ନୂଆଦିଲ୍ଲୀ: ଅବକାରୀ ଦୁର୍ନୀତି ମାମଲାରେ ଆମ ଆଦମୀ ପାର୍ଟି (ଆପ୍) ଏବଂ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କ ବିରୋଧରେ ଚାର୍ଜସିଟ୍ ଦାଖଲ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) । ଦିଲ୍ଲୀର ରାଉଜ୍ ଆଭେନ୍ୟୁ କୋର୍ଟରେ ଇଡି ଦାଖଲ କରିଥିବା ସପ୍ଲିମେଣ୍ଟାରି ଚାର୍ଜସିଟ୍ରେ କେଜ୍ରିଓ୍ବାଲଙ୍କ ସହିତ ତାଙ୍କ ପାର୍ଟି ଆପ୍କୁ ଅଭିଯୁକ୍ତ ଦର୍ଶାଇଛି । ଆମ ଆଦମୀ ପାର୍ଟି ବିରୋଧରେ ଚାର୍ଜସିଟ୍ ଦାୟର ପରେ ଏବେ ଦଳର ନେତାମାନଙ୍କ ପାଇଁ ଅଡ଼ୁଆ ବଢ଼ିପାରେ । ସେହିଭଳି ପାର୍ଟିର ସଂଯୋଜକ ହୋଇଥିବାରୁ କେଜ୍ରିଓ୍ବାଲଙ୍କ ପାଇଁ ଆଗାମୀ ରାସ୍ତା ସହଜ ହୋଇନପାରେ ।
ଅନ୍ୟପଟେ ଇଡି ପକ୍ଷରୁ ସୁପ୍ରିମକୋର୍ଟରେ କୁହାଯାଇଛି ଯେ, ଅବକାରୀ ଦୁର୍ନୀତି ମାମଲାରେ କଥିତ ଆୟ ସଂପର୍କରେ ଅରବିନ୍ଦ କେଜ୍ରିଓ୍ବାଲ ଏବଂ ଅପରେଟରମାନଙ୍କ ମଧ୍ୟରେ ଚାଟ୍ ହୋଇଛି । କେଜ୍ରିଓ୍ବାଲ ନିଜ ଫୋନ୍ ଏବଂ ଅନ୍ୟ ଉପକରଣର ପାସଓ୍ବାର୍ଡ ଦେବାକୁ ମନା କରିବା ପରେ ସଂପୃକ୍ତ ଅପରେଟରମାନଙ୍କ ଫୋନ୍ରୁ ଚାଟ ସଂପର୍କରେ ଜଣାପଡ଼ିଛି ବୋଲି ଇଡି ଦାବି କରିଛି । ତେବେ ଅବକାରୀ ଦୁର୍ନୀତି ମାମଲାରେ ସୁପ୍ରିମକୋର୍ଟ ଜୁନ୍ ୧ ପର୍ଯ୍ୟନ୍ତ କେଜ୍ରିଓ୍ବାଲଙ୍କୁ ଅନ୍ତରୀଣ ଜାମିନ ପ୍ରଦାନ କରିଛନ୍ତି । ଏହି ସମୟରେ ସେ ଦିଲ୍ଲୀର ମୁଖ୍ୟମନ୍ତ୍ରୀ କାର୍ଯ୍ୟାଳୟ ଏବଂ ସଚିବାଳୟ ଯାଇପାରିବେ ନାହିଁ । ଏହା ସହ ଜୁନ୍ ୨ରେ ଆତ୍ମସମର୍ପଣ କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି ।