ହରଭଙ୍ଗା,୨/୮ : ବୌଦ୍ଧ ଜିଲ୍ଲାର ଏକ ଜନଗହଳିପୂର୍ଣ୍ଣ ରାସ୍ତା ହେଉଛି ପୁରୁଣାକଟକଠାରୁ ଆଠମଲିକ । ଏହି ସଡ଼କଟି ଧଳପୁର ମହାନଦୀ ସେତୁ ହେବା ଦିନଠାରୁ ସବୁ ଦିନ ଗହଳି ପୂର୍ଣ୍ଣ ଦେଖିବାକୁ ମିଳିଥାଏ । କିନ୍ତୁ ଧଳପୁର ବଜାରରେ ପ୍ରତିଦିନ ସଂଧ୍ୟା ବେଳେ ଦେଖା ଦେଉଛି ଏକ ଭିନ୍ନ ଦୃଶ୍ୟ । ମଦୁଆ ଲୋକମାନେ ଖୁଲମଖୁଲା ବସି ଆଡ଼ା ଜମେଇ ମଦ୍ୟପାନ କରୁଛନ୍ତି । ଏହା ସେମାନଙ୍କ ପାଇଁ ଏକ ଆମୋଦର ଅଞ୍ଚଳ ହୋଇପଡ଼ିଛି । କିନ୍ତୁ ସ୍ଥାନୀୟ ବାସିନ୍ଦା ଓ ବ୍ୟବସାୟୀମାନଙ୍କ ପାଇଁ ଏହା ଅସୁବିଧାଜନକ ଓ ଭୟଭୀତ ହେଉଥିବା ଦେଖିବାକୁ ମିଳିଛି ।
ମଦ ବିକ୍ରି ଓ ମଦ ପିଇବା ସବୁ କିଛି ଖୁଲମ ଖୋଲାରେ ଚାଲୁଛି । ତଥାପି ଅବକାରୀ ବିଭାଗ ଓ ପୁଲିସ ପକ୍ଷରୁ କୌଣସି ପ୍ରତିକ୍ରିୟା ନ ଥିବାରୁ ଜନସାଧାରଣଙ୍କ ମନରେ ଅସନ୍ତୋଷ ଦେଖା ଦେଉଛି । ଏହା ଏକ ଅସୁସ୍ଥ ଓ ଅସୁରକ୍ଷିତ ପରିବେଶ ତିଆରି କରୁଛି । ଧଳପୁର ବଜାରରେ ମଦୁଆଙ୍କ ଆଡ୍ଡା ଓ ଅବକାରୀ ବିଭାଗର ନିରବତା ନେଇ ନିକଟସ୍ଥ କଲେଜ ଓ ଶିକ୍ଷାନୁଷ୍ଠାନମାନଙ୍କରେ ପ୍ରଭାବ ପଡୁଥିବା ସାଧାରଣରେ ଚର୍ଚ୍ଚା ହେଉଛି । ଧଳପୁର ବଜାରଟି ସଂଧ୍ୟା ପରେ ଆଉ ବ୍ୟସ୍ତ ବଜାରର ରୂପ ନୁହେଁ ବରଂ ମଦୁଆଙ୍କ ଆଡ୍ଡାର ଘର ବନିଯାଇଛି । ଅବକାରୀ ବିଭାଗ ଓ ଥାନା ପକ୍ଷରୁ ନିରବତା ଯୋଗୁଁ ଏହା ବ୍ୟାପକ ରୂପ ଧାରଣ କରିଛି । ଏହି ବଜାରର ନିକଟରେ ଅଛି କଲେଜ ଓ ହାଇସ୍କୁଲ ଯେଉଁଠି ଶତାଧିକ ଛାତ୍ରଛାତ୍ରୀ ପଢ଼ୁଛନ୍ତି।
ବଜାର ଓ କଲେଜ ମଧ୍ୟରେ ଅତ୍ୟନ୍ତ ଅଳ୍ପ ଦୂରତା ଥିବା ସତ୍ତ୍ୱେ ମଦ ଖୋଲାମେଲାରେ ବିକ୍ରି ଓ ସେବନ ହେଉଛି । ଏହାର ପ୍ରଭାବ କଲେଜର ଶିକ୍ଷା ପରିବେଶ ଉପରେ ପଡ଼ୁଥିବା ଚର୍ଚ୍ଚା ହେଉଛି । ଛାତ୍ରଛାତ୍ରୀଙ୍କ କହିବା ଅନୁସାରେ ମଦୁଆମାନେ ମଦ ପିଇ ଅସଭ୍ୟ ଭାଷାରେ ଗାଳି ଗୁଲଜ କରୁଛନ୍ତି । ଆମେ କଲେଜରୁ ଘରକୁ ଯିବା ସମୟରେ ଭୟ ଅନୁଭବ କରୁଛୁ । ମାନସିକ ଚାପ ବଢ଼ି ଯାଉଛି । ମଦ ପିଇ ଲୋକମାନେ ରାସ୍ତା ଓ ବଜାର ମଧ୍ୟରେ ବିକୃତ ବ୍ୟବହାର କରନ୍ତି । ଏହି ପରିବେଶରେ କିପରି ଶିକ୍ଷା ହେବ ? ବୋଲି ପ୍ରଶ୍ନ ଉଠାଇଛନ୍ତି। କଲେଜ ଅଧ୍ୟାପକମାନେ କହିଛନ୍ତି, ଏହି ଅବସ୍ଥା ଯଦି ଚାଲେ ତେବେ ଅଭିଭାବକମାନେ ମଧ୍ୟ ତାଙ୍କ ଛୁଆମାନଙ୍କୁ ଏଠାରେ ପଢ଼ିବାକୁ ପଠାଇବେ ନାହିଁ । ଏହା ଶିକ୍ଷା ବ୍ୟବସ୍ଥା ପାଇଁ ଗଭୀର ସଙ୍କେତ । ଯଦି ଏହି ବଜାର ଏଭଳି ରହିବ ତେବେ ଆସନ୍ତା ଦିନରେ ଯୁବପିଢୀଙ୍କ ଭବିଷ୍ୟତ ଅନ୍ଧକାର କୁ ଚାଲିଯିବ। ତା’ପୂର୍ବରୁ ପ୍ରଶାସନ ପକ୍ଷରୁ ଭୟଙ୍କର ଓ କଠୋର କାର୍ଯ୍ୟାନୁଷ୍ଠାନ ଆବଶ୍ୟକ ବୋଲି ସ୍ଥାନୀୟ ନାଗରିକ, ଅଭିଭାବକ ଓ ଶିକ୍ଷାପ୍ରେମୀ ଲୋକମାନେ କହୁଛନ୍ତି । ଏହି ବଜାର ଅଞ୍ଚଳରେ ମଦ ବିକ୍ରି ଓ ସେବନ ଉପରେ ତୁରନ୍ତ କାର୍ଯ୍ୟାନୁଷ୍ଠାନ ନେବା ପାଇଁ ଦାବି କରୁଛନ୍ତି । ଅବକାରୀ ବିଭାଗ, ପୁଲିସ ବିଭାଗ ଓ ସ୍ଥାନୀୟ ପ୍ରଶାସନ ଯଦି ତୁରନ୍ତ ପଦକ୍ଷେପ ନ ନେବେ ତେବେ ଶିକ୍ଷା ଓ ସମାଜ ଉପରେ ଏହାର ନକାରାତ୍ମକ ପ୍ରଭାବ ପଡ଼ିବ ବୋଲି ମତ ପ୍ରକାଶ କରିଛନ୍ତି ।
ସୂଚନା ଅନୁସାରେ, ଏହି ମଦ ବିକ୍ରି ଗୁପ୍ତ ଭାବେ ହେଉଛି । ଯାହାର ଫାଇଦା କିଛି ଅସାଧୁ ବ୍ୟକ୍ତି ନେଉଛନ୍ତି । ଏ ବିଷୟରେ ଅବକାରୀ ବିଭାଗ କିମ୍ବା ପୁଲିସ ଏକ ଅଭିଯାନ ଚଲାଇ ଦୃଢ଼ ପଦକ୍ଷେପ ନିଅନ୍ତୁ ବୋଲି ସ୍ଥାନୀୟ ଲୋକମାନେ ଆଶା କରୁଛନ୍ତି ।
