ମୁମ୍ବାଇ: ମହାରାଷ୍ଟ୍ର ରାଜନୀତିରେ ମହାନାଟକ । ବିଧାନସଭା ନିର୍ବାଚନ ଫଳାଫଳ ଘୋଷଣା ହେବାକୁ ୬ ଦିନରୁ ଅଧିକ ବିତିଲାଣି କିନ୍ତୁ ସରକାର ଗଠନ ହୋଇପାରୁ ନାହିଁ । ୨୦୨୪ ବିଧାନସଭା ନିର୍ବାଚନରେ ମହାୟୁତିକୁ ବଡ଼ ସଫଳତା ମିଳିଥିଲେ ବି ମୁଖ୍ୟମନ୍ତ୍ରୀ ପଦକୁ ନେଇ ଛକାପଞ୍ଝା ଜାରି ରହିଛି । ବଡ଼ଭାଇ ବୋଲାଉଥିବା ବିଜେପି ନିଜ ନେତାଙ୍କୁ ମୁଖ୍ୟମନ୍ତ୍ରୀ କରାଇବାକୁ ପୁରା ଦମ୍ରେ ଲାଗିଥିବା ବେଳେ ଏକନାଥ ସିନ୍ଦେ ମଧ୍ୟ ଏହାର ଫାଇଦା ନେବାକୁ ସମ୍ପୂର୍ଣ୍ଣ ପ୍ରସ୍ତୁତ ।
ପ୍ରଧାନମନ୍ତ୍ରୀ ମୋଦୀଙ୍କ ନିଷ୍ପତ୍ତିକୁ ବିରୋଧ କରିବେ ନାହିଁ ବୋଲି ସ୍ପଷ୍ଟ କରିଥିବା ସିନ୍ଦେ ରାଜ୍ୟ କ୍ୟାବିନେଟରେ ଗୁରୁତ୍ବପୂର୍ଣ୍ଣ ବିଭାଗ ନେବାକୁ ଦାବି କରିଛନ୍ତି । ଶିବେସନା ପକ୍ଷରୁ ଆନୁଷ୍ଠାନିକ ଭାବରେ ଗୃହ ମନ୍ତ୍ରାଳୟ ଦାବି ନେବାକୁ ଦାବି ହୋଇଛି । ଏହା ଖୋଦ ଏକନାଥ ସିନ୍ଦେଙ୍କ ଦାବି ବୋଲି କହିଛି ଦଳ । ସେପଟେ ଦେବେନ୍ଦ୍ର ଫଡ଼ନାଭିସ୍ ଯଦି ମୁଖ୍ୟମନ୍ତ୍ରୀ ହୁଅନ୍ତି ତେବେ ତାଙ୍କ ପାଇଁ ଗୃହ ମନ୍ତ୍ରାଳୟ କେତେ ଜରୁରି ତାହା ଭଲଭାବେ ଜାଣିଛି ବିଜେପି । ହେଲେ କେନ୍ଦ୍ରମନ୍ତ୍ରୀ ଅମିତ ଶାହ ଏବଂ ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କୁ ମହାୟୁତିର ୩ ନେତା ଫଡ଼ନାଭିସ୍, ସିନ୍ଦେ ଏବଂ ପାଓ୍ବାର ଭେଟିବା ପରେ ମଧ୍ୟ କୌଣସି ସ୍ପଷ୍ଟ ସମୀକରଣ ସାମ୍ନାକୁ ଆସିପାରି ନାହିଁ ।
ଏହା ପୂର୍ବରୁ ଏକନାଥ ସିନ୍ଦେ କହିଥିଲେ, ଆଲୋଚନା ଚାଲିଛି, ଦିନେ କି ଦୁଇ ଦିନ ମଧ୍ୟରେ ମୁଖ୍ୟମନ୍ତ୍ରୀ କିଏ ହେବେ ତାହା ଜଣା ପଡ଼ିଯିବ । ପ୍ରଧାନମନ୍ତ୍ରୀ ମୋଦୀ ଯାହା ନିଷ୍ପତ୍ତି ନେବେ ତାକୁ ସ୍ବୀକାର କରିବି । ମୋ ପାଇଁ ‘ପ୍ରିୟର ଭାଇ’ ଉପାଧି ଅନ୍ୟ କେଉଁ ପଦବୀ ଠାରୁ ବହୁତ ବଡ଼ ବୋଲି ସିନ୍ଦେ କହିଥିଲେ । ଏସବୁ ଭିତରେ ମହାୟୁତି ସରକାରରେ ବିଜେପିକୁ ମୁଖ୍ୟମନ୍ତ୍ରୀ ପଦ ମିଳିବାକୁ ଥିବା ବେଳେ ୧୭ କ୍ୟାବିନେଟ୍ ମନ୍ତ୍ରୀ ପଦ ମିଳିପାରେ । ଏକନାଥ ସିନ୍ଦେଙ୍କ ଶିବସେନାକୁ ୯ କ୍ୟାବିନେଟ୍ ମନ୍ତ୍ରୀ ପଦ ଏବଂ ଅଜିତ ପାଓ୍ବାରଙ୍କ ଏନସିପିକୁ ୭ କ୍ୟାବିନେଟ୍ ମନ୍ତ୍ରୀ ପଦ ମିଳିପାରେ ବୋଲି ଚର୍ଚ୍ଚା ହେଉଛି ।
