ବୁର୍ଲା, ୨୮/୧୧: ବୁର୍ଲା ଭିମ୍ସାର୍ରୁ ନବଜାତକ ଚୋରି ଘଟଣାକୁ ଇତିମଧ୍ୟରେ ୪୦ ଘଣ୍ଟାରୁ ଅଧିକ ବିତିଗଲାଣି । ହେଲେ ଶିଶୁପୁତ୍ର କିମ୍ବା ତାକୁ ଚୋରି କରିଥିବା ମହିଳାଙ୍କ ଟେର୍ ପାଉନି ପୁଲିସ । ଅଜ୍ଞାତ ମହିଳା ଏବଂ ଶିଶୁକୁ ଠାବ କରିବା ଲାଗି ସମଗ୍ର ପଶ୍ଚିମ ଓଡ଼ିଶାରେ ପୁଲିସ୍ ହାଇଆଲର୍ଟ ଜାରି କରିଛି । ବୁର୍ଲା, ସମ୍ବଲପୁରଠାରୁ ଆରମ୍ଭ କରି ଜିଲ୍ଲାର ସବୁ ପ୍ରବେଶ ପଥରେ ଜୋର୍ଦାର ଯାଞ୍ଚ ଚାଲିଛି । ଓଡ଼ିଶା-ଛତିଶଗଡ଼ ସୀମା ସିଲ୍ କରାଯିବା ସହ ଜିଲ୍ଲାର ସବୁ ସୀମାରେ କଡ଼ା ଯାଞ୍ଚ କରାଯାଉଛି । ସମ୍ବଲପୁରର ସମସ୍ତ ଥାନା, ବୁର୍ଲା ଏବଂ ହୀରାକୁଦ ଥାନାର ବଛା ବଛା ବରିଷ୍ଠ ପୁଲିସ ଅଧିକାରୀଙ୍କୁ ନେଇ ୪ଟି ଟିମ୍ ଗଠନ କରାଯାଇଛି । ଶିଶୁ ଚୋରିରେ ସମ୍ପୃକ୍ତ ଅଜଣା ମହିଳାଙ୍କ ସମ୍ପର୍କରେ ସୂଚନା ଦେଲେ ୫ ହଜାର ଟଙ୍କା ପୁରସ୍କାର ରାଶି ଦିଆଯିବ ବୋଲି ପୁଲିସ୍ ଘୋଷଣା କରିଛି । ଖୁବ୍ଶୀଘ୍ର ନବଜାତକ ଠାବ ହେବ ବୋଲି ସମ୍ବଲପୁର ଅତିରିକ୍ତ ଏସ୍ପି ହରେଶ ପାଣ୍ଡେ ସୂଚନା ଦେଇଛନ୍ତି ।
ସୂଚନାଯୋଗ୍ୟ, ଛତିଶଗଡ଼ ମହାସମୁନ୍ଦ ଜିଲ୍ଲା ବସନା ଥାନା ବଡ଼େସଜାପାଲି ଗାଁର ମୋହନ ଦାସ ଆସନ୍ନ ପ୍ରସବା ପତ୍ନୀଙ୍କୁ ଗତ ୨୪ ତାରିଖ ରାତିରେ ଭିମ୍ସାର୍ରେ ଭର୍ତ୍ତି କରିଥିଲେ । ୨୫ ତାରିଖ ଭୋର୍ରେ ମହିଳା ଜଣକ ଏକ ପୁତ୍ର ସନ୍ତାନ ଜନ୍ମ ଦେଇଥିଲେ । ପ୍ରସବ ପରେ ୱାର୍ଡରେ ଥିବା ଜଣେ ଅଜଣା ମହିଳା ମନ୍ଦ ଉଦ୍ଦେଶ୍ୟ ରଖି ଦମ୍ପତିଙ୍କ ସହ ସମ୍ପର୍କ ସ୍ଥାପନ କରିଥିଲେ । ଗତ ମଙ୍ଗଳବାର କୌଶଳକ୍ରମେ ନବଜାତକକୁ ନେଇ ଚମ୍ପଟ୍ ମାରିଥିଲେ । ଭିମ୍ସାରରୁ ଶିଶୁଚୋରି ଆଲୋଡ଼ନ ଖେଳାଇ ଦେଇଥିବାବେଳେ ପୁଲିସ୍ ରାତି ତମାମ୍ ଖୋଜାଖୋଜି କରିଥିଲା । ବିଭିନ୍ନ ସ୍ଥାନରେ ଲାଗିଥିବା ସିସିଟିଭି ଯାଞ୍ଚ ସହ ଜିଲ୍ଲା ଓ ଜିଲ୍ଲା ବାହାରେ ଚଢ଼ଉ କରୁଛି ।
ଅନ୍ୟପଟେ ଆଖି ଆଗରେ ଅବୋଧ ଶିଶୁ ଚୋରି ହୋଇଯିବା ଘଟଣାରେ ପ୍ରସୂତି ସ୍ତବ୍ଧ ହୋଇଯାଇଛନ୍ତି । ତାଙ୍କ ଆଖିରୁ ଲୁହ ଶୁଖୁନାହିଁ । ପ୍ରସବ ପାଇଁ ଅସ୍ତ୍ରୋପଚାର ହୋଇଥିବାରୁ ୫ଦିନ ପରେ ତାଙ୍କର ଡିସ୍ଚାର୍ଜ ହୋଇଥାଆନ୍ତା । ଅସ୍ତ୍ରୋପଚାରକୁ ତିନିଦିନ ବିତିଥିବାବେଳେ ଆଉ ଦୁଇଦିନ ପରେ ପ୍ରସୂତିଙ୍କୁ ଡିସ୍ଚାର୍ଜ କରାଯିବ । ଏହାରି ମଧ୍ୟରେ ନବଜାତକକୁ ଉଦ୍ଧାର କରାଗଲେ ସେମାନେ ଖୁସିରେ ଘରକୁ ଫେରିବେ ବୋଲି ମୋହନ କହିଛନ୍ତି । ଅପରପକ୍ଷେ ପୁଲିସ ଟିମ୍ ମୋହନ ଓ ତାଙ୍କ ସ୍ତ୍ରୀଙ୍କୁ ଭେଟି ବିଭିନ୍ନ ଦିଗକୁ ନେଇ ପଚରାଉଚରା କରିଛି । ନବଜାତକ ମିଳିଯିବ ବୋଲି ଆଶ୍ୱାସନା ଜଣାଇଛି ।
