ଢେଙ୍କାନାଳ,୨୩/୦୬: ସବୁ ଦିନ ପରି ଆଜି ବି ସାଇକେଲ ଧରି ଘରୁ ବାହାରିଥିଲେ । ହେଲେ କିଏ ଜାଣିଥିଲା ଆଉ ସେ କେବେ ବି ଘରକୁ ଫେରିବେ ନାହିଁ । ଢେଙ୍କାନାଳ ଜିଲ୍ଲା କାମାକ୍ଷାନଗର ଥାନା ଗାଲୁକାଟେଣି ଗାଁର ଜଳଧର ସାହୁ । ପୂର୍ବାହ୍ନ ୧୧ଟାରେ ସାଇକେଲରେ କାମାକ୍ଷାନଗର ସାପ୍ତାହିକ ହାଟକୁ ଯାଉଥିଲେ । ହେଲେ ରାସ୍ତାରେ ଘଟିଲା ଦୁର୍ଘଟଣା । ପିକଅପ୍ ଗାଡି ଧକ୍କାରେ ଜଳଧରଙ୍କର ମୃତ୍ୟୁ ହୋଇଛି ।
୫୩ ନମ୍ବର ଜାତୀୟ ରାଜପଥ ଆଳତୁମା ଛକ ନିକଟରେ ଏକ କୁକୁଡା ବୁହା ପିକଅପ୍ ଭ୍ୟାନ ଜଳଧର ସାହୁଙ୍କୁ ପଛପଟୁ ଧକ୍କା ଦେଇଥିଲା । ଫଳରେ ଘଟଣାସ୍ଥଳରେ ହିଁ ଜଳଧରଙ୍କ ମୃତ୍ୟୁ ହୋଇଥିଲା । ଦୁର୍ଘଟଣା ପରେ ପିକଅପ୍ ଗାଡି ଘଟଣାସ୍ଥଳରୁ ଫେରାର ହୋଇଯାଇଥିଲା । କ୍ଷତିପୂରଣ ଦାବିରେ ରାଜପଥକୁ ଅବରୋଧ କରିଥିଲେ ସ୍ଥାନୀୟ ଲୋକ । ଘଟଣାସ୍ଥଳରେ କାମାକ୍ଷାନଗର ପୁଲିସ ପହଞ୍ଚି ବୁଝାସୁଝା କରିବାରେ ବିଫଳ ହୋଇଥିଲେ ।
କ୍ଷତିପୂରଣ ଦାବିରେ ଅଡି ବସିଥିଲେ ଗାଁ ଲୋକ । ରାସ୍ତାରୋକ ଫଳରେ ଉଭୟ ପାର୍ଶ୍ୱରେ ଶହ ଶହ ଗାଡି ଅଟକି ରହିଥିଲା । ଘଟଣାସ୍ଥଳରେ କାମାକ୍ଷାନଗର ଉପଜିଲ୍ଲାପାଳ, ତହସିଲଦାର, କାମାକ୍ଷାନଗର ଏସଡିପିଓ ଓ ଆଇଆଇସି ପହଞ୍ଚି କ୍ଷତିପୂରଣ ଦେବାକୁ ପ୍ରତିଶୃତି ଦେବା ପରେ ପ୍ରାୟ ୧ ଘଣ୍ଟା ପରେ ରାସ୍ତାରୋକ ହଟିଥିଲା ଓ ଯାତାୟତ ସ୍ୱାଭାବିକ୍ ହୋଇଥିଲା ।
ଜଳଧର ଜଣେ ସଫଳ କାଙ୍କଡ଼ ଚାଷୀ ଥିଲେ। ଏଥିପାଇଁ ସେ ତିନି ତିନି ଥର ମୁଖ୍ୟମନ୍ତ୍ରୀଙ୍କଠାରୁ ପୁରସ୍କୃତ ହୋଇଛନ୍ତି । ସେ ପରିବାରର ମୁଖ୍ୟ ଥିଲେ । ତାଙ୍କ ରୋଜଗାରରେ ପରିବାର ଚଳୁଥିଲା । ତାଙ୍କ ମୃତ୍ୟୁରେ ପରିବାରରେ ଶୋକର ଛାୟା ଖେଳି ଯାଇଛି ।
