ନୂଆଦିଲ୍ଲୀ: CWC ବୈଠକରେ ପୁଣି ଶାସକ ଦଳକୁ ଟାର୍ଗେଟ କଲେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ । ବୁଧବାର ପାଟନାର ସଦକତ ଆଶ୍ରମରେ ଅନୁଷ୍ଠିତ ହେଉଥିଲା CWC ବୈଠକ । ଏହି ସମୟରେ ଖଡଗେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ବିହାର ମୁଖ୍ୟମନ୍ତ୍ରୀ ନୀତିଶ କୁମାର ଏବଂ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ସମାଲୋଚନା କରିଥିଲେ। ସେ କହିଥିଲେ ଯେ, କେନ୍ଦ୍ରରେ ମୋଦି ସରକାର ଏବଂ ଅନ୍ୟ ରାଜ୍ୟର ବିଜେପି ସରକାର ଗୁଡ଼ିକ ଧାର୍ମିକ ଧ୍ରୁବୀକରଣକୁ ଜଳାଞ୍ଜଳି ଦେବା ଏବଂ ସାମ୍ପ୍ରଦାୟିକ ଭାବନାକୁ ପ୍ରଜ୍ବଳିତ କରିବା ପାଇଁ ନିରନ୍ତର ସୁଯୋଗ ଖୋଜୁଛନ୍ତି।
କଂଗ୍ରେସ ଅଧ୍ୟକ୍ଷ ଆହୁରି ପୁଣି କହିଛନ୍ତି ଯେ, ବିଜେପି ଜାନୁଆରୀ ୨୦୨୪ରେ ନୀତିଶ କୁମାରଙ୍କୁ ପୁନଃ ସମର୍ଥନ କରି ବିହାରରେ NDA ସରକାର ଗଠନ କରିଥିଲା। ନୀତିଶ ସରକାର ବିକାଶର ପ୍ରତିଶ୍ରୁତି ଦେଇଥିଲେ, କିନ୍ତୁ ବିହାରର ଅର୍ଥନୀତି ଏବେ ପଛରେ ପଡ଼ିଛି। କେନ୍ଦ୍ରରୁ କୌଣସି ସ୍ୱତନ୍ତ୍ର ପ୍ୟାକେଜ ନ ପାଇ ଡବଲ-ଇଞ୍ଜିନ୍ ଦାବି ଫମ୍ପା ପ୍ରମାଣିତ ହୋଇଛି।
ସେ କହିଛନ୍ତି କି, ଏହି CWC ବୈଠକ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। "ଆମେ ଏପରି ଏକ ସମୟରେ ବୈଠକ କରୁଛୁ, ଯେତେବେଳେ ଭାରତ ଅନ୍ତର୍ଜାତୀୟ ଏବଂ ଜାତୀୟ ସ୍ତରରେ ଏକ ଅତ୍ୟନ୍ତ ଚ୍ୟାଲେଞ୍ଜିଂ ଏବଂ ଚିନ୍ତାଜନକ ସମୟର ସମ୍ମୁଖୀନ ହେଉଛି।" ସେ ଆହୁରି ମଧ୍ୟ କହିଛନ୍ତି ଯେ, NDA ମେଣ୍ଟ ଭିତରେ ଆଭ୍ୟନ୍ତରୀଣ କନ୍ଦଳ ଏବେ ଖୋଲାଖୋଲି ଭାବରେ ପ୍ରକାଶ ପାଇଛି। ନୀତିଶ କୁମାରଙ୍କୁ ବିଜେପି ମାନସିକ ଭାବରେ ଅବସର ଦେଇଛି। ବିଜେପି ଏବେ ତାଙ୍କୁ ବୋଝ ବୋଲି ଭାବୁଛି।
ଖଡଗେ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ମଧ୍ୟ ତୀବ୍ର ଟାର୍ଗେଟ କରିଛନ୍ତି। ସେ କହିଛନ୍ତି, "ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି ଯେ ୟୁପି ମୁଖ୍ୟମନ୍ତ୍ରୀ ନିଜକୁ ପ୍ରଧାନମନ୍ତ୍ରୀଙ୍କ ଉତ୍ତରାଧିକାରୀ ଭାବନ୍ତି। ସେ ପୂର୍ବରୁ ସଂରକ୍ଷଣକୁ ବିରୋଧ କରି ଏକ ଲେଖା ଲେଖିଥିଲେ। ଏବେ ସେ ଜାତି ଆଧାରିତ ରାଲିକୁ ନିଷିଦ୍ଧ କରିଛନ୍ତି।"
