ନୂଆଦିଲ୍ଲୀ,୨୦/୧୦: ଆଲୋକର ପର୍ବ ଦୀପାବଳିରେ ରାଜଧାନୀ ଦିଲ୍ଲୀରେ ବିଷାକ୍ତ ବାୟୁ ପ୍ରଭାବିତ ହୋଇଛି । ଧୂଆଁ ଧୂଆଁ ହୋଇଛି ଦିଲ୍ଲୀ । ଏକ୍ୟୁଆଇ ପ୍ରାୟ ୪୦୦ ପାର୍ କରିଛି । ଲୋକମାନଙ୍କୁ ନିଶ୍ୱାସ ନେବାରେ କଷ୍ଟ ହୋଇଛି । ପ୍ରଦୂଷଣର ସ୍ତର ଏତେ ବଢି ଯାଇଛି ଯେ ବାୟୁ ଗୁଣବତ୍ତା ଆୟୋଗ ଅର୍ଥାତ ସିଏକ୍ୟୁଏମ୍‌ ଗ୍ରାପ୍‌ ୨ ଆଧାରରେ ୧୨ ସୁତ୍ରୀ ଆକ୍ସନ୍‌ ପ୍ଲାନ୍ ଲାଗୁ କରିଛନ୍ତି ।  ପାଗ ଏବଂ ପବନର ସ୍ଥିତି ସମୀକ୍ଷା ପରେ ଗ୍ରାପ-୧ ଲାଗୁ କରିବାକୁ ନିଷ୍ପତ୍ତି ହୋଇଥିଲା ।

କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ସିପିସିବି) ରିପୋର୍ଟ ଅନୁସାରେ ଆଜି ଦିଲ୍ଲୀ ଏୟାର କ୍ୱାଲିଟି 'ଖରାପ' ରହିଛି । ଦିଲ୍ଲୀ ଏନ୍‌ସିଆର୍‌ର ଆନନ୍ଦ ବିହାରରେ ବାୟୁ ଗୁଣବତ୍ତା ସୂଚକାଙ୍କ ସବୁଠୁ ଖରାପ ଅଛି । ଆନନ୍ଦ ବିହାରରେ ଏକ୍ୟୁଆଇ ୪୧୭ ରେକର୍ଡ ହୋଇଛି । ଯାହା ଏହି ଅଞ୍ଚଳକୁ ସର୍ବାଧିକ ପ୍ରଦୂଷିତ କରିଛି । ବିଜୟ ନଗର (ଗାଜଆବାଦ) ଏକ୍ୟୁଆଇ ୩୪୮, ଏବଂ ନୋଏଡ଼ାରେ ୩୪୧ ରେକର୍ଡ ହୋଇଛି । ସେହିପରି ନୋଏଡା ସେକ୍ଟର ୧ରେ ୩୪୪ ରହିଥିବା ବେଳେ ଆନନ୍ଦ ବିହାରରେ ସ୍ଥିତି ଚିନ୍ତାଜନକ ରହିଛି । ରବିବାର ସନ୍ଧ୍ୟାରେ ଏକ୍ୟୁଆଇ ୩୦୦ ଥିଲା ରାତି ୭ଟା ସୁଦ୍ଧା ୩୦୨ରେ ପହଞ୍ଚିଥିଲା ଯାହା ବହୁତ ଖରାପ ଶ୍ରେଣୀରେ ଆସୁଛି । ବର୍ତ୍ତମାନ ଏନ୍‌ସିଆରରେ ଗ୍ରାପ ଷ୍ଟେଜ-୨ ଅଧୀନରେ ସବୁ ପଦକ୍ଷେପ ତୁରନ୍ତ ଲାଗୁ ହେବ । ୧୨ ସୁତ୍ରୀ ଆକ୍ସନ ପ୍ଲାନ ଅନୁସାରେ, ରାସ୍ତା ସଫା, ଧୂଳି ନୟନ୍ତ୍ରଣ, ନିର୍ମାଣସ୍ଥଳର ଯାଞ୍ଚ, ହଟ୍‌ସ୍ପଟ ଅଞ୍ଚଳରେ କାର୍ଯ୍ୟାନୁଷ୍ଠାନ, ନିରନ୍ତର ବିଦ୍ୟୁତ୍ ଯୋଗାଣ, ଡିଜି ସେଟ୍ ନିୟନ୍ତ୍ରଣ ଏବଂ ଜନସଚେତନା ଅଭିଯାନ ଜାରି ରହିବ ।

ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କ ଅପିଲ୍‌- ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତା ଦୀପାବଳିରେ କେବଳ ସବୁଜ ବାଣ ଫୁଟାଇବାକୁ ରାଜଧାନୀବାସୀଙ୍କୁ ଆହ୍ୱାନ କରିଛନ୍ତି । ଦିଲ୍ଲୀକୁ ପ୍ରଦୂଷଣରୁ ରକ୍ଷା କରିବାକୁ ଲୋକଙ୍କୁ ଅନୁରୋଧ କରିଛନ୍ତି । ଦୀପ ଜାଳି, ରଙ୍ଗୋଲି ପକାଇ ଏବଂ ମିଠା ବାଣ୍ଟି ପାରମ୍ପରିକ ଆକାରରେ ଏହି ପର୍ବ ପାଳନ କରିବାକୁ ଲୋକଙ୍କୁ  ଅପିଲ୍‌ କରିଛନ୍ତି। ଆଲୋକର ପର୍ବ ଦୀପାବଳି ଶାନ୍ତି ଏବଂ ସୌହାର୍ଦ୍ଦ୍ୟର ପରିବେଶରେ ପାଳନ କରାଯିବା ଉଚିତ୍‌ ବୋଲି କହିଛନ୍ତି ।