ନୂଆଦିଲ୍ଲୀ: ଜାତୀୟ ରାଜଧାନୀକୁ ଭୟଙ୍କର ପ୍ରଦୂଷଣ ଅଶନିଃଶ୍ବାସୀ କରିପକାଇଥିବା ବେଳେ ଦିଲ୍ଲୀ ମଟ୍ରୋ ବଡ଼ ରେକର୍ଡ ସୃଷ୍ଟି କରିଛି । ନଭେମ୍ବର ୧୮ (ସୋମବାର)ରେ ଦିଲ୍ଲୀ ମେଟ୍ରୋରେ ସର୍ବାଧିକ ଯାତ୍ରୀ ଯାତ୍ରା କରିଛନ୍ତି । ଦିଲ୍ଲୀ ମେଟ୍ରୋ ଯୋଗାଯୋଗ ଇତିହାସରେ ଗୋଟିଏ ଦିନରେ ସବୁଠୁ ଅଧିକ ୭୮.୬୭ ଲକ୍ଷ ଯାତ୍ରୀ ଯାତ୍ରା କରିଥିବା ଜଣାପଡ଼ିଛି । ଏହା ପୂର୍ବରୁ ଅଗଷ୍ଟ ୨୦ରେ ୭୭.୪୯ ଲକ୍ଷ ଲୋକ ଦିଲ୍ଲୀ ମଟ୍ରୋରେ ଯାତ୍ରା କରିଥିଲେ ।
ଗୁରୁଗ୍ରାମର ମିଲେନିୟମ ସିଟି ସେଣ୍ଟରରୁ ସମାୟପୁର ବଡଲିକୁ ଯୋଗ କରୁଥିବେ ୟେଲୋ ମେଟ୍ରୋ ଲାଇନ୍ ସବୁଠୁ ଅଧିକ ବ୍ୟସ୍ତବହୁଳ ରୁଟ୍ ବୋଲି ଜଣାପଡ଼ିଛି । ଗତକାଲି ଏହି ଲାଇନ୍ରେ ୨୦.୯୯ ଲକ୍ଷ ଲୋକ ଯାତ୍ରା କରିଛନ୍ତି । ଏହା ପରେ ବ୍ଲୁ-ଲାଇନ୍ରେ ୨୦.୮୦ ଲକ୍ଷ ଏବଂ ରେଡ୍ ଲାଇନ୍ରେ ୮.୫୬ ଲକ୍ଷ ଲୋକ ଯାତ୍ରା କରିଥିବା ରିପୋର୍ଟରୁ ଜଣାପଡ଼ିଛି । ସେହିଭଳି ପିଙ୍କ ଲାଇନ୍ ଏବଂ ଭାଓଲେଟ୍ ଲାଇନ୍ରେ ଯଥାକ୍ରମେ ୮.୧୫ ଲକ୍ଷ ଏବଂ ୭.୯୩ ଲକ୍ଷ ଲୋକ ଯାତ୍ରା କରିଛନ୍ତି ।
ଦିଲ୍ଲୀର ବାୟୁ ପ୍ରଦୂଷଣ ଅତି ଭୟଙ୍କର ଶ୍ରେଣୀରେ ଥିବା ବେଳେ ଡିଏମଆରସି ଅଧିକରୁ ଅଧିକ ଲୋକଙ୍କୁ ମେଟ୍ରୋ ବ୍ୟବହାର କରିବାକୁ ପ୍ରୋତ୍ସାହିତ କରୁଥିବା ଦେଖିବାକୁ ମିଳିଛି । ଚାହିଦାକୁ ଦେଖି ଡିଏମଆରସି ସପ୍ତାହନ୍ତରେ ଅଧିକ ୬୦ଟି ଟ୍ରିପ୍ କରାଉଛି । ଡିଏମଆରସି ପକ୍ଷରୁ ଯାତ୍ରୀଙ୍କ ଲାଗି ବ୍ୟାପକ ବ୍ୟବସ୍ଥା କରାଯାଇଛି । ବିଭିନ୍ନ ଅନଲାଇନ୍ ପ୍ଲାଟଫର୍ମରେ ଯାତ୍ରୀ ନିଜ ପାଇଁ ଟିକେଟ୍ କରିପାରୁଛନ୍ତି । ଆଉ ଯାତ୍ରୀଙ୍କୁ ଲମ୍ବା ଧାଡ଼ିରେ ଛିଡ଼ା ହେବାକୁ ପଡ଼ୁନାହିଁ । ସହରରେ କାର୍ବନ ନିର୍ଗମନ ହ୍ରାସ କରିବା ଦିଗରେ ଗୁରୁତ୍ବପୂର୍ଣ୍ଣ ଭୂମିକା ନିଭାଇଥିବା ଦିଲ୍ଲୀ ମେଟ୍ରୋକୁ ଜାତିସଂଘ ପକ୍ଷରୁ ମଧ୍ୟ ବାଃ ବାଃ ମିଳିଛି ।
