ନୂଆଦିଲ୍ଲୀ: ନିର୍ବାଚନୀ ପ୍ରଚାରରେ ଆକ୍ଷେପ ଓ ପ୍ରତିଆକ୍ଷେପ ଅଭିଯୋଗକୁ ନେଇ ଉଭୟ ବିଜେପି ଓ କଂଗ୍ରେସକୁ ନୋଟିସ୍ ପଠାଇଛନ୍ତି ନିର୍ବାଚନ ଆୟୋଗ । ବିଜେପିର ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା ଏବଂ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କୁ ନିର୍ବାଚନ ଆୟୋଗ ନୋଟିସ୍ କରି ଜବାବ ମାଗିଛନ୍ତି । ଜେପି ନଡ୍ଡା ଏବଂ ଖଡଗେଙ୍କୁ ନିଜ ଷ୍ଟାର ପ୍ରଚାରକ ଏବଂ ନେତାଙ୍କୁ ନିୟନ୍ତ୍ରଣରେ ରଖିବା ପାଇଁ ଆୟୋଗ କହିଛନ୍ତି । ନିର୍ବାଚନ ଆୟୋଗ ଦୁଇ ନେତାଙ୍କୁ ପରସ୍ପର ବିରୋଧରେ ଅଣାଯାଇଥିବା ଅଭିଯୋଗ ଉପରେ ସ୍ପଷ୍ଟୀକରଣ ଦେବା ପାଇଁ ମଧ୍ୟ କହିଛନ୍ତି ।
ନିର୍ବାଚନ ଆୟୋଗ ଦୁଇ ରାଷ୍ଟ୍ରୀୟ ପାର୍ଟିର ଅଧ୍ୟକ୍ଷଙ୍କୁ ନୋଟିସ୍ କରି ନଭେମ୍ୱର ୧୮ ସୁଦ୍ଧା ଔପଚାରିକ ବୟାନ ଦେବା ପାଇଁ କହିଛନ୍ତି । ଏହାସହ ନିର୍ବାଚନ ଆୟୋଗ ମେ’ ୨୨ରେ ଜାରି କରିଥିବା ନିଜର ପୁରୁଣା ମାର୍ଗଦର୍ଶିକା କଥା ଉଲ୍ଲେଖ କରି, ଏହାକୁ ପାଳନ କରିବା ପାଇଁ ଦୁଇ ନେତାଙ୍କୁ କହିଛନ୍ତି । ନିର୍ବାଚନୀ ରାଲିରେ ସାର୍ବଜନୀନ ମର୍ଯ୍ୟାଦାର ଉଲ୍ଲଂଘନ ନକରି ଏବଂ ପ୍ରଚାର ସମୟରେ ଆଦର୍ଶ ଆଚରଣ ବିଧିର ସଠିକ ପାଳନ ପାଇଁ କହିଛନ୍ତି । ମହାରାଷ୍ଟ୍ର ଏବଂ ଝାଡ଼ଖଣ୍ଡରେ ଜାରି ନିର୍ବାଚନୀ ପ୍ରଚାରରେ ଦୁଇ ପାର୍ଟି ପରସ୍ପର ବିରୋଧରେ ବୟାନବାଜି କରୁଛନ୍ତି । ଏନେଇ ପରସ୍ପର ବିରୋଧରେ ଔପଚାରିକ ଭାବେ ଅଭିଯୋଗ ବି ରଖିଛନ୍ତି ବିଜେପି ଓ କଂଗ୍ରେସ । ଏହି ଅଭିଯୋଗ ଉପରେ ଏବେ ନିର୍ବାଚନ ଆୟୋଗ ଦୁଇ ପ୍ରମୁଖ ଦଳର ଅଧ୍ୟକ୍ଷଙ୍କୁ ତଲବ କରିଛନ୍ତି ।
ରିପୋର୍ଟ ଅନୁସାରେ, ବିଜେପି ନେତା ନିର୍ବାଚନ ପ୍ରଚାର ବେଳେ ମିଛ ଏବଂ ବିଭାଜନକାରୀ ବୟାନ ଦେଉଥିବା କଂଗ୍ରେସ ଅଭିଯୋଗ କରିଥିଲା । ଅନ୍ୟପଟେ ନଭେମ୍ୱର ୧୧ରେ କଂଗ୍ରେସ ନେତା ରାହୁଲ ଗାନ୍ଧୀ ଦୁଇ ରାଜ୍ୟ ମଧ୍ୟରେ ବିବାଦ କରିବାକୁ ଚାହୁଁଥିବା ବିଜେପି ଅଭିଯୋଗ କରିଥିଲା । ଏହାସହ ସମ୍ୱିଧାନକୁ ନେଇ ମିଛ ପ୍ରଚାର କରୁଛନ୍ତି ବୋଲି ବିଜେପି ପକ୍ଷରୁ ଲିଖିତ ଅଭିଯୋଗ କରାଯାଇଥିଲା । ତେବେ ଝାଡ଼ଖଣ୍ଡରେ ପ୍ରଥମ ପର୍ଯ୍ୟାୟ ନିର୍ବାଚନ ଶେଷ ହୋଇଥିବା ବେଳେ ଦ୍ବିତୀୟ ପର୍ଯ୍ୟାୟ ମତଦାନ ନଭେମ୍ବର ୨୦ରେ ହେବ । ସେହିଭଳି ନଭେମ୍ବର ୨୦ରେ ଗୋଟିଏ ପର୍ଯ୍ୟାୟରେ ମହାରାଷ୍ଟ୍ର ବିଧାନସଭା ନିର୍ବାଚନ ଅନୁଷ୍ଠିତ ହେବ ।
