ନୂଆଦିଲ୍ଲୀ,୧୧/୦୭: ଝାଡ଼ଖଣ୍ଡର ଧନବାଦ ରେଲୱେ ହସ୍ପିଟାଲର ଅପରେସନ୍ ଥିଏଟର୍ରେ ଅଭାବନୀୟ ଘଟଣା। ଫଲ୍ସ ସିଲିଂ ଭାଙ୍ଗି ଏକ କୁକୁର ତଳେ ପଡ଼ିଥିବା ଦେଖିବାକୁ ମିଳିଛି । ତେବେ କୁକୁର ଗଳିପଡ଼ିବା ସମୟରେ ଜଣେ ରୋଗୀଙ୍କ ଅପରେସନ ଚାଲିଥିଲା । ଫଳରେ ସେଠାରେ ଉପସ୍ଥିତ ରୋଗୀ ଓ ସ୍ୱାସ୍ଥ୍ୟକର୍ମୀ ଅଳ୍ପକେ ବର୍ତ୍ତି ଯାଇଥିବା ବେଳେ ଜଣେ କର୍ମଚାରୀ ଆହତ ହୋଇଛନ୍ତି ।
ସୂଚନା ମୁତାବକ, ଗତ ରବିବାର ଦିନ ରୋଗୀଙ୍କର ଚିକିତ୍ସା ଚାଲିଥିବା ସମୟରେ ଏଭଳି ଘଟଣା ଘଟିଥିଲା। ପ୍ରତ୍ୟକ୍ଷଦର୍ଶୀଙ୍କ ଅନୁସାରେ,ଭେଣ୍ଟିଲେସନ୍ ପାଖରେ ଫଲ୍ସ ସିଲିଂ ନିର୍ମିତ ହୋଇଥିଲା । ଏହା ଜରିଆରେ କୁକୁର ଛାତ ଦେଇ ସିଲିଂ ପର୍ଯ୍ୟନ୍ତ ପହଞ୍ଚିଥିଲା । ଲଗାତାର ବର୍ଷା ଯୋଗୁ କୁକୁରର ଓଜନକୁ ଫଲ୍ସ ସିଲିଂ ସମ୍ଭାଳି ପାରିଲା ନାହିଁ ଯାହା ଫଳରେ ସିଲିଂ ଭାଙ୍ଗିଯାଇଥିଲା । କୁକୁର ସିଲିଂ ସମେତ ଅପରେସନ୍ ଥିଏଟର୍ର ଠିକ୍ ମଝିରେ ପଡ଼ିଥିଲା । ଏହି ସମୟରେ ଅପରେସନ ଥିଏଟରରେ ଜଣେ ରୋଗୀଙ୍କ ସର୍ଜରି ହେଉଥିଲା ।
