ବ୍ରଜରାଜନଗର, ୧୦/୦୬ : ଝାରସୁଗୁଡ଼ା ଜିଲ୍ଲା ବ୍ରଜରାଜନଗର ଅଞ୍ଚଳର ଜଣେ ବରିଷ୍ଠ କମ୍ୟୁନିଷ୍ଟ ଶ୍ରମିକ ନେତା ଅନିତ ଚକ୍ରବର୍ତ୍ତୀ (୭୨ ବର୍ଷ)ଙ୍କ ଦେହାନ୍ତ ହୋଇଛି। ଏକ ଘରୋଇ ଡ଼ାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ସେ ଶେଷ ନିଃଶ୍ଵାସ ତ୍ୟାଗ କରିଛନ୍ତି।
ସୂଚନା ଅନୁସାରେ, ବ୍ରଜରାଜନଗର ଏମସିଏଲ କଲୋନୀ ମହାବୀର ନଗର ଅଞ୍ଚଳରେ କ୍ୱାର୍ଟରରେ ରହୁଥିବା ବ୍ରଜରାଜନଗର ଅଞ୍ଚଳର ବରିଷ୍ଠ କମ୍ୟୁନିଷ୍ଟ ଶ୍ରମିକ ନେତା ଅନିତ ଚକ୍ରବର୍ତ୍ତୀ ମେ ୨ ତାରିଖରେ ଅସୁସ୍ଥ ହୋଇପଡ଼ିଥିଲେ। ତାଙ୍କୁ ବରଗଡ଼ ବିକାଶ ହସ୍ପିଟାଲରେ ଭର୍ତ୍ତି କରାଯାଇଥିଲା। ଗଳାରେ ଇନଫେକ୍ସନ ଥିବାରୁ ଅକ୍ସିଜେନ୍ ଲେବୁଲ୍ କମି ଯାଇଥିଲା। ସ୍ଵାସ୍ଥ୍ୟାବସ୍ଥା ଗୁରୁତର ହେବାରୁ ଗତ ୨୯ ତାରିଖ ଦିନ ତାଙ୍କୁ ଭୁବନେଶ୍ଵର ସମ୍ ଅଲ୍ଟିମେଟକୁ ସ୍ଥାନାନ୍ତର କରାଯାଇଥିଲା। ଚିକିତ୍ସାଧିନ ଅବସ୍ଥାରେ ଆଜି ଭୋର୍ ୩ଟା ୪୦ରେ ତାଙ୍କର ମୃତ୍ୟୁ ହୋଇଛି।
ଅନିତ ଚକ୍ରବର୍ତ୍ତୀ ଏଆଇଟିୟୁସି ରାଜ୍ୟ ସାଧାରଣ ସମ୍ପାଦକ, ଆଇଏନଡବ୍ଲୁଏସ ସହ ସମ୍ପାଦକ, ଏମସିଏଲ ଜେସିସି ସଦସ୍ୟ ସେଫଟି ବୋର୍ଡ ସଦସ୍ୟ ଥିଲେ। ମୃତ୍ୟୁ ସମୟରେ ତାଙ୍କର ଏକମାତ୍ର ପୁତ୍ର ସୁକାନ୍ତ ଚକ୍ରବର୍ତ୍ତୀ ଓ ତାଙ୍କର ପୁତୁରା ଉପସ୍ଥିତ ଥିଲେ। ତାଙ୍କର ମୃତ୍ୟୁ ଖବର ଶୁଣିବା ପରେ ବିଭିନ୍ନ ଶ୍ରମିକ ସଙ୍ଗଠନ ମହଲରେ ଶୋକ ପ୍ରକାଶ ପାଇଛି। ତାଙ୍କର ମରଶରୀର ଭୁବନେଶ୍ୱରରୁ ତାଳଚେର ଅଣାଯିବ ପରେ ବ୍ରଜରାଜନଗର ସ୍ଥିତ ବାସଭବନକୁ ଅଣାଯିବ ବୋଲି ସୂଚନା ରହିଛି।
