କଟକ,୨୭/୦୨: କଟକ ମହାନଗର ନିଗମ(ସିଏମ୍ସି)ରେ ପରିମଳ ପରିଚାଳନା କ୍ଷେତ୍ରରେ ଆଉ ଏକ ନୂଆ ପଦକ୍ଷେପ ଗ୍ରହଣ କରାଯାଇଛି । ବିଭିନ୍ନ ମହାନଗର ନିଗମ ପରେ ଏବେ ସିଏମ୍ସିରେ ନିର୍ଗତ ହେଉଥିବା ଜୈବ ବର୍ଜ୍ୟବସ୍ତୁରୁ ଉତ୍ପନ ହେବ ଇନ୍ଧନ ଗ୍ୟାସ୍ । ସାଧାରଣ ଲୋକଙ୍କ ପାଇଁ ଏହାକୁ ସଂରକ୍ଷିତ କରି ପ୍ରଦାନ କରାଯିବ । ଏଥିପାଇଁ ଜଗତପୁର ଅଞ୍ଚଳରେ ତିଆରି କରାଯିବ ବାୟୋ ମିଥାନେସନ୍ ପ୍ଲାଣ୍ଟ୍ । ଏହି ପ୍ଲାଣ୍ଟ୍ ନିର୍ମାଣ କରିବାକୁ ବଜେଟ୍ରେ ୩୦ କୋଟି ଟଙ୍କା ବ୍ୟୟ ଅଟକଳ କରାଯାଇଛି । ପରିମଳ ପରିଚାଳନା କ୍ଷେତ୍ରରେ ଏହା ବେଶ୍ ସହାୟକ ହେବ ।
ସିଏମ୍ସିରେ ଏବେ ଦୈନିକ ୨୩୪.୨୫ ମେଟ୍ରିକ୍ ଟନ୍ ଆବର୍ଜନା ବାହାରୁଛି । ସେଥିରେ ୧୧୯.୭୪ ମେଟ୍ରିକ୍ ଟନ୍ ଓଦା ଆବର୍ଜନା ତଥା ଜୈବ ଆବର୍ଜନା ଥିବାବେଳେ ୧୧୪.୫୧ ମେଟ୍ରିକ୍ ଟନ୍ ହେଉଛି ଶୁଖିଲା ଅଳିଆ । ତେବେ ସିଏମ୍ସିରୁ ବର୍ତ୍ତମାନ ବାହାରୁଥିବା ୨୩୪ ମେଟ୍ରିକ୍ ଟନ୍ରୁ ୧୫୦ ମେଟ୍ରିକ୍ ଟନ୍ ଆବର୍ଜନାକୁ ପ୍ରକ୍ରିୟାକରଣ କରାଯାଉଥିଲାବେଳେ ଏବେ ଦୈନିକ ୮୪.୨୫ ମେଟ୍ରିକ୍ ଟନ୍ ଆବର୍ଜନା ଚକ୍ରଧରପୁରରେ ଯାଇ ଗଦା ହେଉଛି । ଏହା ମଧ୍ୟରେ ସହରରେ ଥିବା ଏମ୍ସିସି ଓ ଏମ୍ଆର୍ଏଫ୍ ବନ୍ଦ ହେବା ପରିସ୍ଥିତିରେ । ତେଣୁ ସହରରେ ନିର୍ଗତ ହେଉଥିବା ଆବର୍ଜନା ପରିମାଣ ଦିନକୁ ଦିନ ବଢୁଥିଲାବେଳେ ଏହାକୁ ନଷ୍ଟ କରିବା ପାଇଁ ସିଏମ୍ସି ପାଇଁ ବଡ ଚିନ୍ତାର ବିଷୟ ପାଲଟିଛି । ଏଭଳି ସ୍ଥିତିରେ ସିଏମ୍ସି ଦ୍ୱାରା ଜୈବ ଆବର୍ଜନାରୁ ଇନ୍ଧନ ଗ୍ୟାସ୍ ଉତ୍ପାଦନ ପାଇଁ ଯୋଜନା କରାଯାଇଛି ।
ଏଥିପାଇଁ ୩୦ କୋଟି ବ୍ୟୟରେ ଜଗତପୁର ଅଞ୍ଚଳରେ ବାୟୋ ମିଥାନେସନ୍ ପ୍ଲାଣ୍ଟ୍ ତିଆରି ହେବ । ସେଠାରେ ପ୍ରଥମ ପର୍ଯ୍ୟାୟରେ ମିଥେନ୍ ଗ୍ୟାସ୍କୁ ରନ୍ଧନ କ୍ଷେତ୍ରରେ ବ୍ୟବହାର କରାଯିବ । ତାହାପରେ ପାୱାର୍ ପ୍ଲାଣ୍ଟ୍ ସ୍ଥାପନ କରାଯାଇ ସେଥିରୁ ବିଦ୍ୟୁତ୍ ଶକ୍ତି ଉତ୍ପନ କରାଯିବ ବୋଲି ସିଏମ୍ସି କର୍ତ୍ତୃପକ୍ଷ ଯୋଜନା କରିଛନ୍ତି । ଯାହା ସିଏମ୍ସିର ରାଜସ୍ୱ ବୃଦ୍ଧି କରିବା ସହିତ ସାଧାରଣ ଲୋକଙ୍କ ପାଇଁ ଲାଭଦାୟକ ମଧ୍ୟ ହେବ ।
