ଭୁବନେଶ୍ୱର,୩୧/୦୫: ୨୦୨୧ ଓ ୨୦୨୨ ଶିକ୍ଷାବର୍ଷରେ ରାଜ୍ୟ ସରକାର ଡିପ୍ଲୋମା ଇନ୍ ଏଲିମେଣ୍ଟାରୀ ଏଜୁକେସନ (ଡିଇଏଲ୍ଇଡି) ତଥା ସିଟି ପାଠ୍ୟକ୍ରମ ବନ୍ଦ କରିଦେଲେ । ଛାତ୍ରଛାତ୍ରୀଙ୍କ ଦାବି ଓ ଅଭିଯୋଗ ପରେ ୨୦୨୩-୨୫ ଶିକ୍ଷାବର୍ଷ ପାଇଁ ନାମଲେଖା ହେଲା । ଏହାପରେ ଗତ ବର୍ଷ ଅର୍ଥାତ୍ ୨୦୨୪-୨୬ ଶିକ୍ଷା ବର୍ଷ ପାଇଁ ନାମଲେଖା ହେବ ନ ହେବ ସେ ନେଇ ଦ୍ୱନ୍ଦ୍ୱ ସୃଷ୍ଟି ହୋଇଥିଲା ।
ଶେଷରେ ଜୁନ୍ ମାସରେ ନାମଲେଖା ପ୍ରକ୍ରିୟା ଆରମ୍ଭ ହେଲା । ଚଳିତବର୍ଷ ଉଚ୍ଚଶିକ୍ଷା ବିଭାଗ ମାର୍ଚ୍ଚ ୨୪ ତାରିଖରୁ ବିଏଡ୍, ଏମ୍ଏଡ୍ ନାମଲେଖା ପାଇଁ ପ୍ରକ୍ରିୟା ଆରମ୍ଭ କରିଛି । ଏପରିକି ଏହାର ପ୍ରବେଶିକା ପରୀକ୍ଷା ଆଉ ୨ ଦିନ ପରେ ହେବ । କିନ୍ତୁ ବିଦ୍ୟାଳୟ ଓ ଗଣଶିକ୍ଷା ବିଭାଗ ସିଟି ନାମଲେଖା ନେଇ ସ୍ପଷ୍ଟତା ଆଣିନି । ଚଳିତବର୍ଷ ନାମଲେଖା ହେବ ନା ନାହିଁ ତାକୁ ନେଇ ଚିନ୍ତାରେ ଶିକ୍ଷାର୍ଥୀ ।
ଉଚ୍ଚ ମାଧ୍ୟମିକ ଶିକ୍ଷା ପରିଷଦ ପରିଚାଳିତ ଯୁକ୍ତ ଦୁଇ ପରୀକ୍ଷା ଫଳ ଗତ ୨୧ ତାରିଖରୁ ପ୍ରକାଶ ପାଇଛି । ସେହିପରି କେନ୍ଦ୍ରୀୟ ମାଧ୍ୟମିକ ଶିକ୍ଷା ପରିଷଦ ପରିଚାଳିତ ଦ୍ୱାଦଶ ଶ୍ରେଣୀ ପରୀକ୍ଷା ଫଳ ମେ ୧୩ରୁ ପ୍ରକାଶ ପାଇଛି । ଯୁକ୍ତ ତିନି ନାମଲେଖା ପାଇଁ ଏପ୍ରିଲ ୧୬ରୁ ଆବେଦନ ଆରମ୍ଭ ହୋଇଥିଲେ ହେଁ ଏଯାବତ୍ ରହିଥିବା ସିଟ୍ଠୁ କମ୍ ପିଲା ଆବେଦନ କରିଛନ୍ତି । ପିଜି ନାମଲେଖା ପାଇଁ ୩୦,୮୦୨ ସିଟ୍ ଥିବା ବେଳେ ଏହାର ୨ ଗୁଣା ଅର୍ଥାତ୍ ୬୨ ହଜାର ପିଲା ଆବେଦନ କରିଛନ୍ତି । କିନ୍ତୁ ବିଏଡ୍ ନାମଲେଖା ପାଇଁ ୨୭୫୦ ସିଟ୍ ଥିବା ବେଳେ ଏହାର ୪୮ ଗୁଣା ପିଲା ଆବେଦନ କରିଛନ୍ତି । ଏଥିରୁ ସ୍ପଷ୍ଟ ହେଉଛି ଶିକ୍ଷାର୍ଥୀମାନେ ନିଯୁକ୍ତିର ଅଧିକ ଆଶା ଥିବା କୋର୍ସ କରିବାକୁ ଇଚ୍ଛୁକ ହେଉଛନ୍ତି ।
୨୦୨୪-୨୬ ଶିକ୍ଷାବର୍ଷରେ ୩୦ ଜିଲ୍ଲାର ୬୮ଟି ପ୍ରତିଷ୍ଠାନରେ ୬୫୫୦ ସିଟି ସିଟ୍ ପାଇଁ ନାମଲେଖା ହୋଇଥିଲା । ଏଥିପାଇଁ ୭୫,୯୨୩ ଜଣ ପିଲା ପଞ୍ଜୀକରଣ କରିଥିଲେ । ୬୩, ୭୭୮ଜଣ ଆବେଦନ କରିଥିଲେ । ଅର୍ଥାତ୍ ଉପଲବ୍ଧ ସିଟ୍ର ୧୨ ଗୁଣା ଅଧିକ ଆବେଦନ କରିଥିଲେ । କୌଣସି ସ୍ଥାନରେ ସିଟ୍ ଖାଲି ପଡ଼ିନଥିଲା । ବରଂ ଯୁକ୍ତ ତିନିରେ ସିଟ୍ ଖାଲି ପଡ଼ିଥିଲା । ଏଥିରୁ ସ୍ପଷ୍ଟ ଯେ ପିଲାମାନେ ସିଟି ନାମଲେଖା ପାଇଁ ଆଗ୍ରହୀ ଅଛନ୍ତି । ସିଟି ନାମଲେଖା ପାଇଁ ଦାୟିତ୍ୱରେ ଥିବା ଶିକ୍ଷକ ଶିକ୍ଷା ପ୍ରତିଷ୍ଠାନ (ଏସ୍ସିଇଆର୍ଟି) ନାମଲେଖା ସଂପର୍କିତ କୌଣସି ସୂଚନା ଦେଇନାହିଁ । ଫଳରେ ପିଲାଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ବୋଲି ଶିକ୍ଷାବିତ୍ କହିଛନ୍ତି । ଏସ୍ସିଇଆର୍ଟିର ଜଣେ ବରିଷ୍ଠ ଅଧିକାରୀ କହିଛନ୍ତି, ଚଳିତବର୍ଷ ନାମଲେଖା ସମ୍ଭାବନା ରହିଛି । ଏଥିପାଇଁ ସରକାରଙ୍କ ପାଖରୁ ଅନୁମତି ମିଳିସାରିଛି । ବିଜ୍ଞପ୍ତି ପ୍ରକାଶ ପୂର୍ବରୁ ଆନୁସଙ୍ଗିକ ପ୍ରସ୍ତୁତି ଆରମ୍ଭ ହୋଇଛି ।
