ନୂଆଦିଲ୍ଲୀ,୦୧/୧୨: କେନ୍ଦ୍ର ସରକାର କର୍ମଚାରୀ ଭବିଷ୍ୟନିଧି ପାଣ୍ଠି ସଂଗଠନ(ଇପିଏଫ୍ଓ) ରେ ବଡ଼ ପରିବର୍ତ୍ତନ ଆଣିବା ପାଇଁ ପ୍ରସ୍ତୁତ ହେଉଛନ୍ତି ।
ସୂତ୍ର ଅନୁସାରେ ଇପିଏଫ୍ଓ ୩.୦ରେ ଥିବା ବ୍ୟବସ୍ଥା ଅନୁସାରେ,କର୍ମଚାରୀଙ୍କୁ ଏବେ ଏଟିଏମ୍ ମାଧ୍ୟମରେ ସିଧାସଳଖ ପିଏଫ୍ ପାଣ୍ଠି ଉଠାଣ ସୁବିଧା ଦେବା ଉପରେ ବିଚାର କରାଯାଉଛି । ଅନୁମାନ କରାଯାଉଛି ଯେ, ଆସନ୍ତା ବର୍ଷ ଜୁନ୍ରୁ ଏ ସୁବିଧା ଆରମ୍ଭ ହୋଇପାରେ କିନ୍ତୁ ଏହା ଜରିଆରେ ଏକ ଧାର୍ଯ୍ୟ ରାଶି ହିଁ ଉଠାଯାଇପାରିବ । ଏହା ମାଧ୍ୟମରେ କର୍ମଚାରୀ ଜରୁରୀକାଳୀନ ପରିସ୍ଥିତି ପାଇଁ ଟଙ୍କା ଉଠାଇବେ କିନ୍ତୁ ଅବସର ପରେ ବି ଆକାଉଣ୍ଟରେ ପର୍ଯ୍ୟାପ୍ତ ରାଶି ସୁନିଶ୍ଚିତ ରହିବ ।
ସେହିଭଳି ଇପିଏଫ୍ରେ କର୍ମଚାରୀଙ୍କ ପକ୍ଷରୁ ବର୍ତ୍ତମାନ ୧୨% ଯୋଗଦାନ ଥିବାବେଳେ ଏହାକୁ ବି ବଢ଼ାଇବା ଉପରେ ବିଚାର କରାଯାଉଛି । ବର୍ତ୍ତମାନ କର୍ମଚାରୀ ନିଜ ମୂଳ ବେତନ, ମହଙ୍ଗା ଭତ୍ତା ଏବଂ ରିଟେନିଂ ଭତ୍ତାର ୧୨% ଯୋଗଦାନ ଦେଉଛନ୍ତି, ଯେଉଁଥିରେ ୮.୩୩% ବେତନ ପେନ୍ସନ ପାଣ୍ଠି ଏବଂ ୩.୬୭% ଇପିଏଫ୍କୁ ଯାଇଥାଏ ।
