ନୂଆଦିଲ୍ଲୀ, ୨୭/୦୧ : ଶାସନକୁ ଫେରିବା ପରେ ଆକ୍ସନ ମୁଡ୍ରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଅବୈଧ ପ୍ରବାସୀଙ୍କ ପାଇଁ ବଢିଲା ଅଡ଼ୁଆ। ଖୋଜି ଖୋଜି ଅବୈଧ ପ୍ରବାସୀଙ୍କୁ ଆମେରିକାରୁ କରାଯାଉଛି ତଡ଼ିପାର୍। ଅବୈଧ ପ୍ରବାସୀଙ୍କୁ ଚିହ୍ନଟ କରିବାକୁ ଏବେ ଗୁରୁଦ୍ଵାରରେ ଚାଲିଛି ସର୍ଚ୍ଚ ଅପରେସନ। ନ୍ୟୁୟର୍କ ଏବଂ ନ୍ୟୁଜର୍ସିର ଗୁରୁଦ୍ଵାରରେ ପଇଁତରା ମାରୁଛନ୍ତି ସୁରକ୍ଷାକର୍ମୀ। ୭ ଲକ୍ଷ ଭାରତୀୟଙ୍କ ପାଇଁ ବଢିଲା ମୁସ୍କିଲ୍।
ସୂଚନାନୁଯାୟୀ, ଟ୍ରମ୍ପଙ୍କ ନିର୍ଦ୍ଦେଶ ପରେ ଆମେରିକାରୁ ଅବୈଧ ପ୍ରବାସୀଙ୍କୁ ଖୋଜି ଖୋଜି ବାହାର କରାଯାଉଛି। ଏବେ ସରକାର ଆଉ ଏକ ବଡ଼ କାର୍ଯ୍ୟାନୁଷ୍ଠାନ ନେଇଛନ୍ତି। ନ୍ୟୁୟର୍କ ଏବଂ ନ୍ୟୁଜର୍ସିରେ ଥିବା ଗୁରୁଦ୍ଵାର ଗୁଡ଼ିକରେ ସର୍ଚ୍ଚ ଅପରେସନ କରାଯାଉଛି। ସୁରକ୍ଷାକର୍ମୀମାନେ ଗୁରୁଦ୍ଵାରରେ ପଇଁତରା ମାରୁଛନ୍ତି। ଯାହାପରେ ଆମେରିକାରେ ରହୁଥିବା ପ୍ରାୟ ୭ ଲକ୍ଷ ଭାରତୀୟଙ୍କ ମୁସ୍କିଲ୍ ବଢିଛି। ସେପଟେ ଟ୍ରମ୍ପଙ୍କ ଏହି କାର୍ଯ୍ୟାନୁଷ୍ଠାନକୁ ଶିଖ୍ ସଙ୍ଗଠନ କଡ଼ା ସମାଲୋଚନା କରିଛନ୍ତି। ଆସ୍ଥା ଏବଂ ପବିତ୍ରତା ଉପରେ ବିପଦ ବୋଲି କହିଛନ୍ତି।
ଏହି ଖବରଟିକୁ ପଢନ୍ତୁ-ଇଣ୍ଡିଆ ସହ ସମ୍ପର୍କକୁ ନେଇ ଇଣ୍ଡୋନେସିଆ ରାଷ୍ଟ୍ରପତିଙ୍କ ବଡ ବୟାନ; କହିଲେ ମୋ ପୂର୍ବପୁରୁଷମାନେ ଭାରତୀୟ
ସେପଟେ ନ୍ୟୁଜର୍ସିର ନେୱାର୍କ ଏୟାରପୋର୍ଟର ଏକ ଘଟଣା ଭାରତୀୟଙ୍କ ପାଇଁ ଚିନ୍ତା ବଢାଇଛି। ବି-୧/ବି-୨ ଭିଜିଟର ଭିଜାରେ ନିଜ ପିଲାମାନଙ୍କୁ ଦେଖା କରିବାକୁ ଆସିଥିବା ଏକ ଭାରତୀୟ ଦମ୍ପତିଙ୍କୁ ଆମେରିକାରେ ଏଣ୍ଟ୍ରି ମିଳିନି। ରିଟର୍ଣ୍ଣ ଟିକଟ ନଥିବାରୁ ସେମାନଙ୍କୁ ଏୟାରପୋର୍ଟରୁ ସିଧା ଭାରତ ଫେରିବାକୁ ପଡ଼ିଛି। ଆମେରିକାର ୨୦୨୫ ଇମିଗ୍ରେସନ ନିୟମରେ ପରିବର୍ତ୍ତନ କରାଯାଇଛି। ନୂଆ ନିୟମ ଅନୁସାରେ ଭିଜିଟର ଭିଜାରେ ଆସିଥିବା ଲୋକ ରିଟର୍ଣ୍ଣ ଟିକେଟ କରିବା ଜରୁରୀ ବୋଲି ନିୟମ ହୋଇଛି। ତେବେ ଅଚାନକ ଇମିଗ୍ରେସନ ନିୟମରେ ପରିବର୍ତ୍ତନ ଯୋଗୁଁ ବହୁ ଯାତ୍ରୀ ଅସୁବିଧାର ସମ୍ମୁଖୀନ ହେଉଛନ୍ତି। ସେପଟେ ଆମେରିକାରେ ଅପ୍ରତ୍ୟାଶିତ ଭାବେ ନିୟମ ପରିବର୍ତ୍ତନ ଯୋଗୁଁ ଯାତ୍ରୀଙ୍କୁ ସାବଧାନ ରହିବାକୁ ଭାରତ ସରକାର ଅପିଲ୍ କରିଛନ୍ତି। ଅଧିକ ସୂଚନା ପାଇଁ ସରକାରୀ ୱେବସାଇଟ୍ ଏବଂ ଟ୍ରାଭେଲ୍ ଏଜେଣ୍ଟଙ୍କ ଠାରୁ ପରାମର୍ଶ ନେବାକୁ କହିଛନ୍ତି।
