ନବରଙ୍ଗପୁର,୧୨।୫ ( ଆପ୍ର): ନବରଙ୍ଗପୁର ସହର ନିକଟ କେଶରୀଗୁଡା ଗାଁର ପୋଖରୀରୁ ଜଣେ ନିଖୋଜ ଯୁବକଙ୍କ ମୃତଦେହ ଉଦ୍ଧାର ହୋଇଛି । ମୃତ ଯୁବକ ଜଣକ ହେଲେ ଟୁନୁ ହରିଜନ ଭିଜନ (୩୮)। ତାଙ୍କ ଘର ନବରଙ୍ଗପୁର ସହର ଚାଉଁରିଆଗୁଡାରେ ।
ଦୁଇ ଦିନ ତଳେ ଟୁନୁ ଅସୁସ୍ଥ ହୋଇପଡିବାରୁ ତାଙ୍କୁ ଜିଲ୍ଲା ମୁଖ୍ୟ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା । କିନ୍ତୁ ଟୁନୁ କିଛି ନ କହି ଡାକ୍ତରଖାନାରୁ କେଉଁ ଆଡେ ଚାଲିଯାଇଥିଲେ । ପରେ ପରିବାର ପକ୍ଷରୁ ଟୁନୁଙ୍କୁ ବହୁତ ଖୋଜା ଖୋଜି କରିବା ପରେ ମଧ୍ୟ ନ ପାଇବାକୁ ଶେଷକୁ ନବରଙ୍ଗପୁର ଥାନାରେ ଏତଲା ଦେଇଥିଲେ । ସୋମବାର ସକାଳେ କେଶରୀଗୁଡା ଗାଁ ପୋଖରୀରେ ଏକ ମୃତଦେହ ଭାସୁଥୁବା ଗାଁ ଲୋକ ଦେଖି ପୁଲିସ୍ ଓ ଅଗ୍ନିଶମ ବିଭାଗକୁ ଖବର ଦେଇଥିଲେ । ଘଟଣା ସ୍ଥଳରେ ପୁଲିସ ଓ ଅଗ୍ନିଶମ ବିଭାଗ ପହଞ୍ଚି ଶବକୁ ଉଦ୍ଧାର କରି ପରିବାରଙ୍କୁ ହସ୍ତାନ୍ତର କରିଥିଲେ । ଏନେଇ ନବରଙ୍ଗପୁର ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି।
