ଭୁବନେଶ୍ୱର, ୧୯।୧: ପୂର୍ବତନ ମନ୍ତ୍ରୀ ନବଦାସଙ୍କୁ ହତ୍ୟା ଘଟଣା । ଏନେଇ ଝିଅ ଦୀପାଳିଙ୍କ ବଡ଼ ବୟାନ । ସିବିଆଇ ତଦନ୍ତ ଦାବି କରିଥିବା ବେଳେ ସରକାରଙ୍କୁ ଲିଖିତ ଭାବେ ଦାବି କରିବାକୁ କହିଛନ୍ତି ଦୀପାଳୀ । ଖୁବ୍ଶୀଘ୍ର ପରିବାର ପକ୍ଷରୁ ସରକାରଙ୍କୁ ଲେଖି ଦିଆଯିବ ବୋଲି କହିଲେ ଦୀପାଳି । ପୂର୍ବରୁ ସେ ମୁହଁ ଖୋଲୁନଥିଲେ । ବିଜେପି ଅଭିଯୋଗ କରୁଥିଲା । ଏବେ ସେ ମୁହଁ ଖୋଲିବା ପରେ ବିଜେପି ଚୁପ୍ ରହିଛି ।
ବିଜେପି ସରକାର ଯଦି ପ୍ରକୃତରେ ନବଦାସ ହତ୍ୟାକାଣ୍ଡର ଗୁମର ଖୋଲିବାକୁ ଚାହୁଁଛି, ତେବେ ସିବିଆଇ ତଦନ୍ତ ଆଦେଶ ଦେବାକୁ ଆହ୍ୱାନ ଦେଲେ ଦୀପାଳି । ନବଦାସଙ୍କ ହତ୍ୟାକାଣ୍ଡର ଅଧିକ ତଦନ୍ତ ହେବା ଆବଶ୍ୟକ । ସିବିଆଇ ତଦନ୍ତ ହେଲେ ପ୍ରକୃତ ରହସ୍ୟ ଜଣାପଡ଼ିବ । ଅନ୍ୟପଟେ, ନବ ଦାସଙ୍କ ହତ୍ୟା ମାମଲାର ଷଡ଼ଯନ୍ତ୍ର ନେଇ ପରୋକ୍ଷରେ ପାଣ୍ଡିଆନଙ୍କୁ ଟାର୍ଗେଟ୍ କଲେ ପ୍ରଦୀପ ପୁରୋହିତ । ତାଙ୍କ କହିବାନୁସାରେ, ନବୀନ ପଟ୍ଟନାୟକଙ୍କ ପରେ ଯିଏ ଓଡ଼ିଶାର ମୁଖ୍ୟମନ୍ତ୍ରୀ ହେବାକୁ ସ୍ୱପ୍ନ ଦେଖୁଥିଲେ ସିଏ ନବ ଦାସ ହତ୍ୟାକାଣ୍ଡର ମୁଖ୍ୟ ଷଡ଼ଯନ୍ତ୍ରକାରୀ । ଆଜି ତାହା ପ୍ରମାଣିତ ହେବାକୁ ଯାଉଛି । ଦୁର୍ଭାଗ୍ୟର ବିଷୟ ସେ ସମୟରେ ତାଙ୍କ ପରିବାର ସମ୍ପୂର୍ଣ୍ଣ ନିରବ ରହିଲେ । କ୍ଷମତା ଲୋଭ ଓ ସମ୍ପତି ଲୋଭରେ ତଦନ୍ତ ଠିକ୍ ହେଉଥିବା କହିଲେ । ଯଦି ପ୍ରକୃତରେ ତାଙ୍କ ପରିବାର ନବ ଦାସଙ୍କ ହତ୍ୟାକାରୀକୁ ଧରିବାକୁ ଚାହୁଁଛନ୍ତି ତେବେ ଓଡ଼ିଶା ସରକାରଙ୍କ ନିକଟରେ ନିଜ ଅଭିଯୋଗ ଲିଖିତ ଭାବେ ଦିଅନ୍ତୁ । ନବ ଦାସଙ୍କ ହତ୍ୟାକାଣ୍ଡର ଅଧିକ ତଦନ୍ତ ହେବା ଆବଶ୍ୟକ ରହିଛି ଏବଂ ପରଦା ପଛର ଖଳନାୟକମାନେ ସାମ୍ନାକୁ ଆସିବା ଦରକାର ବୋଲି ସେ କହିଛନ୍ତି ।
କହିରଖୁ କି, ୨୦୨୩ ଜାନୁଆରୀ ୨୯ ତାରିଖରେ ପୂର୍ବତନ ସ୍ୱାସ୍ଥ୍ୟ ମନ୍ତ୍ରୀ ନବ ଦାସଙ୍କୁ ଝାରସୁଗୁଡ଼ା ଗାନ୍ଧୀଛକଠାରେ ଗୁଳିମାଡ଼ ହୋଇଥିଲା । ଏହି ଘଟଣାରେ ତାଙ୍କର ମୃତ୍ୟୁ ଘଟିଥିଲା । ଏସ୍ଆଇ ଗୋପାଳ ଦାସ ତାଙ୍କୁ ଗୁଳି କରିଥିଲେ । ଗୋପାଳକୁ ଗିରଫ କରାଯିବା ପରେ ସେ ଜଣେ ମାନସିକ ରୋଗ ବୋଲି ତାଙ୍କ ପତ୍ନୀ ବୟାନ ଦେଇଥିଲେ । ସେପଟେ ବିରୋଧୀ ଏହାକୁ ଷଡ଼ଯନ୍ତ୍ର ବୋଲି କହିଥିଲେ । ଏଥିରେ ଅନେକ ବଡ଼ ବଡ଼ ନେତା ମଧ୍ୟ ସାମିଲ ଥିବା ଚର୍ଚ୍ଚା ଉଠିଥିଲେ । ସେପଟେ ହତ୍ୟାକାଣ୍ଡର ଖିଅ ଖୋଜିବାକୁ କ୍ରାଇମବ୍ରାଞ୍ଚ ତଦନ୍ତ ଜାରି ରଖିଥିଲା । ଗୋପାଳ ଦାସର କିଛି ହାତଲେଖା ଚିଠି ମଧ୍ୟ କ୍ରାଇମବ୍ରାଞ୍ଚ ଜବତ କରିଥିଲା । ତେବେ ବର୍ତ୍ତମାନ ଝିଅ ଦୀପାଳି ସିବିଆଇ ତଦନ୍ତ ପାଇଁ କହିଛନ୍ତି ।
