ଯାଜପୁର ୨୧/୧୧: ଯାଜପୁର ସଦର ଥାନା ଅନ୍ତର୍ଗତ ୨୦ନଂ ଜାତୀୟ ରାଜପଥର ବୁଢ଼ା ଘାଟ ନିକଟରେ ବୁଧବାର ରାଜନୈତିକ ହିଂସା ଦେଖିବାକୁ ମିଳିଛି । ବିଜେଡି-ବିଜେପି ମଧ୍ୟରେ ଖଣ୍ଡଯୁଦ୍ଧ ହୋଇଛି । ଧର୍ମଶାଳା ବିଧାୟକ ହିମାଂଶୁ ଶେଖର ସାହୁ ଆକ୍ରମଣର ଶିକାର ହୋଇଥିବା ବେଳେ ତାଙ୍କ ଗାଡ଼ିକୁ ମଧ୍ୟ ଭଙ୍ଗାରୁଜା କରାଯାଇଛି । ପୁଲିସ ଘଟଣାକୁ ନିୟନ୍ତ୍ରଣ କରିଥିଲେ ମଧ୍ୟ ଯାଜପୁର ସଦର ଥାନାରେ ବିଜେପି କର୍ମୀ ଓ ଯାଜପୁର ଟାଉନ୍ ଥାନାରେ ବିଜେଡି କର୍ମୀ ଧାରଣା ଦେଇଛନ୍ତି ।ତେବେ ଉତ୍ତେଜନା ଲାଗି ରହିଥିବାରୁ ସେଠାରେ ପୁଲିସ ଫୋର୍ସ ମୁତୟନ କରାଯାଇଛି। ଏହି ଘଟଣାରେ ପୋଲିସ ୪ ଜଣଙ୍କୁ ଅଟକ ରଖି ପଚରାଉଚରା ଆରମ୍ଭ କରିଛି ।
ସୂଚନା ମୁତାବକ, ବହୁ ବର୍ଷ ହେବ ବିରଜା ମନ୍ଦିର ନିକଟରେ ବିରଜା ହାଟ ଚାଲି ଆସୁଥିଲା । ପୂର୍ବ ସରକାର ସମୟରେ ବିରଜା ପ୍ରକଳ୍ପ ପାଇଁ ଏହି ହାଟକୁ ସେଠାରୁ ସନ୍ଥମାଧବ ନିକଟକୁ ସ୍ଥାନାନ୍ତର କରାଯାଇଥିଲା । ସେଠାରେ ବ୍ୟବସାୟ ଭଲ ହେଉନଥିବାରୁ ବେପାରିମାନେ ଏହା ବିରୋଧରେ ସ୍ୱର ଉତ୍ତୋଳନ କରିଥିଲେ । ଏ ନେଇ ସେମାନେ କିଛି ଦିନ ତଳେ ବିକ୍ଷୋଭ କରିବା ସହ ଜିଲ୍ଲାପାଳଙ୍କ ସହ ମୁଖ୍ୟମନ୍ତ୍ରୀଙ୍କୁ ଦାବିପତ୍ର ପ୍ରଦାନ କରିଥିଲେ । ଜିଲ୍ଲାପାଳ ଏହା ଉପରେ ବିଚାର କରିବେ ବୋଲି ପ୍ରତିଶ୍ରୁତି ଦେଇଥିଲେ । ବୁଧବାର ସ୍ଥାନୀୟ ଅଞ୍ଚଳରେ ଏକ ପ୍ରଚାର ଗାଡ଼ି ବୁଲିଥିଲା । ଗୁରୁବାର ବିରଜା ହାଟ ପୂର୍ବ ପରି ବିରଜା ମନ୍ଦିର ନିକଟରେ ବସିବ ବୋଲି ପ୍ରଚାର କରାଯାଇଥିଲା।
ଏହାପରେ କିଛି ବିଜେଡି କର୍ମୀଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଥିଲା । ବିରଜା ପ୍ରକଳ୍ପକୁ ଭଣ୍ଡୁର କରାଯାଉଥିବା ସେମାନେ ଅଭିଯୋଗ କରି ସନ୍ଧ୍ୟାରେ ୨୦ନଂ ଜାତୀୟ ରାଜପଥକୁ ଯାଜପୁର ସଦର ଥାନା ଅନ୍ତର୍ଗତ ବୁଢ଼ାଘାଟ ନିକଟରେ ଟାୟାର ଜାଳି ଅବରୋଧ କରିଥିଲେ । ରାସ୍ତାରୋକି ସମୟରେ ଧର୍ମଶାଳା ବିଧାୟକ ଶ୍ରୀ ସାହୁ ସରକାରୀ କାର୍ଯ୍ୟରେ ଜିଲ୍ଲାପାଳଙ୍କ କାର୍ଯ୍ୟାଳୟକୁ ଆସୁଥିଲେ ।
ରାସ୍ତାରୋକ ଦେଖି ତାଙ୍କ ଗାଡ଼ି ସେଠାରେ ଅଟକି ଥିବା ବେଳେ କିଛି ବିଜେଡି କର୍ମୀ ଉତ୍ତ୍ୟକ୍ତ ହୋଇ ତାଙ୍କ ନିକଟକୁ ମାଡ଼ି ଆସିଥିଲେ । ରଡ୍ ଦ୍ୱାରା ତାଙ୍କ ଗାଡ଼ିକୁ ଭଙ୍ଗାରୁଜା କରିବା ସହ ତାଙ୍କୁ ମାଡ଼ ମାରିଥିଲେ ଓ ତାଙ୍କ ସୁନାଚେନ୍ ଛିଡ଼ାଇ ନେଇଥିଲେ । ଯାଜପୁରର ପୂର୍ବତନ ବିଧାୟକ ପ୍ରଣବ ପ୍ରକାଶ ଦାସ ଏହି ଆକ୍ରମଣ ପାଇଁ ସେମାନଙ୍କୁ କହିଥିବା ନେଇ ଆକ୍ରମଣକାରୀ କହୁଥିବା ବିଧାୟକ ଶ୍ରୀ ସାହୁ ଅଭିଯୋଗ କରିଛନ୍ତି । ଏଥି ସହିତ ପୂର୍ବତନ ବିଧାୟକଙ୍କ ଭାଇ ତାଙ୍କୁ ଫୋନ୍ କରି ଘଟଣାସ୍ଥଳରୁ ଚାଲିଯିବାକୁ ଧମକ ଦେଇଥିବା ବିଧାୟକ ଶ୍ରୀ ସାହୁ ଅଭିଯୋଗରେ ଉଲ୍ଲେଖ କରିଛନ୍ତି ।
ବିଧାୟକ ଶ୍ରୀ ସାହୁଙ୍କୁ ଆକ୍ରମଣର ଖବର ପାଇ ତାଙ୍କର ବହୁ ସଂଖ୍ୟକ ସମର୍ଥକ ତଥା ବିଜେପି କର୍ମୀ ଘଟଣାସ୍ଥଳକୁ ଆସିଥିଲେ । ଏହାପରେ ଉଭୟ ବିଜେଡି ଓ ବିଜେପି କର୍ମୀଙ୍କ ମଧ୍ୟରେ ଖଣ୍ଡଯୁଦ୍ଧ ଆରମ୍ଭ ହୋଇଯାଇଥିଲା । ଠେଙ୍ଗା, ରଡ୍ ଦ୍ୱାରା ଆକ୍ରମଣ, ପ୍ରତି ଆକ୍ରମଣ ଚାଲିଥିଲା। ଏଥିରେ ୪ରୁ ୫ଜଣ ଆହତ ମଧ୍ୟ ହୋଇଥିଲେ । ପୁଲିସ ପହଞ୍ଚି ପରିସ୍ଥିତି ନିୟନ୍ତ୍ରଣ କରିଥିଲା । ଏହାପରେ ବିଜେଡି କର୍ମୀମାନେ ଛତ୍ରଭଙ୍ଗ ଦେଇଥିଲେ । ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବିରେ ବିଜେପି କର୍ମୀମାନେ ରାସ୍ତା ଉପରେ ବସି ରହିଲେ । କିଛି ସମୟ ପରେ ଏସ୍ପି ୟସ୍ପ୍ରତାପ ଶ୍ରୀମାଲ, ଅତିରିକ୍ତ ଆରକ୍ଷୀ ଅଧିକ୍ଷକ ସୀତିକାନ୍ତ କାନୁନ୍ଗୋ, ଅନିରୁଦ୍ଧ ସାମନ୍ତରାୟ, ଏସ୍ଡିପିଓ ସତ୍ୟବ୍ରତ ଲେଙ୍କାଙ୍କ ସମେତ ଯାଜପୁର ଟାଉନ୍, ସଦର, ବ୍ରହ୍ମବରଦା, ବରୀ, କୁଆଖିଆ ପୁଲିସ ଘଟଣାସ୍ଥଳରେ ପହଞ୍ଚି ବିଧାୟକ ଶ୍ରୀ ସାହୁ ଓ ତାଙ୍କ ସମର୍ଥକଙ୍କୁ ବୁଝାଶୁଝା କରିଥିଲେ । ପରେ ବିଧାୟକ, ଏସ୍ପି ଓ ଅନ୍ୟ ପୁଲିସ ଅଧିକାରୀମାନେ ଯାଜପୁର ସଦର ଥାନାକୁ ଯାଇଥିଲେ । ସେଠାରେ ବିଧାୟକ ଏକ ଲିଖିତ ଅଭିଯୋଗ କରିଥିବା ବେଳେ ତାଙ୍କ ସମର୍ଥକ ମାନେ ଆକ୍ରମଣକାରୀଙ୍କୁ ତୁରନ୍ତ ଗିରଫ ଦାବିରେ ବସି ରହିଛନ୍ତି ।
ଅନ୍ୟପକ୍ଷରେ ବିଜେଡି ନେତା ତଥା ପୂର୍ବତନ ବିଧାୟକଙ୍କ ଭାଇ ଭବପ୍ରସାଦ ଦାସଙ୍କ ନେତୃତ୍ୱରେ କର୍ମୀମାନେ ଯାଜପୁର ଟାଉନ୍ ଥାନାରେ ପହଞ୍ଚିଥିଲେ । ଥାନାରେ ଚିତ୍ତରଂଜନ ବେହୁରିଆ ନାମକ ବ୍ୟକ୍ତି ଅଭିଯୋଗ କରିଥିଲେ । ବିରଜା ପ୍ରକଳ୍ପକୁ ନେଇ ଶହେରୁ ଅଧିକ ବ୍ୟକ୍ତି ବୁଢ଼ାଘାଟ ନିକଟରେ ଛିଡ଼ା ହୋଇ ଆଲୋଚନା କରୁଥିବା ବେଳେ ହଠାତ୍ ବିଧାୟକ ଶ୍ରୀ ସାହୁ ତାଙ୍କ ସମର୍ଥକମାନଙ୍କ ସହ ଘଟଣାସ୍ଥଳରେ ପହଞ୍ଚି ସେମାନଙ୍କୁ ଗାଳିଗୁଲଜ କରିଥିଲେ । ଏହାକୁ ସେମାନେ ବିରୋଧ କରିବାରୁ ବିଧାୟକ ତାଙ୍କର ବହୁ ସମର୍ଥକଙ୍କୁ ଡକାଇଥିଲେ । ସେମାନେ ମାରଣାସ୍ତ୍ର ଧରି ଘଟଣାସ୍ଥଳରେ ପହଞ୍ଚି ଆକ୍ରମଣ କରିଥିଲେ । ଏଥିରେ ଚିତ୍ତରଂଜନଙ୍କ ମୁଣ୍ଡ ଫାଟି ଯାଇଥିବା ବେଳେ ଆହୁରି କିଛି ଆହତ ହୋଇଥିବା ଦର୍ଶାଇଛନ୍ତି ।
ଏ ସଂପର୍କରେ ପୂର୍ବତନ ବିଧାୟକ ପ୍ରଣବ ପ୍ରକାଶ ଦାସ କହିଛନ୍ତି, ମୁଁ ଏ ବିଷୟରେ କିଛି ଜାଣିନଥିଲି । ଦଳୀୟ କାର୍ଯ୍ୟକ୍ରମରୁ ଫେରି ଟିଭିରୁ ଦେଖିଲି । ଗଣତନ୍ତ୍ରରେ ହିଂସାର କୌଣସି ସ୍ଥାନ ନାହିଁ । ବିଜେଡି କିମ୍ବା ମୋ ପରିବାର ହିଂସାରେ ବିଶ୍ୱାସ କରେ ନାହିଁ । ଲୋକମାନେ ବିରଜା ପ୍ରକଳ୍ପ ପାଇଁ ରାସ୍ତାକୁ ଓହ୍ଲାଇଥିଲେ । ଏହି ସମୟରେ ଧର୍ମଶାଳା ବିଧାୟକଙ୍କୁ ଆକ୍ରମଣ ହୋଇଥିବା ମୁଁ ଶୁଣୁଛି । ଏହାକୁ ମୁଁ ନିନ୍ଦା କରୁଛି । ମୋ ଭାଇ ନାଁରେ ବିଧାୟକ ଅଭିଯୋଗ କରୁଥିବାରୁ ମୁଁ ତାକୁ ଥାନାକୁ ପଠାଇଛି । ଯଦି ଦୋଷ ଥାଏ ତେବେ ମୋ ଭାଇ ପ୍ରଥମେ ଗିରଫ ହେବ ବୋଲି ଶ୍ରୀ ଦାସ ପ୍ରକାଶ କରିଛନ୍ତି ।
ଏ ସଂପର୍କରେ ଯାଜପୁର ବିଜେପିର ଜିଲ୍ଲା ସଭାପତି ଗୌତମ ରାୟ କହିଛନ୍ତି, ବିଜେଡି ସବୁବେଳେ ହିଂସାରେ ବିଶ୍ୱାସ କରି ଆସିଛି । ଖଣି, ଖାଦାନ ଲୁଟୁଥିବା ଦୋଷୀଙ୍କୁ ନୂଆ ସରକାର ଧରୁଥିବାରୁ ସେମାନେ ପ୍ରତିହିଂସା ପରାୟଣ ହୋଇ ଏପରି କାଣ୍ଡ ଘଟାଉଛନ୍ତି । ସରକାର ଥିବା ସମୟରେ ଚଳାଇଥିବା ଗୁଣ୍ଡାଗର୍ଦ୍ଦିକୁ ସେମାନେ ଜାରି ରଖିଛନ୍ତି । ଏହାକୁ ବରଦାସ୍ତ କରାଯିବ ନାହିଁ । ଆଇନ୍ ମୁତାବକ ସମସ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଶ୍ରୀ ରାୟ ପ୍ରକାଶ କରିଛନ୍ତି । ସେହିପରି ବିଜେପି ନେତା ସର୍ବେଶ୍ୱର ବେହୁରା ଏହି ଘଟଣାକୁ ନିନ୍ଦା କରିବା ସହ ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।
