ଭୁବନେଶ୍ୱର, ୨୩/୦୮: ପ୍ରଧାନମନ୍ତ୍ରୀଙ୍କ ପୂର୍ବୋଦୟ ମିଶନରେ ଓଡ଼ିଶା ଏକ ପ୍ରମୁଖ ଯୋଗଦାନକାରୀ ରାଜ୍ୟ ଭାବେ ଉଭା ହୋଇଛି । ବିକଶିତ ଭାରତର ଅଭିବୃଦ୍ଧି ଇଞ୍ଜିନ ହେବା ଦିଗରେ ରାଜ୍ୟ ଅଗ୍ରସର ହେଉଛି । ଏକ ଅଭିବୃଦ୍ଧିଶୀଳ ଅର୍ଥନୀତି ଭାବେ ଟେକ୍ନୋଲୋଜି ନିବେଶର ପେଣ୍ଠସ୍ଥଳ ଭାବେ ଉଭା ହେଉଥିବା ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି ।
ସମନ୍ୱିତ ବିଶ୍ୱ ଆର୍ଥିକ ପ୍ରଯୁକ୍ତିବିଦ୍ୟା ସାମର୍ଥ୍ୟ ହବ୍ ( ଆଇ-ଜିଏଫ୍ଟିସିଏଚ୍ ) ‘ଭାରତନେତ୍ର’କୁ ମୁଖ୍ୟମନ୍ତ୍ରୀ ଶ୍ରୀ ମାଝୀ ଶୁକ୍ରବାର ସଂଧ୍ୟାରେ ଉଦ୍ଘାଟନ କରିଥିଲେ । ଗ୍ଲୋବାଲ ଫାଇନାନ୍ସ ଆଣ୍ଡ ଟେକ୍ନୋଲୋଜି ନେଟୱର୍କ (ଜିଏଫ୍ଟିଏନ୍) ସିଙ୍ଗାପୁର, ନ୍ୟାସନାଲ ୟୁନିଭର୍ସିଟି ଅଫ୍ ସିଙ୍ଗାପୁର (ଏନ୍ୟୁଏସ୍), ଏସିଆନ ଇନଷ୍ଟିଚ୍ୟୁଟ ଅଫ୍ ଡିଜିଟାଲ ଫାଇନାନ୍ସ (ଏଆଇଡିଏଫ୍) ସହଯୋଗରେ ‘ଭାରତନେତ୍ର’କୁ ସ୍ଥାପନ କରାଯାଇଛି । ଡିଜିଟାଲ ନବସୃଜନ ଓ ଫିନ୍ଟେକ୍ କ୍ଷେତ୍ର ଲାଗି ଦକ୍ଷ ମାନବ ସମ୍ବଳ ସୃଷ୍ଟି ଦିଗରେ ଏହି ସେଣ୍ଟର ପ୍ରମୁଖ ଭୂମିକ ଗ୍ରହଣ କରିବ ବୋଲି ଆଶା କରାଯାଉଛି ।
Today marks a historic moment for Odisha as we take a transformative step to shape the future of finance in our state and strengthen India’s global leadership in the digital economy. Honoured to launch the Integrated Global Financial Technology Capability Hub (I-GFTCH) in… pic.twitter.com/NZajXYm2KB
— Mohan Charan Majhi (@MohanMOdisha) August 22, 2025
ମୁଖ୍ୟମନ୍ତ୍ରୀ କହିଲେ, ନୂଆ ପଦକ୍ଷେପ ରାଜ୍ୟର ଆର୍ଥିକ କ୍ଷେତ୍ରର ଭବିଷ୍ୟତ ଏବଂ ଡିଜିଟାଲ ଅର୍ଥନୀତିରେ ବିଶ୍ୱ ଲିଡର୍ ହେବା ଲାଗି ଭାରତ ସ୍ଥିତିକୁ ଦୃଢ଼ କରିବ । ଭାରତ ବିଶ୍ୱ ଲିଡର ହେବା ଦିଗରେ ଓଡ଼ିଶା ପ୍ରମୁଖ ଭୂମିକା ଗ୍ରହଣ କରିବ । ଏହି କାର୍ଯ୍ୟକ୍ରମ ଅଧୀନରେ ରାଜ୍ୟର ୭ ହଜାର ଛାତ୍ରଛାତ୍ରୀଙ୍କୁ ଦକ୍ଷତା ତାଲିମ ଦିଆଯିବ । ଏସିଆନ ଇନଷ୍ଟିଚ୍ୟୁଟ ଅଫ୍ ଡିଜିଟାଲ ଫାଇନାନ୍ସ ଏବଂ ନ୍ୟାସନାଲ ଇନଷ୍ଟିଚ୍ୟୁଟ ଅଫ୍ ସିଙ୍ଗାପୁର ପକ୍ଷରୁ ସାର୍ଟିଫିକେଟ କୋର୍ସ ପ୍ରଦାନ କରାଯିବ ।
ଏହି ନୂତନ ହବ୍ ସହ ସ୍ୱତନ୍ତ୍ର ସେଣ୍ଟର ଅଫ୍ ଏକ୍ସଲେନ୍ସ ଦ୍ୱାରା ରାଜ୍ୟ ସରକାର ଷ୍ଟାର୍ଟଅପ୍ ଏବଂ ଉଦ୍ୟୋଗୀଙ୍କୁ ପ୍ରୋତ୍ସାହିତ କରିବେ । ଏହି ପ୍ରକଳ୍ପ ଅଧୀନରେ ଏକ ଗ୍ଲୋବାଲ କାପାବିଲିଟି ସେଣ୍ଟର (ଜିସିସି) ମଧ୍ୟ ସ୍ଥାପନ ଲକ୍ଷ୍ୟ ରହିଛି । ଏହାଦ୍ୱାରା ରାଜ୍ୟରେ ବିଶ୍ୱ ସ୍ତରୀୟ ଆର୍ଥିକ ପ୍ରତିଷ୍ଠାନ ଗୁଡ଼ିକ ରାଜ୍ୟରେ ନିବେଶ କରିବାକୁ ଆକୃଷ୍ଟ ହେବେ ।
ରାଜ୍ୟର ଡିଜିଟାଲ ଭିତ୍ତିଭୂମି ଦୃଢ଼ୀକରଣ ସମ୍ପର୍କରେ ଶ୍ରୀ ମାଝୀ କହିଲେ, ଭୁବନେଶ୍ୱର ଓ ସିଙ୍ଗାପୁର ମଧ୍ୟରେ ସଂଯୋଗ ସ୍ଥାପନ ଲାଗି ଏକ କେବଲ ଲ୍ୟାଣ୍ଡିଂ ଷ୍ଟେସନ ସ୍ଥାପନ କରାଯାଉଛି । ପ୍ରଥମ ରାଜ୍ୟ ଭାବେ ଓଡ଼ିଶା ଏଆଇ ନୀତି ଲାଗୁ କରିଛି । ଏହି ଧାରାକୁ ଆଉ ପାଦେ ଆଗକୁ ନେବା ଲାଗି ରାଜ୍ୟ ସରକାର ନୂଆ ଫିନ୍ଟେକ୍ ଏବଂ ଜିସିସି ନୀତି ଶୁଭାରମ୍ଭ କରିବାକୁ ଯାଉଛନ୍ତି । ଏହା କେନ୍ଦ୍ର ସରକାରଙ୍କ ୧ ଲକ୍ଷ କୋଟିର ନିବେଶରେ ୩ କୋଟି ନୂଆ ନିଯୁକ୍ତି ସୃଷ୍ଟି ଲକ୍ଷ୍ୟକୁ ଯୋଗଦାନ ଦେବାକୁ ସକ୍ଷମ ହେବ ।
ଶିଳ୍ପ ପାଇଁ କୁଶଳୀ ଶ୍ରମ ଶକ୍ତି ସୃଷ୍ଟି ଲାଗି ରାଜ୍ୟ ପ୍ରସ୍ତୁତ । ଓଡ଼ିଶା ପ୍ରତିବର୍ଷ ୧.୫ ଲକ୍ଷ ଇଞ୍ଜିନିୟରିଂ ସ୍ନାତକ ସୃଷ୍ଟି କରୁଛି । ନୂଆ ସେଣ୍ଟର ଅଫ୍ ଏକ୍ସଲେନ୍ସ ଏବଂ ଡିପ୍ ନ୍ୟୁଟ୍ରାଲ ନେଟ୍ୱାର୍କ ଲ୍ୟାବ୍ ପ୍ରତିଷ୍ଠାକୁ ଗୁରୁତ୍ୱ ଦିଆଯାଉଛି । ଓଡ଼ିଶାକୁ ପୂର୍ବ ଭାଗର ରିସର୍ଚ୍ଚ କ୍ୟାପିଟାଲ ଭାବେ ଗଢ଼ି ତୋଳିବା ରାଜ୍ୟ ସରକାରଙ୍କ ଲକ୍ଷ୍ୟ ।
ନିକଟରେ ମଞ୍ଜୁରି ଦିଆଯାଇଥିବା ୨ ସେମିକଣ୍ଡକ୍ଟର ୟୁନିଟ୍ ରାଜ୍ୟକୁ ନୂଆ ପରିଚୟ ଦେବ । ରାଜ୍ୟ ଚିପ୍ ଡିଜାଇନ ଏବଂ ସେମିକଣ୍ଡକ୍ଟର କ୍ଷେତ୍ରରେ ନୂଆ ଅଧ୍ୟାୟ ଯୋଡିବ । ଏଠାରେ ଗ୍ଲୋବାଲ୍ କାପାବିଲିଟି ସେଣ୍ଟର ସ୍ଥାପନ ହେବ ଯାହା ଗ୍ଲୋବାଲ ଫିନ୍ଟେକ୍ ଏବଂ ଟେକ୍ନୋଲୋଜି କମ୍ପାନୀଗୁଡ଼ିକୁ ନିବେଶ କରିବାକୁ ଆକୃଷ୍ଟ କରିବ । ନ୍ୟାସନାଲ ମିଶନରେ ଓଡ଼ିଶା ଏ କ୍ଷେତ୍ରରେ ନେତୃତ୍ୱ ନେବ ।
ଏହି ଅବସରରେ ଶ୍ରୀ ମାଝୀ ଭାରତନେତ୍ର ହାକାଥନ୍ର ଶୁଭାରମ୍ଭ କରିଥିଲେ । ରାଜ୍ୟ ଆଇଟି ଏବଂ ଇଲେକଟ୍ରୋନିକ୍ସ ମନ୍ତ୍ରୀ ମୁକେଶ ମହାଲିଙ୍ଗ କହିଲେ, ଚଳିତ ବର୍ଷ ୨୩ ବିଲିୟନ ଡଲାର ନୂଆ ନିବେଶ ସହ ନବସୃଜନର ଏକ ପ୍ରମୁଖ ସ୍ଥଳ ଭାବେ ଉଭା ହେଉଛି । ବିଶ୍ୱ ସ୍ତରୀୟ ଭିତ୍ତିଭୂମି ସହ ରାଜ୍ୟ ସରକାର ନିବେଶକଙ୍କୁ ସବୁ ପ୍ରକାର ସୁଯୋଗ ପ୍ରଦାନ କରୁଛନ୍ତି ।
ଜିଏଫ୍ଟିଏନ, ସିଙ୍ଗାପୁରର ସିଇଓ ସ୍ୱପ୍ନେନ୍ଦୁ ମହାନ୍ତି କହିଲେ, ନୂଆ ପଦକ୍ଷେପ ଏସିଆ ପ୍ରଶାନ୍ତ ମହାସାଗରୀୟ ଫାଇନାନ୍ସିଆଲ ଟେକ୍ନୋଲୋଜି ହବ୍ ପାଇଁ ରାସ୍ତା ଖୋଲିବ । ବିଶ୍ୱର ଆର୍ଥିକ ଇକୋସିଷ୍ଟମ ସହ ଓଡ଼ିଶାକୁ ଯୋଡ଼ିବାରେ ଏହା ସହାୟତା କରିବ । ଉଚ୍ଚ ଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ସୂରଜ, ବଜାଜ୍ ଆଲିଆଞ୍ଜ ସିଏମ୍ଡି ତପନ ସିଙ୍ଘଲ, ରାଜ୍ୟ ଆଇଟି ସଚିବ ବିଶାଳ ଦେବ ପ୍ରମୁଖ ଉପସ୍ଥିତ ଥିଲେ ।
