ନୂଆଦିଲ୍ଲୀ,୧୨।୭: ଦଲାଇ ଲାମାଙ୍କ ଉତ୍ତରାଧିକାରୀକୁ ନେଇ ଚୀନ୍ ପୂର୍ବରୁ ଅସନ୍ତୁଷ୍ଟ ଅଛି। ଏବେ ଏବେ ତାଙ୍କର ଲଦାଖ ଗସ୍ତ ଡ୍ରାଗନକୁ ଆହୁରି ଉତ୍ତେଜିତ କରିପାରେ।  ଦଲାଇ ଲାମା ଶନିବାର ହିମାଚଳ ପ୍ରଦେଶର ଧର୍ମଶାଳାରୁ ଏକ ମାସ ପାଇଁ ଲଦାଖରେ ଆସି ପହଁଞ୍ଚିଛନ୍ତି। ସେ ଭାରତୀୟ ବାୟୁସେନାର C-130 ବିମାନ ମାଧ୍ୟମରେ ଲେହ ବିମାନବନ୍ଦରରେ ପହଞ୍ଚିଥିଲେ। ଲେହ ବିମାନବନ୍ଦରରେ ତାଙ୍କ ବିମାନ ଅବତରଣ କରିବା ମାତ୍ରେ ତାଙ୍କୁ କଡ଼ା ସୁରକ୍ଷା ମଧ୍ୟରେ ଅଣାଯାଇଥିଲା। 

ଭାରତ ସରକାର ଚଳିତ ବର୍ଷ ଦଲାଇ ଲାମାଙ୍କୁ Z+ କାଟାଗୋରୀ ସୁରକ୍ଷା ଯୋଗାଇ ଦେଇଛନ୍ତି। ତାଙ୍କୁ ଲେହ ବିମାନବନ୍ଦରରେ CRPF କମାଣ୍ଡୋଙ୍କ ସୁରକ୍ଷାରେ ବାହାରକୁ ଅଣାଯାଇଥିଲା। ଏହା ବ୍ୟତୀତ, ଲଦାଖ ପୋଲିସ ମଧ୍ୟ ତାଙ୍କ ସୁରକ୍ଷା ପାଇଁ ସ୍ୱତନ୍ତ୍ର ବ୍ୟବସ୍ଥା କରିଛି। ଦଲାଇ ଲାମା ଏକ ମାସ ପାଇଁ ଲଦାଖରେ ରହିବେ ଏବଂ ଏହି ସମୟ ମଧ୍ୟରେ ସେ ସାଧାରଣ ସଭା ଏବଂ ଧାର୍ମିକ କାର୍ଯ୍ୟକ୍ରମରେ ଅଂଶଗ୍ରହଣ କରିପାରିବେ। ଏହି କାରଣରୁ, ପ୍ରଶାସନ ତାଙ୍କ ସୁରକ୍ଷା ବ୍ୟବସ୍ଥା ବିଷୟରେ ସମ୍ପୂର୍ଣ୍ଣ ସତର୍କ।

ଏଭଳି ଏକ ରଣନୈତିକ ସମ୍ବେଦନଶୀଳ ଅଞ୍ଚଳକୁ ଦଲାଇ ଲାମାଙ୍କ ଗସ୍ତ ଚୀନକୁ ଏକ କଡ଼ା ବାର୍ତ୍ତା ଦେବା ଭଳି ରହିବ। ଦଲାଇ ଲାମାଙ୍କ ଶେଷଥର ୨୦୨୩ ରେ ଲଦାଖ ଗସ୍ତରେ ଆସିଥିଲେ। ଆମେରିକାରେ ତାଙ୍କ ଆଣ୍ଠୁ ଅସ୍ତ୍ରୋପଚାର ଯୋଗୁଁ ଜୁଲାଇ ୨୦୨୪ରେ ତାଙ୍କର ଲଦାଖ ଗସ୍ତ ବାତିଲ କରାଯାଇଥିଲା।

ବର୍ତ୍ତମାନ ତାଙ୍କର ଗସ୍ତ ଏପରି ସମୟରେ ହେଉଛି ଯେତେବେଳେ ତାଙ୍କ ଉତ୍ତରାଧିକାରୀ ବିଷୟରେ ଆଲୋଚନା ଜୋର ଧରିଛି। ଏହା ମଧ୍ୟରେ ତାଙ୍କ କାର୍ଯ୍ୟାଳୟରୁ ଏକ କଡ଼ା ବୟାନ ଆସିଛି -  କୁହାଯାଇଛି 'ଏହି ମାମଲାରେ ଅନ୍ୟ କାହାର ହସ୍ତକ୍ଷେପ କରିବାର ଅଧିକାର ନାହିଁ।' ଏହି ମନ୍ତବ୍ୟକୁ ଚୀନ୍ ବିରୁଦ୍ଧରେ ଏକ ପରୋକ୍ଷ ଆକ୍ରମଣ ଭାବରେ ବିବେଚନା କରାଯାଉଛି।