ନୂଆଦିଲ୍ଲୀ, ୧୧/୦୪ : ଏବେ କାଶ୍ମୀରରେ ଫଳିବ ଦୁର୍ଲଭ ଛତୁ। କିଲୋ ପ୍ରତି ୪୦ ହଜାର ଟଙ୍କାରେ ଛତୁ ବିକ୍ରି କରିବେ ଚାଷୀ। ଶ୍ରୀନଗର ସ୍ଥିତ ଶେର-ଏ-କାଶ୍ମୀର କୃଷି ବିଶ୍ଵବିଦ୍ୟାଳୟ ପ୍ରଥମ ଥର ପାଇଁ ନିୟନ୍ତ୍ରିତ ପରିବେଶରେ ସଫଳତାପୂର୍ବକ ଏହି ଛତୁ ଫଳାଇଛି।

​​​​​​​

ଏହି ଛତୁର ନାମ ମୋରେଲ। ଏହାକୁ ସ୍ଥାନୀୟ ଭାଷାରେ କଙ୍ଗାଚ କୁହାଯାଏ। ବିଶେଷ କରି ଉଚ୍ଚ ପାହାଡ଼ିଆ ଜଙ୍ଗଲରେ ବର୍ଷା ଋତୁରେ ଏହି ଛତୁ ଫୁଟେ। ବଜାରରେ ଏହା କିଲୋ ପ୍ରତି ୧୫ ହଜାରରୁ ୪୦ ହଜାର ଟଙ୍କାରେ ବିକ୍ରି ହୁଏ। ସ୍ଵାଦ, ପୋଷଣ ଏବଂ ଔଷଧିୟ ଗୁଣ ପାଇଁ ଏହି ଛତୁର ଚାହିଦା ବେଶୀ। ଏହାକୁ ଜଙ୍ଗଲରୁ ସଂଗ୍ରହ କରିବା ଖୁବ୍ ମୁସ୍କିଲ ହୋଇଥାଏ। ଖରାପ ପାଣିପାଗରେ ଜଙ୍ଗଲ ଭିତରୁ ଏହାକୁ ସଂଗ୍ରହ କରିବା କଷ୍ଟସାଧ୍ୟ ହୋଇଥାଏ। ବେଳେ ବେଳେ ଖୋଜିଲେ ବି ଏହି ଛତୁ ମିଳିନଥାଏ।

ବିଶ୍ଵବିଦ୍ୟାଳୟର କୁଳପତି ପ୍ରଫେସର ନଜିର ଅହମଦ ଗନଈ ଏନେଇ କହିଛନ୍ତି ଯେ, ଏହା ଏକ ଗେମ୍ ଚେଞ୍ଜିଂ ଉପଲବ୍ଧି। ଏହା ଦ୍ଵାରା ମୋରେଲ ଛତୁ ପାଇଁ ଜଙ୍ଗଲ ଉପରୁ ନିର୍ଭରତା କମିବ। ନିଜ କ୍ଷେତରେ ଅଧିକରୁ ଅଧିକ ଛତୁ ଫଳାଇ ହେବ। ଉତ୍ପାଦନ ବଢିବ। ଏହାଦ୍ଵାରା କୃଷକ ଏବଂ ଯୁବକଙ୍କୁ ରୋଜଗାର ମିଳିବ। ପରିବେଶ ସଂରକ୍ଷଣ ମଧ୍ୟ ହୋଇପାରିବ। 

ଏହି ଛତୁ ଫଳାଇବା ପାଇଁ ବିଶେଷଜ୍ଞମାନେ ପ୍ରାୟ ୫ ବର୍ଷ ଧରି କାମ କରିଛନ୍ତି। ଜଙ୍ଗଲରୁ ୧୦୦୦ରୁ ଅଧିକ ସ୍ଥାନରୁ ଛତୁ ସଂଗ୍ରହ କରିଛନ୍ତି। ସେଠାକାର ମାଟି, ପାଣିପାଗ ଏବଂ ଆଖପାଖର ବାତାବରଣକୁ ଅଧ୍ୟୟନ କରିଛନ୍ତି। ଏଥିରୁ ୧୦ଟି କିସମ ବାଛି ସେମାନଙ୍କ ପାଇଁ ଆବଶ୍ୟକୀୟ ବାତାବରଣ ସୃଷ୍ଟି କରାଯାଇଥିଲା। ଏଥିରୁ ୩ ପ୍ରକାରରେ ଛତୁ ଫଳାଇବାରେ ସଫଳତା ମିଳିଥିଲା। ଅନ୍ତରାଷ୍ଟ୍ରୀୟ ବଜାରରେ ଏହି ଛତୁର ଖୁବ୍ ଡିମାଣ୍ଡ ରହିଛି। 

ଏହି ଖବରଟିକୁ ପଢନ୍ତୁ- ବେପରୁଆ ଡ୍ରାଇଭିଂକୁ ନେଇ କର୍ଣ୍ଣାଟକ ହାଇକୋର୍ଟଙ୍କ ଅଜବ ସର୍ତ୍ତ, ଗାଡି ମାଲିକଙ୍କ ମୁଣ୍ଡ ଗୋଲ୍...