କଟକ/କୁଆଁପାଳ,୭।୬ : ତିନି ଦିନ ଧରି ଘର ବନ୍ଦ ଥିଲା। ସନ୍ଦେହରେ ଲୋକେ ପୁଲିସକୁ ଖବର ଦେଇଥିଲେ। ପୁଲିସ ତହସିଲଦାରଙ୍କ ଉପସ୍ଥିତିରେ ଘର କବାଟ ଭାଙ୍ଗି ଥିଲା। ପ୍ରେମୀ ଯୁଗଳଙ୍କ ମୃତଦେହ ଉଦ୍ଧାର କରିଥିଲା। ମାହାଙ୍ଗା ବ୍ଲକ ଖନ୍ଦୋଳ ଗ୍ରାମରେ ଏପରି ଘଟଣା ଦେଖିବାକୁ ମିଳିଛି।
ଘଟଣାରୁ ପ୍ରକାଶ ଯେ, ମାଛୁଆତି ଅଂଚଳର ଦୁର୍ଲଭ ଭୋଇଙ୍କ ଝିଅ ଚିନ୍ମୟୀ ଭୋଇ ଖନ୍ଦୋଳ ଗ୍ରାମରେ କ୍ଷୀରୋଦ ଚନ୍ଦ୍ର ଲେଙ୍କାଙ୍କ ଘରେ ଭଡ଼ା ନେଇ ରହିଥିଲେ। ରାଇସୁଙ୍ଗୁଡା ମେଡିକାଲରେ ସେ ନର୍ସ ଭାବେ କାର୍ଯ୍ୟ କରୁଥିଲେ। ସବୁଦିନ ସେ ମେଡିକାଲରେ ଡ୍ୟୁଟି କରିବାକୁ ସକାଳୁ ଯାଇ ସନ୍ଧ୍ୟାରେ ଫେରନ୍ତି। ଗତ ତିନିଦିନ ଧରି ସେ ଘରୁ ବାହାରିନଥିଲେ। ଏ ସମ୍ପର୍କରେ ପଡୋଶୀ ଓ ଘର ମାଲିକ ଜାଣିବା ପରେ ସେମାନେ ମାହାଙ୍ଗା ଥାନାକୁ ଖବର ଦେଇଥିଲେ। ପୁଲିସ ଘଟଣାସ୍ଥଳରେ ପହଂଚି ତହସିଲଦାରଙ୍କ ଉପସ୍ଥିତିରେ ଘର ଭାଙ୍ଗି ଚିନ୍ମୟୀଙ୍କ ସମେତ ଜଣେ ଯୁବକଙ୍କ ମୃତଦେହ ଜବତ କରିଛି। ଏବେ ସୁଦ୍ଧା ଯୁବକଙ୍କ ପରିଚୟ ମିଳିପାରିନାହିଁ।
