ନୂଆଦିଲ୍ଲୀ,୧୪/୦୪: ଅନ୍ତର୍ଜାତୀୟ ବଜାରରେ ଅଶୋଧିତ ତେଲ ଦର ୪ ବର୍ଷର ସର୍ବନିମ୍ନ ସ୍ତରକୁ ଖସିଛି । ଏବେ ବ୍ୟାରେଲ ପିଛା ଏହାର ଦର ୬୫.୪୧ ଡଲାର ରହିଛି । ୨୦୨୧ ଏପ୍ରିଲରେ ବ୍ୟାରେଲ ପିଛା ଆଶୋଧିତ ତେଲ ଦର ୬୩.୪୦ ଡଲାର ସ୍ତରରେ ଥିଲା । ଅଶୋଧିତ ତେଲ ଦର କମିବା ଯୋଗୁ ଏବେ ତୈଳ ବିପଣନ କମ୍ପାନିଗୁଡ଼ିକର ଲାଭ ଐତିହାସିକ ରେକର୍ଡ ସ୍ତର ଛୁଇଁଛି ।
ରେଟିଂ ଏଜେନ୍ସି ଗୁଡ଼ିକର ଆକଳନ ମୁତାବକ, ଏବେ ତେଲ କମ୍ପାନି ପେଟ୍ରୋଲ ଲିଟର ପିଛା ୧୨ରୁ ୧୫ ଟଙ୍କା ଏବଂ ଡିଜେଲ ଉପରେ ୬ରୁ ୧୨ ଟଙ୍କାର ଲାଭ କମାଉଛନ୍ତି । ମାତ୍ର ଦର ହ୍ରାସ ଲାଗି ଏବେ କମ୍ପାନିଙ୍କ ମଧ୍ୟରେ ସ୍ପୃହା ନାହିଁ । ଗତ ଗୋଟିଏ ବର୍ଷ ହେବ ତେଲ କମ୍ପାନି ଗୁଡ଼ିକ ଦରରେ କୌଣସି ହ୍ରାସ କରିନାହାନ୍ତି । ଅନ୍ତର୍ଜାତୀୟ ବଜାରରେ ଅଶୋଧିତ ତେଲ ଦର କମିବା ଯୋଗୁ ଘରୋଇ ବଜାରରେ ତେଲର ଖୁଚୁରା ଦରରେ ହ୍ରାସ ହେବ ବୋଲି ଆଶା କରାଯାଉଥିଲା । ହେଲେ ସରକାର ତେଲ ଉପରେ ୨ ଟଙ୍କାର ଉତ୍ପାଦ ଟିକସ ବଢ଼ାଇ ଦେଲେ । ଫଳରେ କମ୍ପାନିଗୁଡ଼ିକ ଏହାକୁ ଆଳ କରି ଦାମ କମାଇବାରୁ ବର୍ତ୍ତିଯାଇଥିବା ବିଶେଷଜ୍ଞ କହିଛନ୍ତି । ଦୀର୍ଘ ସମୟ ହେବ କ୍ଷତିର ଆଳ ଦେଖାଇ କମ୍ପାନିଗୁଡ଼ିକ ଦାମରେ କୌଣସି ହ୍ରାସ କରୁନ ଥିଲେ ।
ସୂଚନା ମୁତାବକ, ଗତ ୫ ବର୍ଷରେ ଦେଶର ୭ ପ୍ରମୁଖ ତେଳ ଏବଂ ଗ୍ୟାସ କମ୍ପାନି ମଧ୍ୟରୁ କେବଳ ଇଣ୍ଡିଆନ ଅଏଲ ୨୦୧୯-୨୦ରେ କ୍ଷତି ସହିଥିଲା । ଏହାବାଦ କମ୍ପାନିଗୁଡ଼ିକ ପ୍ରତିବର୍ଷ ବମ୍ପର ଲାଭ କରୁଛନ୍ତି । ପେଟ୍ରୋଲିୟମ ପ୍ଲାନିଂ ଆଣ୍ଡ ଆନାଲିସିସ ସେଲ୍ ମୁତାବକ, ଗତ ୫ ବର୍ଷରେ ତେଲ ଏବଂ ଗ୍ୟାସ କମ୍ପାନିଗୁଡ଼ିକ ଠାରୁ କେନ୍ଦ୍ର ସରକାର ୩୫ ଲକ୍ଷ କୋଟିର ରାଜସ୍ୱ ଆଦାୟ କରିଛନ୍ତି ।
କେନ୍ଦ୍ର ସରକାରଙ୍କୁ ଉତ୍ପାଦ ଟିକସ, କମ୍ପାନିଗୁଡ଼ିକର ଲାଭାଂଶ ଏବଂ ଆୟକର ବାବଦକୁ ୨୧.୪ ଲକ୍ଷ କୋଟିର ଆୟ ହୋଇଛି । ଏହି ଅବଧିରେ ରାଜ୍ୟଗୁଡ଼ିକ ଭାଟ୍ ଏବଂ ଲାଭାଂଶ ଭାବେ ୧୩.୬ ଲକ୍ଷ କୋଟି ଟଙ୍କା ପାଇଛନ୍ତି । ୨୦୨୩-୨୪ରେ ଦେଶର ୭ ବଡ ତେଲ କମ୍ପାନି ୨.୨୯ ଲକ୍ଷ କୋଟି ଟଙ୍କା ଲାଭ ହାସଲ କରିଛନ୍ତି । ରିଲାଏନ୍ସ ଗତ ୫ ବର୍ଷରେ ୨.୮୬ ଲକ୍ଷ କୋଟି ଟଙ୍କା ଲାଭ କରିଛି । ୨୦୧୯-୨୦ରୁ ୨୦୨୩-୨୪ ଅବଧିରେ ତେଲ କମ୍ପାନି ମୋଟ ୭ ଲକ୍ଷ କୋଟିରୁ ଊଦ୍ଧ୍ୱର୍ ଲାଭ ହାସଲ କରିଥିବା ସୂଚନା ମିଳିଛି ।
