ହରଭଙ୍ଗା,୭/୬ :  ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ ଜିଲ୍ଲାରେ ସର୍ବାଧିକ କିଡ଼ନୀ ପ୍ରପୀଡ଼ିତ ରୋଗୀ ଚି଼ହ୍ନଟ ଥିବାବେଳେ ବହୁ ସମୟରେ ଔଷଧ ଅଭାବରୁ ରୋଗୀ ମୃତ୍ୟୁ ହୋଇଥାନ୍ତି l ଓଡିଶାରେ ଆୟୁଷ୍ମାନ ଆରୋଗ୍ୟ ଶିବିର ରାଜ୍ୟ ସରକାର ଯୋଗାଇ ଦେବା ଫଳରେ ପ୍ରତି ଜିଲ୍ଲା ଓ ବ୍ଲକସ୍ତରରେ ଏବେ କିଡ଼ନୀ ରୋଗୀ ନିଃଶୁଳ୍କରେ ରୋଗ ପରୀକ୍ଷା ଓ ଔଷଧ ପାଇ ପାରିବେ l 

ଏହାକୁ ନେଇ ବୌଦ୍ଧ ଜିଲ୍ଲାରେ ସର୍ବାଧିକ କିଡ଼ନୀ ପୀଡିତ ଅଂଚଳ ହରଭଙ୍ଗା ବ୍ଲକରେ ହରଭଙ୍ଗା ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ରଠାରେ ଶନିବାର ଜିଲ୍ଲା ସ୍ୱାସ୍ଥ୍ୟ ବିଭାଗ ତରଫରୁ ଆଡ଼େନି ଗଡ଼ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଆନୁକୂଲ୍ୟରେ କିଡ଼ନୀ ରୋଗୀଙ୍କୁ ସ୍ୱାସ୍ଥ୍ୟ ପରୀକ୍ଷା ଓ ଔଷଧ ବଣ୍ଟନ କରାଯାଇଛି l ଏହି କାର୍ଯ୍ୟକ୍ରମରେ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ ଡା.କିଶୋର ଚନ୍ଦ୍ର ପଟ୍ଟନାୟକ, ଏଡିଏମଓ ଡା.ସଂଘମିତ୍ରା ପଣ୍ଡା, ଭୁବନେଶ୍ୱର ଉତ୍କଳ ହସ୍ପିଟାଲରୁ ଆସିଥିବା କିଡ଼ନୀ ସ୍ପେସାଲିଷ୍ଟ ଡା.ଲାଲାଟ ବରୁଣ ପାତ୍ର, ଆଡ଼େନି ଗଡ଼ ଗୋଷ୍ଠୀ ସ୍ୱାସ୍ଥ୍ୟ ଅଧିକାରୀ ଡା.ଶ୍ରୀବନ୍ତ ସ୍ୱାଇଁ ଓ ଡା. ଶ୍ୟାମପ୍ରସାଦ ମେହେର ଉପସ୍ଥିତ ରହି ବ୍ଲକର ମହାଲିକ ପଡ଼ା, କୁସଙ୍ଗ, ଛତ୍ରଙ୍ଗ, ହରଭଙ୍ଗା ଓ ସଂକୁଲୋଇ ଆଦି ୫ଟି ପଂଚାୟତରୁ ଆସିଥିବା ୭୨ଜଣ କିଡ଼ନୀ ପ୍ରପୀଡ଼ିତ ରୋଗୀଙ୍କ ସ୍ୱାସ୍ଥ୍ୟ ପରୀକ୍ଷା ସହ ଔଷଧ ବଣ୍ଟନ କରାଯାଇଥିଲା l ଏହି କିଡ଼ନୀ ରୋଗ ପରୀକ୍ଷା ଓ ଔଷଧ ବଣ୍ଟନ କାର୍ଯ୍ୟକ୍ରମ ଆଗକୁ ଜିଲ୍ଲାର ୩ଟି ବ୍ଲକ ସହ ଏନଏସି ଅଞ୍ଚଳରେ ମଧ୍ୟ ଚାଲୁ ରହିବ ବୋଲି ଜଣା ପଡ଼ିଛି l