେ ଏହାକୁ ସଂଚାଳନ କରାଯାଇ ପାରିବ।
