ଦାରିଙ୍ଗବାଡି,୧୧/୨(ଆପ୍ର): ଲକ୍ଷ୍ମୀ ବସ୍ ଯୋଜନାରେ ଦାରିଙ୍ଗବାଡି ଠାରୁ ଫୁଲବାଣୀ ଜିଲ୍ଲା ସଦର ମହକୁମା କୁ ଯାତାୟାତ କରିବା ପାଇଁ ରାଜ୍ୟ ସରକାର ଏକ ଏସି ବସ ଚଳାଚଳ କରିବାର ବ୍ୟବସ୍ଥା କରିଥିଲେ । ଗତ ବର୍ଷ ମାର୍ଚ୍ଚ ମାସରୁ ଚଳାଚଳ ଆରମ୍ଭ ହୋଇ ଅଗଷ୍ଟ ମାସ ପର୍ଯ୍ୟନ୍ତ ଚଳାଚଳ ହେଲା । ତାପରେ ଏହି ୬ ମାସରୁ ଉର୍ଦ୍ଧ୍ବ ଦିନ ହେବ ହେବ ଏହି ଏସି ବସ ଆଉ ଚଳାଚଳ କରୁ ନାହିଁ । ଫଳରେ ଲକ୍ଷାଧିକ ଟଙ୍କା ଖର୍ଚ୍ଚ କରି ଯେଉଁ ଏସି ବସ ସରକାରୀ ଆଣିଥିଲେ ତାହା ଏବେ ଦାରିଙ୍ଗବାଡି ପଥପ୍ରାନ୍ତ ସେବା କେନ୍ଦ୍ର ମଧ୍ୟରେ ଠିଆ ହୋଇ ଖତ ଖାଉଛି । ଗାଡ଼ି ଠିଆ ହୋଇ ରହିବା ଫଳରେ ଯାତ୍ରୀ ମାନେ ଯାତାୟାତ କରିବାର ସମସ୍ୟା ଭୋଗୁଥିବା ଦେଖିବାକୁ ମିଳିଛି । ଏଭଳି କିଛି ଅଭିଯୋଗ ଆସିଚି ଦାରିଙ୍ଗବାଡି ଅଞ୍ଚଳରେ ।
ଦାରିଙ୍ଗବାଡି ବ୍ଲକରେ ୨୫ ଟି ପଞ୍ଚାୟତ ରହିଛି। ଲୋକ ସଂଖ୍ୟା ୧ ଲକ୍ଷ ୪୫ ହଜାର ରୁ ଉର୍ଦ୍ଧ । ପ୍ରତ୍ୟେକ ଦିନ ଦାରିଙ୍ଗବାଡି ଅଞ୍ଚଳର ଶହ ଶହ ଲୋକଙ୍କର ଜିଲ୍ଲା ସଦର ମହକୁମାରେ ବିଭିନ୍ନ କାର୍ଯ୍ୟ ରହୁଥିବା ବେଳେ ଲୋକେ ଏସି ବସ ଚଳାଚଳ କରୁ ନଥିବ ଯୋଗୁଁ ଲୋକ ବହୁ ସମସ୍ୟାର ସମ୍ମୁଖୀନ ହେଉଛନ୍ତି । ଏହି ବସ୍ ସକାଳେ ୭ ଟା ବେଳେ ଦାରିଙ୍ଗବାଡି ରୁ ବାହାରି ଫୁଲବାଣୀରେ ସାଢେ଼ ୯ ମଧ୍ୟରେ ପହଞ୍ଚୁ ଥିବା ବେଳେ ପୁଣି ଅପରାହ୍ନ ୪ ଟା ସମୟରେ ଫୁଲବାଣୀ ରୁ ବାହାରି ସନ୍ଧ୍ୟା ୭ ମଧ୍ୟରେ ଦାରିଙ୍ଗବାଡି ରେ ପହଞ୍ଚୁ ଥିଲା । ଫଳରେ ଲୋକେ ଅଫିସ ସମୟ ଅନୁସାରେ ସଠିକ୍ ସମୟରେ ନିଜେ ନିଜର ବିଭିନ୍ନ କାର୍ଯ୍ୟ ସାରି ଫେରି ପାରୁଥିଲେ । ଏପରିକି ମହିଳା ମାନେ ୧୦ ଟଙ୍କା ଦେଇ ଜିଲ୍ଲା ସଦର ମହକୁମା କୁ ଯାତାୟାତ କରି ପାରୁଥିଲେ । ହେଲେ ତାହା ଏବେ ବନ୍ଦ ହୋଇଯାଇ ଥିବା ଯୋଗୁଁ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି । ଖାଲି ଯେ ଦାରିଙ୍ଗବାଡି ଅଞ୍ଚଳର ଲୋକେ ଏହି ବସ ଉପରେ ନିର୍ଭର କରୁଥିଲେ ତାହା ନୁହେଁ ବରଂ କ.ନୂଆଗାଁ, ଫିରିଙ୍ଗିଆ ବ୍ଲକ ଅଞ୍ଚଳର ଲୋକେ ମଧ୍ୟ ଏହି ବସ ଉପରେ ନିର୍ଭର କରୁଥିଲେ । ଏଣୁ ଦାରିଙ୍ଗବାଡି ଭଳି ଏକ ପ୍ରମୁଖ ସ୍ଥାନରୁ ପୁଣି ଥରେ ଏସି ବସ୍ ଚଳାଚଳ କରିବା ପାଇଁ ଅଞ୍ଚଳବାସୀ ଦାବି କରିଛନ୍ତି
