ନୂଆଦିଲ୍ଲୀ,୨୦/୧: ବିବାହ କରିଛନ୍ତି ସୁନା ପୁଅ । ହାତକୁ ଦୁଇ ହାତ ହୋଇଛନ୍ତି ଗୋଲ୍ଡନ ବଏ ନୀରଜ ଚୋପ୍ରା । ଭାରତୀୟ ଷ୍ଟାର ଆଥଲେଟିକ ତଥା ଦୁଇଟି ଅଲମ୍ପିକ୍ସ ପଦକ ଜିତିଥିବା ନୀରଜ ଚୋପ୍ରା ବିବାହ ବନ୍ଧନରେ ବାନ୍ଧି ହୋଇଛନ୍ତି । ଟେନିସ୍ ପ୍ଲେୟାର ହିମାନୀ ମୋରଙ୍କୁ ଜୀବନସାଥୀ କରିଛନ୍ତି ଜାଭେଲିନ ତାରକା ନୀରଜ । ସୋସିଆଲ ମିଡିଆ ଆକାଉଣ୍ଟରେ ଫଟୋ ସେୟାର କରି ନୂଆ ଜୀବନ ଆରମ୍ଭ କରିଥିବା ନେଇ ସୂଚନା ଦେଇଛନ୍ତି ନୀରଜ ଚୋପ୍ରା ।
ବିବାହର ଫଟୋ ସେୟାର କରି ନୀରଜ ଲେଖିଛନ୍ତି, 'ପରିବାର ସଦସ୍ୟଙ୍କ ସହ ଜୀବନର ନୂଆ ଅଧ୍ୟାୟ ଆରମ୍ଭ କରିଛି । ଆମ ଦୁହିଁଙ୍କ ଏକାଠୀ କରିଥିବା ପ୍ରତ୍ୟେକ ଆଶୀର୍ବାଦ ପାଇଁ କୃତଜ୍ଞ । ପ୍ରେମରେ ବାନ୍ଧି ହୋଇଛୁ ।' ନୀରଜଙ୍କର ଏହି ପୋଷ୍ଟ ସଙ୍ଗେ ସଙ୍ଗେ ଭାଇରାଲ ହୋଇଥିଲା । ଶୁଭେଚ୍ଛାର ସୁଅ ଛୁଟିଥିଲା ।
କିଏ ହିମାନୀ ମୋର- ନୀରଜ ଚୋପ୍ରାଙ୍କ ପତ୍ନୀ ହିମାନୀ ମୋର ଜଣେ ଟେନିସ ଖେଳାଳୀ । ତାଙ୍କ ଘର ହରିୟାଣାର ଲାରସାଉଲି । ସେ ଆମେରିକାର ଲସ ଏଞ୍ଜେଲ୍ସସ୍ଥିତ ସାଉଥଇଷ୍ଟର୍ଣ୍ଣ ଲୁସିଆନା ବିଶ୍ବ ବିଦ୍ୟାଳୟରେ ଶିକ୍ଷା ଗ୍ରହଣ କରିଛନ୍ତି । ଫ୍ରାଙ୍କନିସ୍ ପିୟର୍ସ ବିଶ୍ବ ବିଦ୍ୟାଳୟରେ ସହକରୀ ମହିଳା ଟେନିସ କୋଚ ଭାବେ କାର୍ଯ୍ୟ କରିଛନ୍ତି ।ଆଇଟା ମାନ୍ୟତା ତାଲିକାରେ ଶ୍ରେଷ୍ଠ ୩୦ଜଣଙ୍କ ମଧ୍ୟରେ ରହିଥିଲେ ହିମାନୀ । ୨୦୧୮ରେ ଆଇଟା ମାନ୍ୟତାରେ ସେ ସିଙ୍ଗଲ୍ସରେ ୪୨ତମ ଏବଂ ଡବଲ୍ସରେ ୨୭ତମ ସ୍ଥାନରେ ରହିଥିଲେ । ନୀରଜ ଓ ହିମାନୀଙ୍କ ବିବାହ ଦୁଇ ଦିନ ତଳେ ଅନୁଷ୍ଠିତ ହୋଇଥିବା ତାଙ୍କ ପରିବାର ପକ୍ଷରୁ କୁହାଯାଇଛି । ଦୁହେଁ ବିଦେଶ ଯାଇଛନ୍ତି । ଭାରତ ଫେରିବା ପରେ ବିବାହ ଭୋଜିର ଆୟୋଜନ ହେବ ବୋଲି ନୀରଜଙ୍କ ଦାଦା ସୁରେନ୍ଦ୍ର ଚୋପ୍ରା କହିଛନ୍ତି ।
ଏହା ବି ପଢନ୍ତୁ...ହାତକୁ ଦୁଇ ହାତ ହେଲେ ବଲିଉଡ୍ ଗାୟକ ଦର୍ଶନ ରାୱଲ, ସୋସିଆଲ ମିଡ଼ିଆରେ ଫଟୋ ଭାଇରାଲ
ନୀରଜଙ୍କ ବିବାହ ଖବର କାହାକୁ ଜଣା ନଥିଲା । ଦୁଇ ପରିବାର ମଧ୍ୟରେ ଖବର ଗୁପ୍ତ ରହିଥିଲା । ବିବାହ ଫଟୋ ସୋସିଆଲ ମିଡିଆରେ ଦେଖିବାକୁ ପରେ ସମସ୍ତେ ଆଶ୍ଚର୍ଯ୍ୟ ପ୍ରକାଶ କରିଥିଲେ । ନବବିବାହିତ ଯୋଡିଙ୍କୁ ଶୁଭେଚ୍ଛା ଜଣାଇଥିଲେ ନୀରଜଙ୍କ ଫ୍ୟାନ୍ସ ।
