ନୂଆଦିଲ୍ଲୀ, ୨୩.୭: ଭାରତର ମୁଖ୍ୟ ବିଚାରପତି ଜଷ୍ଟିସ୍ ସୂର୍ଯ୍ୟକାନ୍ତ ନବନିଯୁକ୍ତ 'ଆଡଭୋକେଟ୍ସ-ଅନ୍-ରେକର୍ଡ' ମାନଙ୍କୁ ଗୁରୁତ୍ୱପୂର୍ଣ୍ଣ ପରାମର୍ଶ ଦେଇଛନ୍ତି । ଆଇନ୍ ପେଷା ଆପଣାଉଥିବା ଯୁବ ଓକିଲମାନଙ୍କୁ ସଚେତନ କରାଇ ସେ କହିଛନ୍ତି ଯେ, ଅନଲାଇନରେ ସକ୍ରିୟ ରହିବା କିମ୍ବା ଲୋକପ୍ରିୟତା ହାସଲ କରିବା ସଫଳତାର ମାପଦଣ୍ଡ ନୁହେଁ । ଆଇନ୍ କ୍ଷେତ୍ରରେ ସ୍ଥାୟୀ ସମ୍ମାନ ସୋସିଆଲ୍ ମିଡିଆରୁ ନୁହେଁ, ବରଂ କୋର୍ଟରୁମ୍ରେ କରାଯାଉଥିବା କଠିନ ପରିଶ୍ରମ ଓ ବିଶ୍ୱସନୀୟତାରୁ ମିଳିଥାଏ ।
ଲୋକପ୍ରିୟତା ପଛରେ ଧାଆନ୍ତୁ ନାହିଁ: CJI
'ବାର୍ ଆଣ୍ଡ୍ ବେଞ୍ଚ୍'ର ଏକ ରିପୋର୍ଟ ଅନୁସାରେ, ସୁପ୍ରିମ୍ କୋର୍ଟ ଆଡଭୋକେଟ୍ସ-ଅନ୍-ରେକର୍ଡ ଆସୋସିଏସନ୍ ଦ୍ୱାରା ଆୟୋଜିତ ୨୦୨୫ ବ୍ୟାଚ୍ର ସମ୍ବର୍ଦ୍ଧନା ସମାରୋହରେ ସିଜେଆଇ କହିଛନ୍ତି, "ଆଜିକାଲି ସୋସିଆଲ୍ ମିଡିଆ ମାଧ୍ୟମରେ ଲୋକଙ୍କ ନଜରକୁ ଆସିବା ଓ ମୋହର ଲଗାଇ ପ୍ରସିଦ୍ଧି ପାଇବା ଖୁବ୍ ସହଜ ହୋଇଯାଇଛି । କିନ୍ତୁ ମନେରଖନ୍ତୁ, ଏହିଭଳି ଲୋକପ୍ରିୟତାର ଅର୍ଥ ବିଶ୍ୱସନୀୟତା ନୁହେଁ । ଆପଣଙ୍କୁ କୌଣସି ଟିଭି ଚ୍ୟାନେଲ୍ ଭଳି ଟିଆର୍ପି ପଛରେ ଧାଇଁବାକୁ ପଡ଼ିବ ନାହିଁ । ବାସ୍ତବ ସମ୍ମାନ ତାହା, ଯାହା ଆପଣ କୋର୍ଟରୁମ୍, ଆପଣଙ୍କ ସହକର୍ମୀ, କ୍ଲାଏଣ୍ଟ ଏବଂ ଓକିଲ ସଂଘ ନିକଟରୁ ଅର୍ଜନ କରନ୍ତି ।" ଏହି କାର୍ଯ୍ୟକ୍ରମରେ ଜଷ୍ଟିସ୍ କେ.ଭି. ବିଶ୍ୱନାଥନ୍ ଏବଂ ଜଷ୍ଟିସ୍ ବିପୁଲ୍ ଏମ୍. ପଞ୍ଚୋଲୀ ମଧ୍ୟ ଉପସ୍ଥିତ ରହି ନିଜର ବକ୍ତବ୍ୟ ରଖିଥିଲେ । ସିଜେଆଇ ଯୁବ ଓକିଲମାନଙ୍କୁ ନିଜର ଦକ୍ଷତା ପ୍ରମାଣିତ କରିବା ପୂର୍ବରୁ ଲ' ଫାର୍ମ ଖୋଲିବା କିମ୍ବା ପ୍ରାକ୍ଟିସ୍ ବଢ଼ାଇବାରେ ତରବରିଆ ନହେବାକୁ ପରାମର୍ଶ ଦେଇଥିଲେ ।
ସିଜେଆଇ ସୂର୍ଯ୍ୟକାନ୍ତ ଆଇନ୍ ସମ୍ବନ୍ଧୀୟ କାଗଜପତ୍ର ପ୍ରସ୍ତୁତି ଉପରେ ବିଶେଷ ଗୁରୁତ୍ୱ ଦେଇଥିଲେ । ସେ କହିଛନ୍ତି କେବଳ ପଦବୀ କ୍ୟାରିଅର୍ ଗଢ଼ିନଥାଏ, ବରଂ କାମର ଗୁଣବତ୍ତା ହିଁ ଆପଣଙ୍କୁ ସଫଳତା ଦିଏ । ଲିଗାଲ୍ ଡ୍ରାଫ୍ଟିଂ ହେଉଛି ଆଇନ୍ ପେଷାର ଆତ୍ମା । ପ୍ରତ୍ୟେକ ଆବେଦନକୁ ଏମିତି ଏକ ଦମଦାର କାହାଣୀ ଭଳି ଲେଖନ୍ତୁ, ଯାହା ବିଚାରପତିଙ୍କୁ ଆରମ୍ଭରୁ ଶେଷ ପର୍ଯ୍ୟନ୍ତ ବାନ୍ଧି ରଖିବ । ସିଜେଆଇ ନିଜର ପ୍ରାରମ୍ଭିକ ଦିନର କଥା ମନେପକାଇ କହିଥିଲେ ଯେ, ତାଙ୍କର ଡ୍ରାଫ୍ଟିଂ ଦକ୍ଷତା ଯୋଗୁଁ ଅନେକ ବରିଷ୍ଠ ଓକିଲ ମଧ୍ୟ ଜଟିଳ ମାମଲାର କାଗଜପତ୍ର ପ୍ରସ୍ତୁତ କରିବାକୁ ତାଙ୍କୁ ଦାୟିତ୍ୱ ଦେଉଥିଲେ ।
ଏହା ବି ପଢ଼ନ୍ତୁ... PM Modi Announcement: ପେପର ଲିକ୍ ମାମଲାରେ ପ୍ରଧାନମନ୍ତ୍ରୀ ମୋଦୀଙ୍କ ବଡ଼ ନିଷ୍ପତ୍ତି; ଫାଷ୍ଟ ଟ୍ରାକ୍ କୋର୍ଟରେ ହେବ ଶୁଣାଣି, ଦୋଷୀଙ୍କୁ ମିଳିବ କଠୋର ଦଣ୍ଡ
AI ସାହାଯ୍ୟ କରିପାରେ, କିନ୍ତୁ ମଣିଷ ମସ୍ତିଷ୍କର ବିକଳ୍ପ ନୁହେଁ:
କୋର୍ଟ କାର୍ଯ୍ୟରେ ଏଆଇର ବ୍ୟବହାର ଉପରେ ସିଜେଆଇ ସାବଧାନ କରାଇଛନ୍ତି । ଏଆଇ କେବଳ ଗବେଷଣା ଏବଂ ତୁଳନାତ୍ମକ ଆଇନ୍ ଅଧ୍ୟୟନରେ ସହାୟକ ହୋଇପାରିବ । ଏହା କଦାପି ଜଣେ ଓକିଲର ନିଜସ୍ୱ ବୁଦ୍ଧିମତ୍ତା ଏବଂ କ୍ଲାଏଣ୍ଟର ପରିସ୍ଥିତିକୁ ବୁଝିବାର କ୍ଷମତାର ବିକଳ୍ପ ହୋଇପାରିବ ନାହିଁ । କ୍ଲାଏଣ୍ଟମାନେ ସେମାନଙ୍କର ବିବାଦ ପଛରେ ଥିବା ସତ୍ୟତା ଓ ଭାବନାକୁ ବୁଝିବା ପାଇଁ ଓକିଲଙ୍କ ପାଖକୁ ଆସନ୍ତି, ତେଣୁ ଏଆଇକୁ କେବଳ ଜଣେ ସହକାରୀ ଭାବେ ବ୍ୟବହାର କରନ୍ତୁ । ଶେଷରେ, ସିଜେଆଇ ନୂଆ ଆଡଭୋକେଟ୍ସ-ଅନ୍-ରେକର୍ଡ ଆସୋସିଏସନମାନଙ୍କୁ ସେମାନଙ୍କର ସାମାଜିକ ଉତ୍ତରଦାୟିତ୍ୱ ବିଷୟରେ ମନେପକାଇ ଦେଇଥିଲେ । ଗରିବ ଓ ଅବହେଳିତ ବର୍ଗର ଲୋକମାନେ ଯେପରି ଆଇନଗତ ସହାୟତାରୁ ବଞ୍ଚିତ ନହୁଅନ୍ତି, ତାହା ନିଶ୍ଚିତ କରିବାକୁ ସେ ଆହ୍ୱାନ ଦେଇଛନ୍ତି । ମାଗଣା ଆଇନ ସହାୟତା ମାମଲାଗୁଡ଼ିକୁ ନିଷ୍ଠାର ସହ ପରିଚାଳନା କଲେ ତାହା ଗୋଟିଏ ସମ୍ପୂର୍ଣ୍ଣ ପରିବାରର ଜୀବନ ବଦଳାଇଦେଇପାରେ ବୋଲି ସେ ପ୍ରକାଶ କରିଛନ୍ତି ।
