ଭୋଗରାଇ, ୦୭/୦୧ : ବାର୍ଷିକ କ୍ରୀଡ଼ା ପ୍ରତିଯୋଗୀତା ଚାଲିଥିଲା ବେଳେ ନବମ ଶ୍ରେଣୀ ଛାତ୍ରଙ୍କ ଛୁରାମାଡ଼ରେ ସହପାଠୀ ଗୁରୁତର। ବାଲେଶ୍ଵର ଜିଲ୍ଲା ଭୋଗରାଇ ବ୍ଳକ କମର୍ଦା ଥାନା ଦହମୁଣ୍ଡା ନୋଡାଲ ଉଚ୍ଚ ବିଦ୍ୟାଳୟରେ ଏଭଳି ଘଟଣା ଘଟିଛି। ଗୁରୁତର ଛାତ୍ରଙ୍କୁ ଦହମୁଣ୍ଡା ଗୋଷ୍ଠି ସ୍ଵାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି।

ସୂଚନାନୁଯାୟୀ, କମର୍ଦା ଥାନା ଦହମୁଣ୍ଡା ନୋଡାଲ ଉଚ୍ଚ ବିଦ୍ୟାଳୟରେ ବାର୍ଷିକ କ୍ରୀଡ଼ା ପ୍ରତିଯୋଗୀତା ଚାଲିଥିଲା। ଏହି ସମୟରେ ନବମ ଶ୍ରେଣୀର ଛାତ୍ର ବିନୟ ଚନ୍ଦ ସହପାଠୀ ଅନ୍ତିଆ ଚନ୍ଦର ପେଟକୁ ଛୁରାମାଡ଼ କରିଥିଲେ। ଉଭୟଙ୍କ ମଧ୍ୟରେ ଗତକାଲି ମେଳା ବୁଲିବା ସମୟରେ ଗୋଣ୍ଡଗୋଳ ହୋଇଥିଲା। ଆଜି ସେହି ଗୋଣ୍ଡଗୋଳକୁ ନେଇ ବିନୟ ଛୁରାମାଡ କରିଥିଲା। ଅନ୍ତିଆଙ୍କୁ ଗୁରୁତର ଅବସ୍ଥାରେ ଦହମୁଣ୍ଡା ଗୋଷ୍ଠି ସ୍ଵାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। ଘଟଣାସ୍ଥଳରେ କମର୍ଦା ପୋଲିସ ପହଞ୍ଚି ଛୁରାମାଡ଼ କରିଥିବା ବିନୟ ଚନ୍ଦକୁ ଅଟକ ରଖି ଅଧିକ ତଦନ୍ତ କରୁଛି। ବିଦ୍ୟାଳୟରେ ଏଭଳି ଘଟଣା ଘଟିଥିବା ବେଳେ ଅନ୍ତିଆଙ୍କ ପରିବାର ଲୋକେ ପିଲାଙ୍କୁ ଯେମିତି ସ୍କୁଲ ପଠାଇଥିଲେ ସେମିତି ବିଦ୍ୟାଳୟରୁ ପିଲା ନେବେ ବୋଲି ଦାବି କରିଛନ୍ତି।