ଭୁବନେଶ୍ୱର,୧୪/୧୧: କାର୍ତ୍ତିକ ପୂର୍ଣ୍ଣିମାରେ ଆଉ ଭାସିବନି କାଗଜ କିମ୍ବା ସୋଲ ଡଙ୍ଗା । ପୋଖରୀ ହେବନି ପ୍ରଦୂଷଣ । ଜମି ରହିବନି କୁଢ଼ କୁଢ଼ ଅଳିଆ । କାରଣ ବଜାରରେ ମିଳୁଛି ଗୋବର ଡଙ୍ଗା । ଏହାର ବେଶ୍ ଚାହିଦା ଥିବା ବେଳେ ଦାମ୍ ବି ବହୁତ ଶସ୍ତା । କଳିଙ୍ଗ ଗୋ ସେବା ଧାମ ଏହି ଡଙ୍ଗା ତିଆରି କରୁଛନ୍ତି । ଏହି ହାତ ତିଆରି ଗୋବର ଡ଼ଙ୍ଗା ପରିବେଶ ସୁରକ୍ଷା ଓ ଜଳ ପ୍ରଦୂଷଣକୁ ରୋକିବା ଦିଗରେ ସହାୟକ ହେବ । ପାଖାପାଖି ୮୦୦ରୁ ଅଧିକ ଡଙ୍ଗା ତିଆରି କରାଯାଇଛି ଯାହାର ଦାମ୍ ୧୦ ଟଙ୍କା, ୨୦ଟଙ୍କା, ୩୦ଟଙ୍କା ରଖାଯାଇଛି। ଭୁବନେଶ୍ୱରର ବିଭିନ୍ନ ଛକରେ ଏହି ଡଙ୍ଗା ବିକ୍ରି କରାଯାଉଛି । ଡଙ୍ଗା ତିଆରି କରିବାକୁ ୪ଦିନ ଲାଗୁଛି । ଏହା ପାଣିରେ ଭାସିଲେ ୪ଘଣ୍ଟାରେ ମିଳେଇ ଯିବ । ଚନ୍ଦ୍ର ଶେଖର ଦାଶ, ମନୋରଞ୍ଜନ ପୃଷ୍ଟି, ପୁଷ୍ପାଞ୍ଜଳି ମିଶ୍ର, ପ୍ରଦୀପ୍ତ ବେହେରା, ଚନ୍ଦ୍ରକାନ୍ତ ପାଲ, ଦେବଦତ୍ତ ରାଉତ, ଶୋଭାରାଣୀ ମହାନ୍ତି ପ୍ରମୁଖ ଏହି ଡଙ୍ଗା ତିଆରି କରୁଛନ୍ତି ।
