ନୂଆଦିଲ୍ଲୀ, ୧୭।୧: ବେକାରୀଙ୍କ ପାଇଁ ସୁବର୍ଣ୍ଣ ସୁଯୋଗ । ଏକ୍ସରେ ମିଳିବ ଚାକିରି । ବଡ଼ ଘୋଷଣା କରିଛନ୍ତି ଏଲନ ମସ୍କ । କୌଣସି ଖାସ୍ ଡିଗ୍ରୀ ବିନା ଚାକିରି ପାଇବାକୁ ଚାହୁଁଥିଲେ ଏହି ଖବର ଆପଣଙ୍କ ପାଇଁ । କେଉଁ ସ୍କୁଲରେ ପଢ଼ିଛନ୍ତି କି କେତେ ଯାଏ ପାଠ ପଢ଼ିଛନ୍ତି କିଛି ବି ଦରକାର ନାହିଁ । ଏହି ଚାକିରି ପାଇଁ କେବଳ ଗୋଟିଏ ଯୋଗ୍ୟତା ଦରକାର । ଆଉ ସେହି ଯୋଗ୍ୟତା କ’ଣ ଆସନ୍ତୁ ଜାଣିବା…
ସାମାଜିକ ଗଣମାଧ୍ୟମ ପ୍ଲାଟଫର୍ମ ଏକ୍ସର ମାଲିକ ଏଲନ ମସ୍କ ନିଜ କମ୍ପାନୀରେ ଚାକିରି ଦେବାକୁ ଏକ ବଡ଼ ଘୋଷଣା କରିଛନ୍ତି । ଏକ୍ସରେ ଭିନ୍ନ ଢଙ୍ଗରେ ନିଯୁକ୍ତି ପାଇଁ ପୋଷ୍ଟ କରିଛନ୍ତି ମସ୍କ । ସେ ପୋଷ୍ଟରେ ଲେଖିଛନ୍ତି କି ‘ଆପଣ କେତେ ଯାଏ ପଢ଼ିଛନ୍ତି ଦରକାର ନାହିଁ, କି କେଉଁ ସ୍କୁଲରେ ପଢ଼ିଛନ୍ତି ତାହା ବି ଆବଶ୍ୟକ ନାହିଁ । ଏହି ଚାକିରି ପାଇଁ କେବଳ ଗୋଟିଏ ଯୋଗ୍ୟତା ଦରକାର । ଯଦି ଆପଣ କେବଳ ଦକ୍ଷ ସଫ୍ଟୱେୟାର ଇଞ୍ଜିନିୟର ତେବେ ଏହି ଚାକିରି ପାଇଁ ଆବେଦନ କରନ୍ତୁ । ମସ୍କ ତାଙ୍କ ଗୁରୁତ୍ୱପୂର୍ଣ୍ଣ ପ୍ରୋଜେକ୍ଟ ‘ଏଭ୍ରିଥିଙ୍ଗ’ ପାଇଁ ଜଣେ ତାଲିମପ୍ରାପ୍ତ ସପ୍ଟୱେର ଇଞ୍ଜିନିୟର ଖୋଜୁଛନ୍ତି ।
ତେବେ ଏହା ପ୍ରଥମ ଥର ନୁହେଁ, ଏହା ପୂର୍ବରୁ ମଧ୍ୟ ସେ ଡିଗ୍ରୀ ଅପେକ୍ଷା ସମସ୍ୟାର ସମାଧାନ ଉପରେ ଗୁରୁତ୍ୱ ଦେଇଆସିଛନ୍ତି । ୨୦୧୪ରେ ସେ ସ୍ପଷ୍ଟ କରିଥିଲେ କି ଟେସଲାରେ କାମ କରିବା ପାଇଁ କୌଣସି ବିଶ୍ୱବିଦ୍ୟାଳୟର ଡିଗ୍ରୀର ଆବଶ୍ୟକତା ନାହିଁ । ତାଙ୍କ ବିଚାରରେ ଏହା ଯୋଗ୍ୟତା ସମ୍ପର୍କରେ ନୁହେଁ ଯେ କିଏ କେତେ ପଢ଼ିଛନ୍ତି ବରଂ କିଏ କେତେ କାମ କରି ଦେଖାଇପାରିବେ ତାହା ହେଉଛି ଗୁରୁତ୍ୱପୂର୍ଣ୍ଣ । ଏହା ତାଙ୍କ କମ୍ପାନୀର ଦ୍ୱିତୀୟ ଅଫର୍ । କହିରଖୁ କି, ମସ୍କ ଏକ୍ସକୁ ଏମିତି ଏକ ସିଙ୍ଗଲ ପ୍ଲାଟଫର୍ମ କରିବାକୁ ପ୍ରସ୍ତୁତ ହେଉଛନ୍ତି ଯାହା ପେମେଣ୍ଟ, ମେସେଜ୍, ଇ-କମର୍ସ ଓ ମଲ୍ଟିମିଡିଆ ଭଳି ସମସ୍ତ ସେବା ଯୋଗାଇ ପାରିବ । ଚୀନର ୱିଚାଟ୍ ଏମିତି ଏକ ଆପ୍ ଯାହା ସେଠାରେ ବହୁଳ ମାତ୍ରାରେ ବ୍ୟବହାର ହୋଇଥାଏ । ଏହି ଗୋଟିଏ ଆପ୍ ବ୍ୟବହାର କରି ୟୁଜର୍ ସପିଂ, ପେମେଣ୍ଟ, ସେସିଆଲ ନେଟୱାର୍କିଂ ଆଦି କରିପାରନ୍ତି ।
