ପୁରୀ,୨୯/୦୮: ୧୪ବର୍ଷ ବିତିଲା । ଏମାର ମଠରୁ ମିଳିଥିବା ରୁପା ଇଟା ରତ୍ନ ଭଣ୍ଡାରକୁ ଆସିପାରିଲାନି । ପୁରୀ ଜିଲ୍ଲା ପୁଲିସ ବାରାକ୍ ଅସ୍ତ୍ରାଗାରାରେ ପଡ଼ିଛି ୫୬୭ ଖଣ୍ଡ ରୁପା ଇଟା । ପ୍ରତି ଇଟାର ଓଜନ ପ୍ରାୟ ୩୦ କିଗ୍ରା । ଏବେ କେଉଁ ଅବସ୍ଥାରେ ଏହି ଇଟା ରହିଛି ସମସ୍ତେ ଅନ୍ଧାରରେ । ସୁପ୍ରିମ୍କୋର୍ଟଙ୍କ ନିର୍ଦ୍ଦେଶ ମୁତାବକ ସମସ୍ତ ମଠ ସମ୍ପତ୍ତି ଶ୍ରୀଜଗନ୍ନାଥ ମହାପ୍ରଭୁଙ୍କର । ମାତ୍ର ଏହି ରୁପା ଇଟା ନା ମହାପ୍ରଭୁଙ୍କ ରତ୍ନଭଣ୍ଡାରକୁ ଯାଉଛି ନା ଜିଲ୍ଲା ଟ୍ରେଜେରୀକୁ ଯାଉଛି । ଏହି ଦୁଇ ସ୍ଥାନରେ ମୂଲ୍ୟବାନ ଜିନିଷଗୁଡ଼ିକ ସୁରକ୍ଷା ଦୃଷ୍ଟିରୁ ରୁହେ । ଅସ୍ତ୍ରାଗାରରେ ଦୀର୍ଘଦିନ ହେବ ଗୋଳା ବାରୁଦ ଓ ବନ୍ଧୁକ ସହ ଏହି ରୁପା ଇଟା ପଡ଼ି ରହିଛି ।
ରତ୍ନଭଣ୍ଡାର ମରାମତି ସରିବା ସହ ଗଣତିମଣତି ପ୍ରକ୍ରିୟା ଖୁବ୍ଶୀଘ୍ର କରିବାକୁ ସରକାରୀ ପ୍ରସ୍ତୁତି ହେଉଛି । ତେଣୁ ସରକାର ଏହି ରୁପା ଇଟାର ଗଣତିମଣତି କରି ଏହାକୁ ଶ୍ରୀମନ୍ଦିର ରତ୍ନଭଣ୍ଡାରରେ ସୁରକ୍ଷିତ ରଖନ୍ତୁ ବୋଲି ଦାବି ହୋଇଛି । ଏନେଇ ଆଇନଜୀବୀ ଦିଲ୍ଲୀପ ବରାଳ ଶ୍ରୀମନ୍ଦିର ପ୍ରଶାସନକୁ ନିବେଦନ କରିଛନ୍ତି ।
ରୁପା ଇଟା ସୁରକ୍ଷାକୁ ନେଇ ଗତ ମାର୍ଚ୍ଚରେ ବସିଥିବା ବିଧାନସଭାରେ ପ୍ରଶ୍ନ ଉଠିଥିଲା । ଯାହାର ଲିଖିତ ଉତ୍ତର ରଖିଥିଲେ ଆଇନମନ୍ତ୍ରୀ । ଯାହାକୁ ୫ମାସ ବିତିଛି। ମାତ୍ର ଏବାବଦରେ ପ୍ରଶାସନିକ ପଦକ୍ଷେପ ଶୂନ । ବିଧାୟକ କହ୍ନାଇ ଚରଣ ଡାଙ୍ଗ ବିଧାନସଭାରେ ଲିଖିତ ପ୍ରଶ୍ନ କରିଥିଲେ । ଏହାକୁ ଶ୍ରୀମନ୍ଦିର ପ୍ରଶାସନ ନିଜ ମାର୍ଫତକୁ ଆଣି ମନ୍ଦିରରେ ରୁପା ଛାଉଣି କାର୍ଯ୍ୟରେ ଲଗାଇବାକୁ ଶ୍ରଦ୍ଧାଳୁ ଓ ସେବାୟତମାନେ ଦାବି କରୁଥିବାରୁ ଏହାର ବିଚାର କରାଯିବ କି? ଏହି ପ୍ରଶ୍ନର ଉତ୍ତରରେ ଆଇନମନ୍ତ୍ରୀ ଜଣାଇଥିଲେ ଯେ, ଏମାର ମଠରୁ ୨୦୧୧ ମସିହାରେ ୫୬୭ଟି ରୁପା ଇଟା ପୁଲିସ ଦ୍ୱାରା ଜବତ କରାଯାଇଥିଲା । ହାଇକୋର୍ଟଙ୍କ ନିର୍ଦ୍ଦେଶକ୍ରମେ ଏହା ପୁରୀ ଜିଲ୍ଲା ପୁଲିସ ଅସ୍ତ୍ରାଗାରରେ ରହିଛି । ଏହି ରୁପା ଇଟାକୁ ଶ୍ରୀମନ୍ଦିର ପ୍ରଶାସନ ମାର୍ଫତକୁ ନେବା ଓ ଆଇନଗତ ଦିଗ ସରକାରଙ୍କ ବିଚାରାଧୀନ ରହିଛି ।
ସୂଚନା ଥାଉକି, ୨୦୧୧ରେ ଏମାର ମଠରୁ ୫୨୨ ଖଣ୍ଡ ଇଟା ପୁଲିସ ଜବତ କରିଥିଲା । ଯେତେବେଳେ କି ୨୦୨୧ ମସିହାରେ ଆଉ ୪୫ ଖଣ୍ଡ ରୁପା ଇଟା ପୁନଶ୍ଚ ଏହି ମଠ ଭିତରୁ ମିଳିଥିଲା । ଯାହା ସମସ୍ତ ରାଜ୍ୟରେ ଚହଳ ସୃଷ୍ଟି କରିଥିଲା । ଏହାକୁ ମହାପ୍ରଭୁଙ୍କ ମାଲିକାନାରେ ରଖିବାକୁ ଦାବି ହୋଇଥିଲା । ଏଥିସହ ଏମାର ମଠ ତଳେ ଆଉ ଗୁପ୍ତ ସମ୍ପତ୍ତି ଅଛି କି ନାହିଁ ତାହାର ଜିପିଆର୍ ସର୍ଭେର ରିପୋର୍ଟ ସାର୍ବଜନୀନ କରିବାକୁ ଦାବି ହୋଇଛି । ପ୍ରାୟ ୪୦ ଲକ୍ଷ ଖର୍ଚ୍ଚରେ ଶ୍ରୀମନ୍ଦିର ୭୫ ମିଟର ପରିଧି ପରିକ୍ରମା ମାର୍ଗରେ ଥିବା ସମସ୍ତ ଜମିର ଜିପିଆର ସର୍ଭେ ହୋଇଥିଲା । ଗାନ୍ଧିନଗର ଆଇଆଇଟି ଏହି ସର୍ଭେ କରି ଓବିସିସିକୁ ରିପୋର୍ଟ ଦେଇଥିଲା । ସର୍ଭେ ଭିତରେ ଏମାର ମଠ ମଧ୍ୟ ଥିଲା । ସର୍ଭେ ରିପୋର୍ଟ ପାଇବା ନିମନ୍ତେ ଜଣେ ବ୍ୟକ୍ତି ସୂଚନାଧିକାର ଆଇନରେ ଓବିସିସିକୁ ତଥ୍ୟ ମାଗିଥିଲେ । ହେଲେ ଶ୍ରୀମନ୍ଦିର ସୁରକ୍ଷା ପ୍ରତି ବିପଦ ସୃଷ୍ଟି ହେବ ବୋଲି ଦର୍ଶାଇ ଓବିସିସି ତଥ୍ୟ ଦେଇନଥିଲା । ଏଥିରୁ ପରିକ୍ରମା ମାର୍ଗ ମାଟିତଳେ ଗୁପ୍ତ ସମ୍ପତ୍ତି ଥିବା ସନ୍ଦେହ କରାଯାଉଛି । ରିପୋର୍ଟ ସାର୍ବଜନୀନ ହେଲେ ଏହା ଜଣାପଡ଼ନ୍ତା ବୋଲି ମତ ପ୍ରକାଶ ପାଇଛି ।
